সূক্ত 82

82.1

৯ কুসীদী কাণ্বঃ। ইন্দ্রঃ । গায়ত্রী ।

আ প্র দ্রব পরাবতোঽর্বাবতশ্চ বৃত্রহন্ । মধ্বঃ প্রতি প্রভর্মণি ॥১॥

82.2

তীব্রাঃ সোমাস আ গহি সুতাসো মাদয়িষ্ণবঃ । পিবা দধৃগ্যথোচিষে ॥২॥

82.3

ইষা মন্দস্বাদু তেঽরং বরায় মন্যবে । ভুবত্ত ইন্দ্র শং হৃদে ॥৩॥

82.4

আ ত্বশত্রবা গহি ন্যু১ক্থানি চ হূয়সে । উপমে রোচনে দিবঃ ॥৪॥

82.5

তুভ্যায়মদ্রিভিঃ সুতো গোভিঃ শ্রীতো মদায় কম্ । প্র সোম ইন্দ্র হূয়তে ॥৫॥

82.6

ইন্দ্র শ্রুধি সু মে হবমস্মে সুতস্য গোমতঃ । বি পীতিং তৃপ্তিমশ্নুহি ॥৬॥

82.7

য ইন্দ্র চমসেষ্বা সোমশ্চমূষু তে সুতঃ । পিবেদস্য ত্বমীশিষে ॥৭॥

82.8

যো অপ্সু চন্দ্রমা ইব সোমশ্চমূষু দদৃশে । পিবেদস্য ত্বমীশিষে ॥৮॥

82.9

যং তে শ্যেনঃ পদাভরত্তিরো রজাংস্যস্পৃতম্ । পিবেদস্য ত্বমীশিষে ॥৯॥