Sukta 87

87.1

9 ushana kavyah, pavamanah somah, trishtup

प्र तु द्र॑व॒ परि॒ कोशं॒ नि षी॑द॒ नृभि॑ः पुना॒नो अ॒भि वाज॑मर्ष ।
अश्वं॒ न त्वा॑ वा॒जिनं॑ म॒र्जय॒न्तोऽच्छा॑ ब॒र्ही र॑श॒नाभि॑र्नयन्ति ॥१॥

Pra tu drava pari kosham ni shida nribhih punano abhi vajamarsha
Ashvam na tva vajinam marjayantochchha barhi rashanabhirnayanti

स्वा॒यु॒धः प॑वते दे॒व इन्दु॑रशस्ति॒हा वृ॒जनं॒ रक्ष॑माणः ।
पि॒ता दे॒वानां॑ जनि॒ता सु॒दक्षो॑ विष्ट॒म्भो दि॒वो ध॒रुण॑ः पृथि॒व्याः ॥२॥

Svayudhah pavate deva indurashastiha vrijanam rakshamanah
Pita devanam janita sudaksho vishtambho divo dharunah prithivyah

ऋषि॒र्विप्र॑ः पुरए॒ता जना॑नामृ॒भुर्धीर॑ उ॒शना॒ काव्ये॑न ।
स चि॑द्विवेद॒ निहि॑तं॒ यदा॑सामपी॒च्यं१ गुह्यं॒ नाम॒ गोना॑म् ॥३॥

Rishirviprah puraeta jananamribhurdhira ushana kavyena
Sa chidviveda nihitam yadasamapichyan1 guhyam nama gonam

ए॒ष स्य ते॒ मधु॑माँ इन्द्र॒ सोमो॒ वृषा॒ वृष्णे॒ परि॑ प॒वित्रे॑ अक्षाः ।
स॒ह॒स्र॒साः श॑त॒सा भू॑रि॒दावा॑ शश्वत्त॒मं ब॒र्हिरा वा॒ज्य॑स्थात् ॥४॥

Esha sya te madhumam indra somo vrisha vrishne pari pavitre akshah
Sahasrasah shatasa bhuridava shashvattamam barhira vajyasthat

ए॒ते सोमा॑ अ॒भि ग॒व्या स॒हस्रा॑ म॒हे वाजा॑या॒मृता॑य॒ श्रवां॑सि ।
प॒वित्रे॑भि॒ः पव॑माना असृग्रञ्छ्रव॒स्यवो॒ न पृ॑त॒नाजो॒ अत्या॑ः ॥५॥

Ete soma abhi gavya sahasra mahe vajayamritaya shravansi
Pavitrebhih pavamana asrigranchhravasyavo na pritanajo atyah

परि॒ हि ष्मा॑ पुरुहू॒तो जना॑नां॒ विश्वास॑र॒द्भोज॑ना पू॒यमा॑नः ।
अथा भ॑र श्येनभृत॒ प्रयां॑सि र॒यिं तुञ्जा॑नो अ॒भि वाज॑मर्ष ॥६॥

Pari hi shma puruhuto jananam vishvasaradbhojana puyamanah
Atha bhara shyenabhrita prayansi rayim tunjano abhi vajamarsha

ए॒ष सु॑वा॒नः परि॒ सोम॑ः प॒वित्रे॒ सर्गो॒ न सृ॒ष्टो अ॑दधाव॒दर्वा॑ ।
ति॒ग्मे शिशा॑नो महि॒षो न शृङ्गे॒ गा ग॒व्यन्न॒भि शूरो॒ न सत्वा॑ ॥७॥

Esha suvanah pari somah pavitre sargo na srishto adadhavadarva
Tigme shishano mahisho na shringe ga gavyannabhi shuro na satva

ए॒षा य॑यौ पर॒माद॒न्तरद्रे॒ः कूचि॑त्स॒तीरू॒र्वे गा वि॑वेद ।
दि॒वो न वि॒द्युत्स्त॒नय॑न्त्य॒भ्रैः सोम॑स्य ते पवत इन्द्र॒ धारा॑ ॥८॥

Esha yayau paramadantaradreh kuchitsatirurve ga viveda
Divo na vidyutstanayantyabhraih somasya te pavata indra dhara

उ॒त स्म॑ रा॒शिं परि॑ यासि॒ गोना॒मिन्द्रे॑ण सोम स॒रथं॑ पुना॒नः ।
पू॒र्वीरिषो॑ बृह॒तीर्जी॑रदानो॒ शिक्षा॑ शचीव॒स्तव॒ ता उ॑प॒ष्टुत् ॥९॥

Uta sma rashim pari yasi gonamindrena soma saratham punanah
Purvirisho brihatirjiradano shiksha shachivastava ta upashtut