Sukta 106

106.1

((14) 1-3, 10-14 agnishchakshushah, 4-6 chakshurmanavah, 7-9 manurapsavah, pavamanah somah, ushnik

इन्द्र॒मच्छ॑ सु॒ता इ॒मे वृष॑णं यन्तु॒ हर॑यः । श्रु॒ष्टी जा॒तास॒ इन्द॑वः स्व॒र्विद॑ः ॥१॥

Indramachchha suta ime vrishanam yantu harayah, shrushti jatasa indavah svarvidah

अ॒यं भरा॑य सान॒सिरिन्द्रा॑य पवते सु॒तः । सोमो॒ जैत्र॑स्य चेतति॒ यथा॑ वि॒दे ॥२॥

Ayam bharaya sanasirindraya pavate sutah, somo jaitrasya chetati yatha vide

अ॒स्येदिन्द्रो॒ मदे॒ष्वा ग्रा॒भं गृ॑भ्णीत सान॒सिम् । वज्रं॑ च॒ वृष॑णं भर॒त्सम॑प्सु॒जित् ॥३॥

Asyedindro madeshva grabham gribhnita sanasim, vajram cha vrishanam bharatsamapsujit

प्र ध॑न्वा सोम॒ जागृ॑वि॒रिन्द्रा॑येन्दो॒ परि॑ स्रव । द्यु॒मन्तं॒ शुष्म॒मा भ॑रा स्व॒र्विद॑म् ॥४॥

Pra dhanva soma jagrivirindrayendo pari srava, dyumantam shushmama bhara svarvidam

इन्द्रा॑य॒ वृष॑णं॒ मदं॒ पव॑स्व वि॒श्वद॑र्शतः । स॒हस्र॑यामा पथि॒कृद्वि॑चक्ष॒णः ॥५॥

Indraya vrishanam madam pavasva vishvadarshatah, sahasrayama pathikridvichakshanah

अ॒स्मभ्यं॑ गातु॒वित्त॑मो दे॒वेभ्यो॒ मधु॑मत्तमः । स॒हस्रं॑ याहि प॒थिभि॒ः कनि॑क्रदत् ॥६॥

Asmabhyam gatuvittamo devebhyo madhumattamah, sahasram yahi pathibhih kanikradat

पव॑स्व दे॒ववी॑तय॒ इन्दो॒ धारा॑भि॒रोज॑सा । आ क॒लशं॒ मधु॑मान्त्सोम नः सदः ॥७॥

Pavasva devavitaya indo dharabhirojasa, a kalasham madhumantsoma nah sadah

तव॑ द्र॒प्सा उ॑द॒प्रुत॒ इन्द्रं॒ मदा॑य वावृधुः । त्वां दे॒वासो॑ अ॒मृता॑य॒ कं प॑पुः ॥८॥

Tava drapsa udapruta indram madaya vavridhuh, tvam devaso amritaya kam papuh

आ न॑ः सुतास इन्दवः पुना॒ना धा॑वता र॒यिम् । वृ॒ष्टिद्या॑वो रीत्यापः स्व॒र्विद॑ः ॥९॥

A nah sutasa indavah punana dhavata rayim, vrishtidyavo rityapah svarvidah

सोम॑ः पुना॒न ऊ॒र्मिणाऽव्यो॒ वारं॒ वि धा॑वति । अग्रे॑ वा॒चः पव॑मान॒ः कनि॑क्रदत् ॥१०॥

Somah punana urminavyo varam vi dhavati, agre vachah pavamanah kanikradat

धी॒भिर्हि॑न्वन्ति वा॒जिनं॒ वने॒ क्रीळ॑न्त॒मत्य॑विम् । अ॒भि त्रि॑पृ॒ष्ठं म॒तय॒ः सम॑स्वरन् ॥११॥

Dhibhirhinvanti vajinam vane krilantamatyavim, abhi triprishtham matayah samasvaran

अस॑र्जि क॒लशाँ॑ अ॒भि मी॒ळ्हे सप्ति॒र्न वा॑ज॒युः । पु॒ना॒नो वाचं॑ ज॒नय॑न्नसिष्यदत् ॥१२॥

Asarji kalasham abhi milhe saptirna vajayuh, punano vacham janayannasishyadat

पव॑ते हर्य॒तो हरि॒रति॒ ह्वरां॑सि॒ रंह्या॑ । अ॒भ्यर्ष॑न्त्स्तो॒तृभ्यो॑ वी॒रव॒द्यश॑ः ॥१३॥

Pavate haryato harirati hvaransi ranhya, abhyarshantstotribhyo viravadyashah

अ॒या प॑वस्व देव॒युर्मधो॒र्धारा॑ असृक्षत । रेभ॑न्प॒वित्रं॒ पर्ये॑षि वि॒श्वत॑ः ॥१४॥

Aya pavasva devayurmadhordhara asrikshata, rebhanpavitram paryeshi vishvatah