সূক্ত 106

106.1

((১৪) ১-৩, ১০-১৪ অগ্নিশ্চাক্ষুষঃ, ৪-৬ চক্ষুর্মানবঃ, ৭-৯ মনুরাপ্সবঃ । পবমানঃ সোমঃ । উষ্ণিক্ ।

ইন্দ্রমচ্ছ সুতা ইমে বৃষণং যন্তু হরয়ঃ । শ্রুষ্টী জাতাস ইন্দবঃ স্বর্বিদঃ ॥১॥

অয়ং ভরায় সানসিরিন্দ্রায় পবতে সুতঃ । সোমো জৈত্রস্য চেততি যথা বিদে ॥২॥

অস্যেদিন্দ্রো মদেষ্বা গ্রাভং গৃভ্ণীত সানসিম্ । বজ্রং চ বৃষণং ভরত্সমপ্সুজিৎ ॥৩॥

প্র ধন্বা সোম জাগৃবিরিন্দ্রায়েন্দো পরি স্রব । দ্যুমন্তং শুষ্মমা ভরা স্বর্বিদম্ ॥৪॥

ইন্দ্রায় বৃষণং মদং পবস্ব বিশ্বদর্শতঃ । সহস্রয়ামা পথিকৃদ্বিচক্ষণঃ ॥৫॥

অস্মভ্যং গাতুবিত্তমো দেবেভ্যো মধুমত্তমঃ । সহস্রং যাহি পথিভিঃ কনিক্রদৎ ॥৬॥

পবস্ব দেববীতয় ইন্দো ধারাভিরোজসা । আ কলশং মধুমান্ত্সোম নঃ সদঃ ॥৭॥

তব দ্রপ্সা উদপ্রুত ইন্দ্রং মদায় বাবৃধুঃ । ত্বাং দেবাসো অমৃতায় কং পপুঃ ॥৮॥

আ নঃ সুতাস ইন্দবঃ পুনানা ধাবতা রয়িম্ । বৃষ্টিদ্যাবো রীত্যাপঃ স্বর্বিদঃ ॥৯॥

সোমঃ পুনান ঊর্মিণাঽব্যো বারং বি ধাবতি । অগ্রে বাচঃ পবমানঃ কনিক্রদৎ ॥১০॥

ধীভির্হিন্বন্তি বাজিনং বনে ক্রীলন্তমত্যবিম্ । অভি ত্রিপৃষ্ঠং মতয়ঃ সমস্বরন্ ॥১১॥

অসর্জি কলশাঁ অভি মীল্হে সপ্তির্ন বাজয়ুঃ । পুনানো বাচং জনয়ন্নসিষ্যদৎ ॥১২॥

পবতে হর্যতো হরিরতি হ্বরাংসি রংহ্যা । অভ্যর্ষন্ত্স্তোতৃভ্যো বীরবদ্যশঃ ॥১৩॥

অয়া পবস্ব দেবয়ুর্মধোর্ধারা অসৃক্ষত । রেভন্পবিত্রং পর্যেষি বিশ্বতঃ ॥১৪॥