সূক্ত 90

90.1

৬ বসিষ্ঠো মৈত্রাবরুণিঃ । পবমানঃ সোমঃ । ত্রিষ্টুপ্ ।

প্র হিন্বানো জনিতা রোদস্যো রথো ন বাজং সনিষ্যন্নয়াসীৎ ।
ইন্দ্রং গচ্ছন্নায়ুধা সংশিশানো বিশ্বা বসু হস্তয়োরাদধানঃ ॥১॥

90.2

অভি ত্রিপৃষ্ঠং বৃষণং বয়োধামাঙ্গূষাণামবাবশন্ত বাণীঃ ।
বনা বসানো বরুণো ন সিন্ধূন্বি রত্নধা দয়তে বার্যাণি ॥২॥

90.3

শূরগ্রামঃ সর্ববীরঃ সহাবাঞ্জেতা পবস্ব সনিতা ধনানি ।
তিগ্মায়ুধঃ ক্ষিপ্রধন্বা সমত্স্বষাল্হঃ সাহ্বান্পৃতনাসু শত্রূন্ ॥৩॥

90.4

উরুগব্যূতিরভয়ানি কৃণ্বন্ত্সমীচীনে আ পবস্বা পুরংধী ।
অপঃ সিষাসন্নুষসঃ স্ব১র্গাঃ সং চিক্রদো মহো অস্মভ্যং বাজান্ ॥৪॥

90.5

মত্সি সোম বরুণং মত্সি মিত্রং মত্সীন্দ্রমিন্দো পবমান বিষ্ণুম্ ।
মত্সি শর্ধো মারুতং মত্সি দেবান্মত্সি মহামিন্দ্রমিন্দো মদায় ॥৫॥

90.6

এবা রাজেব ক্রতুমাঁ অমেন বিশ্বা ঘনিঘ্নদ্দুরিতা পবস্ব ।
ইন্দো সূক্তায় বচসে বয়ো ধা যূয়ং পাত স্বস্তিভিঃ সদা নঃ ॥৬॥