সূক্ত 108

108.1

(১-১৬ ) ১-২ গৌরিবীতিঃ শাক্ত্যঃ; ৩,১৪-১৬ শক্তির্বাসিষ্ঠঃ,৪-৫ ঊরূরাঙ্গিরসঃ,৬-৭ ঋজিশ্বা ভারদ্বাজঃ, ৮-৯ ঊর্ধ্বসদ্মা আঙ্গিরসঃ, ১০-১১ কৃতয়শা আঙ্গিরসঃ,১২-১৩ ঋণচয়ো রাজর্ষিঃ । পবমানঃ সোমঃ । কাকুভঃ প্রগাথঃ=( বিষমা ককুপ্ , সমা সতোবৃহতী ) , ১৩ যবমধ্যা গায়ত্রী ।

পবস্ব মধুমত্তম ইন্দ্রায় সোম ক্রতুবিত্তমো মদঃ । মহি দ্যুক্ষতমো মদঃ ॥১॥

108.2

যস্য তে পীত্বা বৃষভো বৃষায়তেঽস্য পীতা স্বর্বিদঃ ।
স সুপ্রকেতো অভ্যক্রমীদিষোঽচ্ছা বাজং নৈতশঃ ॥২॥

108.3

ত্বং হ্য১ঙ্গ দৈব্যা পবমান জনিমানি দ্যুমত্তমঃ । অমৃতত্বায় ঘোষয়ঃ ॥৩॥

108.4

যেনা নবগ্বো দধ্যঙ্ঙপোর্ণুতে যেন বিপ্রাস আপিরে ।
দেবানাং সুম্নে অমৃতস্য চারুণো যেন শ্রবাংস্যানশুঃ ॥৪॥

108.5

এষ স্য ধারয়া সুতোঽব্যো বারেভিঃ পবতে মদিন্তমঃ । ক্রীলন্নূর্মিরপামিব ॥৫॥

108.6

য উস্রিয়া অপ্যা অন্তরশ্মনো নির্গা অকৃন্তদোজসা ।
অভি ব্রজং তত্নিষে গব্যমশ্ব্যং বর্মীব ধৃষ্ণবা রুজ ॥৬॥

108.7

আ সোতা পরি ষিঞ্চতাঽশ্বং ন স্তোমমপ্তুরং রজস্তুরম্ । বনক্রক্ষমুদপ্রুতম্ ॥৭॥

108.8

সহস্রধারং বৃষভং পয়োবৃধং প্রিয়ং দেবায় জন্মনে ।
ঋতেন য ঋতজাতো বিবাবৃধে রাজা দেব ঋতং বৃহৎ ॥৮॥

108.9

অভি দ্যুম্নং বৃহদ্যশ ইষস্পতে দিদীহি দেব দেবয়ুঃ । বি কোশং মধ্যমং যুব ॥৯॥

108.10

আ বচ্যস্ব সুদক্ষ চম্বোঃ সুতো বিশাং বহ্নির্ন বিশ্পতিঃ ।
বৃষ্টিং দিবঃ পবস্ব রীতিমপাং জিন্বা গবিষ্টয়ে ধিয়ঃ ॥১০॥

108.11

এতমু ত্যং মদচ্যুতং সহস্রধারং বৃষভং দিবো দুহুঃ । বিশ্বা বসূনি বিভ্রতম্ ॥১১॥

108.12

বৃষা বি জজ্ঞে জনয়ন্নমর্ত্যঃ প্রতপঞ্জ্যোতিষা তমঃ ।
স সুষ্টুতঃ কবিভির্নির্ণিজং দধে ত্রিধাত্বস্য দংসসা ॥১২॥

108.13

স সুন্বে যো বসূনাং যো রায়ামানেতা য ইলানাম্ । সোমো যঃ সুক্ষিতীনাম্ ॥১৩॥

108.14

যস্য ন ইন্দ্রঃ পিবাদ্যস্য মরুতো যস্য বার্যমণা ভগঃ ।
আ যেন মিত্রাবরুণা করামহ এন্দ্রমবসে মহে ॥১৪॥

108.15

ইন্দ্রায় সোম পাতবে নৃভির্যতঃ স্বায়ুধো মদিন্তমঃ । পবস্ব মধুমত্তমঃ ॥১৫॥

108.16

ইন্দ্রস্য হার্দি সোমধানমা বিশ সমুদ্রমিব সিন্ধবঃ ।
জুষ্টো মিত্রায় বরুণায় বায়বে দিবো বিষ্টম্ভ উত্তমঃ ॥১৬॥