সূক্ত 107

107.1

২৬ সপ্তর্ষয়ঃ ( ১ ভরদ্বাজো বার্হস্পত্যঃ , ২ কশ্যপো মারীচঃ, ৩ গোতমো রাহূগণঃ, ৪ ভৌমোঽত্রিঃ, ৫ বিশ্বামিত্রো গাথিনঃ, ৬ জমদগ্নির্ভার্গবঃ, ৭ মৈত্রাবরুণির্বসিষ্ঠঃ ) ।পবমানঃ সোমঃ । প্রগাথঃ= (১,৪,৬,৮,৯,১০,১২,১৪,১৭ বৃহতী; ২,৫,৭,১১,১৩,১৫,১৮ সতোবৃহতী, ) ৩,১৬ দ্বিপদা বিরাট্ ; ১৯-২৬ প্রগাথঃ= ( বিষমা বৃহতী, সমা সতোবৃহতী ) ।

পরীতো ষিঞ্চতা সুতং সোমো য উত্তমং হবিঃ ।
দধন্বাঁ যো নর্যো অপ্স্ব১ন্তরা সুষাব সোমমদ্রিভিঃ ॥১॥

107.2

নূনং পুনানোঽবিভিঃ পরি স্রবাঽদব্ধঃ সুরভিন্তরঃ ।
সুতে চিত্ত্বাপ্সু মদামো অন্ধসা শ্রীণন্তো গোভিরুত্তরম্ ॥২॥

107.3

পরি সুবানশ্চক্ষসে দেবমাদনঃ ক্রতুরিন্দুর্বিচক্ষণঃ ॥৩॥

107.4

পুনানঃ সোম ধারয়াঽপো বসানো অর্ষসি ।
আ রত্নধা যোনিমৃতস্য সীদস্যুত্সো দেব হিরণ্যয়ঃ ॥৪॥

107.5

দুহান ঊধর্দিব্যং মধু প্রিয়ং প্রত্নং সধস্থমাসদৎ ।
আপৃচ্ছ্যং ধরুণং বাজ্যর্ষতি নৃভির্ধূতো বিচক্ষণঃ ॥৫॥

107.6

পুনানঃ সোম জাগৃবিরব্যো বারে পরি প্রিয়ঃ ।
ত্বং বিপ্রো অভবোঽঙ্গিরস্তমো মধ্বা যজ্ঞং মিমিক্ষ নঃ ॥৬॥

107.7

সোমো মীঢ্বান্পবতে গাতুবিত্তম ঋষির্বিপ্রো বিচক্ষণঃ ।
ত্বং কবিরভবো দেববীতম আ সূর্যং রোহয়ো দিবি ॥৭॥

107.8

সোম উ ষুবাণঃ সোতৃভিরধি ষ্ণুভিরবীনাম্ ।
অশ্বয়েব হরিতা যাতি ধারয়া মন্দ্রয়া যাতি ধারয়া ॥৮॥

107.9

অনূপে গোমান্গোভিরক্ষাঃ সোমো দুগ্ধাভিরক্ষাঃ ।
সমুদ্রং ন সংবরণান্যগ্মন্মন্দী মদায় তোশতে ॥৯॥

107.10

আ সোম সুবানো অদ্রিভিস্তিরো বারাণ্যব্যয়া ।
জনো ন পুরি চম্বোর্বিশদ্ধরিঃ সদো বনেষু দধিষে ॥১০॥

107.11

স মামৃজে তিরো অণ্বানি মেষ্যো মীল্হে সপ্তির্ন বাজয়ুঃ ।
অনুমাদ্যঃ পবমানো মনীষিভিঃ সোমো বিপ্রেভিৠক্বভিঃ ॥১১॥

107.12

প্র সোম দেববীতয়ে সিন্ধুর্ন পিপ্যে অর্ণসা ।
অংশোঃ পয়সা মদিরো ন জাগৃবিরচ্ছা কোশং মধুশ্চুতম্ ॥১২॥

107.13

আ হর্যতো অর্জুনে অত্কে অব্যত প্রিয়ঃ সূনুর্ন মর্জ্যঃ ।
তমীং হিন্বন্ত্যপসো যথা রথং নদীষ্বা গভস্ত্যোঃ ॥১৩॥

107.14

অভি সোমাস আয়বঃ পবন্তে মদ্যং মদম্ ।
সমুদ্রস্যাধি বিষ্টপি মনীষিণো মত্সরাসঃ স্বর্বিদঃ ॥১৪॥

107.15

তরত্সমুদ্রং পবমান ঊর্মিণা রাজা দেব ঋতং বৃহৎ ।
অর্ষন্মিত্রস্য বরুণস্য ধর্মণা প্র হিন্বান ঋতং বৃহৎ ॥১৫॥

107.16

নৃভির্যেমানো হর্যতো বিচক্ষণো রাজা দেবঃ সমুদ্রিয়ঃ ॥১৬॥

107.17

ইন্দ্রায় পবতে মদঃ সোমো মরুত্বতে সুতঃ । সহস্রধারো অত্যব্যমর্ষতি তমী মৃজন্ত্যায়বঃ ॥১৭॥

107.18

পুনানশ্চমূ জনয়ন্মতিং কবিঃ সোমো দেবেষু রণ্যতি ।
অপো বসানঃ পরি গোভিরুত্তরঃ সীদন্বনেষ্বব্যত ॥১৮॥

107.19

তবাহং সোম রারণ সখ্য ইন্দো দিবেদিবে ।
পুরূণি বভ্রো নি চরন্তি মামব পরিধীঁরতি তাঁ ইহি ॥১৯॥

107.20

উতাহং নক্তমুত সোম তে দিবা সখ্যায় বভ্র ঊধনি ।
ঘৃণা তপন্তমতি সূর্যং পরঃ শকুনা ইব পপ্তিম ॥২০॥

107.21

মৃজ্যমানঃ সুহস্ত্য সমুদ্রে বাচমিন্বসি ।
রয়িং পিশঙ্গং বহুলং পুরুস্পৃহং পবমানাভ্যর্ষসি ॥২১॥

107.22

মৃজানো বারে পবমানো অব্যয়ে বৃষাব চক্রদো বনে ।
দেবানাং সোম পবমান নিষ্কৃতং গোভিরঞ্জানো অর্ষসি ॥২২॥

107.23

পবস্ব বাজসাতয়েঽভি বিশ্বানি কাব্যা ।
ত্বং সমুদ্রং প্রথমো বি ধারয়ো দেবেভ্যঃ সোম মত্সরঃ ॥২৩॥

107.24

স তূ পবস্ব পরি পার্থিবং রজো দিব্যা চ সোম ধর্মভিঃ ।
ত্বাং বিপ্রাসো মতিভির্বিচক্ষণ শুভ্রং হিন্বন্তি ধীতিভিঃ ॥২৪॥

107.25

পবমানা অসৃক্ষত পবিত্রমতি ধারয়া ।
মরুত্বন্তো মত্সরা ইন্দ্রিয়া হয়া মেধামভি প্রয়াংসি চ ॥২৫॥

107.26

অপো বসানঃ পরি কোশমর্ষতীন্দুর্হিয়ানঃ সোতৃভিঃ ।
জনয়ঞ্জ্যোতির্মন্দনা অবীবশদ্গাঃ কৃণ্বানো ন নির্ণিজম্ ॥২৬॥