Sukta 107

107.1

26 saptarshayah ( 1 bharadvajo barhaspatyah, 2 kashyapo marichah, 3 gotamo rahuganah, 4 bhaumotrih, 5 vishvamitro gathinah, 6 jamadagnirbhargavah, 7 maitravarunirvasishthah ), pavamanah somah, pragathah= (1, 4, 6, 8, 9, 10, 12, 14, 17 brihati; 2, 5, 7, 11, 13, 15, 18 satobrihati, ) 3, 16 dvipada virat ; 19-26 pragathah= ( vishama brihati, sama satobrihati )

परी॒तो षि॑ञ्चता सु॒तं सोमो॒ य उ॑त्त॒मं ह॒विः ।
द॒ध॒न्वाँ यो नर्यो॑ अ॒प्स्व१न्तरा सु॒षाव॒ सोम॒मद्रि॑भिः ॥१॥

Parito shinchata sutam somo ya uttamam havih
Dadhanvam yo naryo apsva1ntara sushava somamadribhih

107.2

नू॒नं पु॑ना॒नोऽवि॑भि॒ः परि॑ स्र॒वाऽद॑ब्धः सुर॒भिन्त॑रः ।
सु॒ते चि॑त्त्वा॒प्सु म॑दामो॒ अन्ध॑सा श्री॒णन्तो॒ गोभि॒रुत्त॑रम् ॥२॥

Nunam punanovibhih pari sravadabdhah surabhintarah
Sute chittvapsu madamo andhasa shrinanto gobhiruttaram

107.3

परि॑ सुवा॒नश्चक्ष॑से देव॒माद॑न॒ः क्रतु॒रिन्दु॑र्विचक्ष॒णः ॥३॥

Pari suvanashchakshase devamadanah kraturindurvichakshanah

107.4

पु॒ना॒नः सो॑म॒ धार॑या॒ऽपो वसा॑नो अर्षसि ।
आ र॑त्न॒धा योनि॑मृ॒तस्य॑ सीद॒स्युत्सो॑ देव हिर॒ण्यय॑ः ॥४॥

Punanah soma dharayapo vasano arshasi
A ratnadha yonimritasya sidasyutso deva hiranyayah

107.5

दु॒हा॒न ऊध॑र्दि॒व्यं मधु॑ प्रि॒यं प्र॒त्नं स॒धस्थ॒मास॑दत् ।
आ॒पृच्छ्यं॑ ध॒रुणं॑ वा॒ज्य॑र्षति॒ नृभि॑र्धू॒तो वि॑चक्ष॒णः ॥५॥

Duhana udhardivyam madhu priyam pratnam sadhasthamasadat
Aprichchhyam dharunam vajyarshati nribhirdhuto vichakshanah

107.6

पु॒ना॒नः सो॑म॒ जागृ॑वि॒रव्यो॒ वारे॒ परि॑ प्रि॒यः ।
त्वं विप्रो॑ अभ॒वोऽङ्गि॑रस्तमो॒ मध्वा॑ य॒ज्ञं मि॑मिक्ष नः ॥६॥

Punanah soma jagriviravyo vare pari priyah
Tvam vipro abhavongirastamo madhva yagyam mimiksha nah

107.7

सोमो॑ मी॒ढ्वान्प॑वते गातु॒वित्त॑म॒ ऋषि॒र्विप्रो॑ विचक्ष॒णः ।
त्वं क॒विर॑भवो देव॒वीत॑म॒ आ सूर्यं॑ रोहयो दि॒वि ॥७॥

Somo midhvanpavate gatuvittama rishirvipro vichakshanah
Tvam kavirabhavo devavitama a suryam rohayo divi

107.8

सोम॑ उ षुवा॒णः सो॒तृभि॒रधि॒ ष्णुभि॒रवी॑नाम् ।
अश्व॑येव ह॒रिता॑ याति॒ धार॑या म॒न्द्रया॑ याति॒ धार॑या ॥८॥

Soma u shuvanah sotribhiradhi shnubhiravinam
Ashvayeva harita yati dharaya mandraya yati dharaya

107.9

अ॒नू॒पे गोमा॒न्गोभि॑रक्षा॒ः सोमो॑ दु॒ग्धाभि॑रक्षाः ।
स॒मु॒द्रं न सं॒वर॑णान्यग्मन्म॒न्दी मदा॑य तोशते ॥९॥

Anupe gomangobhirakshah somo dugdhabhirakshah
Samudram na sanvarananyagmanmandi madaya toshate

107.10

आ सो॑म सुवा॒नो अद्रि॑भिस्ति॒रो वारा॑ण्य॒व्यया॑ ।
जनो॒ न पु॒रि च॒म्वो॑र्विश॒द्धरि॒ः सदो॒ वने॑षु दधिषे ॥१०॥

A soma suvano adribhistiro varanyavyaya
Jano na puri chamvorvishaddharih sado vaneshu dadhishe

107.11

स मा॑मृजे ति॒रो अण्वा॑नि मे॒ष्यो॑ मी॒ळ्हे सप्ति॒र्न वा॑ज॒युः ।
अ॒नु॒माद्य॒ः पव॑मानो मनी॒षिभि॒ः सोमो॒ विप्रे॑भि॒ॠक्व॑भिः ॥११॥

Sa mamrije tiro anvani meshyo milhe saptirna vajayuh
Anumadyah pavamano manishibhih somo viprebhirikvabhih

107.12

प्र सो॑म दे॒ववी॑तये॒ सिन्धु॒र्न पि॑प्ये॒ अर्ण॑सा ।
अं॒शोः पय॑सा मदि॒रो न जागृ॑वि॒रच्छा॒ कोशं॑ मधु॒श्चुत॑म् ॥१२॥

Pra soma devavitaye sindhurna pipye arnasa
Anshoh payasa madiro na jagrivirachchha kosham madhushchutam

107.13

आ ह॑र्य॒तो अर्जु॑ने॒ अत्के॑ अव्यत प्रि॒यः सू॒नुर्न मर्ज्य॑ः ।
तमीं॑ हिन्वन्त्य॒पसो॒ यथा॒ रथं॑ न॒दीष्वा गभ॑स्त्योः ॥१३॥

A haryato arjune atke avyata priyah sunurna marjyah
Tamim hinvantyapaso yatha ratham nadishva gabhastyoh

107.14

अ॒भि सोमा॑स आ॒यव॒ः पव॑न्ते॒ मद्यं॒ मद॑म् ।
स॒मु॒द्रस्याधि॑ वि॒ष्टपि॑ मनी॒षिणो॑ मत्स॒रास॑ः स्व॒र्विद॑ः ॥१४॥

Abhi somasa ayavah pavante madyam madam
Samudrasyadhi vishtapi manishino matsarasah svarvidah

107.15

तर॑त्समु॒द्रं पव॑मान ऊ॒र्मिणा॒ राजा॑ दे॒व ऋ॒तं बृ॒हत् ।
अर्ष॑न्मि॒त्रस्य॒ वरु॑णस्य॒ धर्म॑णा॒ प्र हि॑न्वा॒न ऋ॒तं बृ॒हत् ॥१५॥

Taratsamudram pavamana urmina raja deva ritam brihat
Arshanmitrasya varunasya dharmana pra hinvana ritam brihat

107.16

नृभि॑र्येमा॒नो ह॑र्य॒तो वि॑चक्ष॒णो राजा॑ दे॒वः स॑मु॒द्रिय॑ः ॥१६॥

Nribhiryemano haryato vichakshano raja devah samudriyah

107.17

इन्द्रा॑य पवते॒ मद॒ः सोमो॑ म॒रुत्व॑ते सु॒तः । स॒हस्र॑धारो॒ अत्यव्य॑मर्षति॒ तमी॑ मृजन्त्या॒यव॑ः ॥१७॥

Indraya pavate madah somo marutvate sutah, sahasradharo atyavyamarshati tami mrijantyayavah

107.18

पु॒ना॒नश्च॒मू ज॒नय॑न्म॒तिं क॒विः सोमो॑ दे॒वेषु॑ रण्यति ।
अ॒पो वसा॑न॒ः परि॒ गोभि॒रुत्त॑र॒ः सीद॒न्वने॑ष्वव्यत ॥१८॥

Punanashchamu janayanmatim kavih somo deveshu ranyati
Apo vasanah pari gobhiruttarah sidanvaneshvavyata

107.19

तवा॒हं सो॑म रारण स॒ख्य इ॑न्दो दि॒वेदि॑वे ।
पु॒रूणि॑ बभ्रो॒ नि च॑रन्ति॒ मामव॑ परि॒धीँरति॒ ताँ इ॑हि ॥१९॥

Tavaham soma rarana sakhya indo divedive
Puruni babhro ni charanti mamava paridhinrati tam ihi

107.20

उ॒ताहं नक्त॑मु॒त सो॑म ते॒ दिवा॑ स॒ख्याय॑ बभ्र॒ ऊध॑नि ।
घृ॒णा तप॑न्त॒मति॒ सूर्यं॑ प॒रः श॑कु॒ना इ॑व पप्तिम ॥२०॥

Utaham naktamuta soma te diva sakhyaya babhra udhani
Ghrina tapantamati suryam parah shakuna iva paptima

107.21

मृ॒ज्यमा॑नः सुहस्त्य समु॒द्रे वाच॑मिन्वसि ।
र॒यिं पि॒शङ्गं॑ बहु॒लं पु॑रु॒स्पृहं॒ पव॑माना॒भ्य॑र्षसि ॥२१॥

Mrijyamanah suhastya samudre vachaminvasi
Rayim pishangam bahulam puruspriham pavamanabhyarshasi

107.22

मृ॒जा॒नो वारे॒ पव॑मानो अ॒व्यये॒ वृषाव॑ चक्रदो॒ वने॑ ।
दे॒वानां॑ सोम पवमान निष्कृ॒तं गोभि॑रञ्जा॒नो अ॑र्षसि ॥२२॥

Mrijano vare pavamano avyaye vrishava chakrado vane
Devanam soma pavamana nishkritam gobhiranjano arshasi

107.23

पव॑स्व॒ वाज॑सातये॒ऽभि विश्वा॑नि॒ काव्या॑ ।
त्वं स॑मु॒द्रं प्र॑थ॒मो वि धा॑रयो दे॒वेभ्य॑ः सोम मत्स॒रः ॥२३॥

Pavasva vajasatayebhi vishvani kavya
Tvam samudram prathamo vi dharayo devebhyah soma matsarah

107.24

स तू प॑वस्व॒ परि॒ पार्थि॑वं॒ रजो॑ दि॒व्या च॑ सोम॒ धर्म॑भिः ।
त्वां विप्रा॑सो म॒तिभि॑र्विचक्षण शु॒भ्रं हि॑न्वन्ति धी॒तिभि॑ः ॥२४॥

Sa tu pavasva pari parthivam rajo divya cha soma dharmabhih
Tvam vipraso matibhirvichakshana shubhram hinvanti dhitibhih

107.25

पव॑माना असृक्षत प॒वित्र॒मति॒ धार॑या ।
म॒रुत्व॑न्तो मत्स॒रा इ॑न्द्रि॒या हया॑ मे॒धाम॒भि प्रयां॑सि च ॥२५॥

Pavamana asrikshata pavitramati dharaya
Marutvanto matsara indriya haya medhamabhi prayansi cha

107.26

अ॒पो वसा॑न॒ः परि॒ कोश॑मर्ष॒तीन्दु॑र्हिया॒नः सो॒तृभि॑ः ।
ज॒नय॒ञ्ज्योति॑र्म॒न्दना॑ अवीवश॒द्गाः कृ॑ण्वा॒नो न नि॒र्णिज॑म् ॥२६॥

Apo vasanah pari koshamarshatindurhiyanah sotribhih
Janayanjyotirmandana avivashadgah krinvano na nirnijam