সূক্ত 62

62.1

১২ প্রগাথো ঘৌরঃ কাণ্বঃ। ইন্দ্রঃ । পংক্তিঃ , ৭-৯ বৃহতী ।

প্রো অস্মা উপস্তুতিং ভরতা যজ্জুজোষতি ।
উক্থৈরিন্দ্রস্য মাহিনং বয়ো বর্ধন্তি সোমিনো ভদ্রা ইন্দ্রস্য রাতয়ঃ ॥১॥

62.2

অয়ুজো অসমো নৃভিরেকঃ কৃষ্টীরয়াস্যঃ । পূর্বীরতি প্র বাবৃধে বিশ্বা জাতান্যোজসা ভদ্রা ইন্দ্রস্য রাতয়ঃ ॥২॥

62.3

অহিতেন চিদর্বতা জীরদানুঃ সিষাসতি । প্রবাচ্যমিন্দ্র তত্তব বীর্যাণি করিষ্যতো ভদ্রা ইন্দ্রস্য রাতয়ঃ ॥৩॥

62.4

আ যাহি কৃণবাম ত ইন্দ্র ব্রহ্মাণি বর্ধনা ।
যেভিঃ শবিষ্ঠ চাকনো ভদ্রমিহ শ্রবস্যতে ভদ্রা ইন্দ্রস্য রাতয়ঃ ॥৪॥

62.5

ধৃষতশ্চিদ্ধৃষন্মনঃ কৃণোষীন্দ্র যত্ত্বম্ । তীব্রৈঃ সোমৈঃ সপর্যতো নমোভিঃ প্রতিভূষতো ভদ্রা ইন্দ্রস্য রাতয়ঃ ॥৫॥

62.6

অব চষ্ট ঋচীষমোঽবতাঁ ইব মানুষঃ । জুষ্ট্বী দক্ষস্য সোমিনঃ সখায়ং কৃণুতে যুজং ভদ্রা ইন্দ্রস্য রাতয়ঃ ॥৬॥

62.7

বিশ্বে ত ইন্দ্র বীর্যং দেবা অনু ক্রতুং দদুঃ । ভুবো বিশ্বস্য গোপতিঃ পুরুষ্টুত ভদ্রা ইন্দ্রস্য রাতয়ঃ ॥৭॥

62.8

গৃণে তদিন্দ্র তে শব উপমং দেবতাতয়ে । যদ্ধংসি বৃত্রমোজসা শচীপতে ভদ্রা ইন্দ্রস্য রাতয়ঃ ॥৮॥

62.9

সমনেব বপুষ্যতঃ কৃণবন্মানুষা যুগা । বিদে তদিন্দ্রশ্চেতনমধ শ্রুতো ভদ্রা ইন্দ্রস্য রাতয়ঃ ॥৯॥

62.10

উজ্জাতমিন্দ্র তে শব উত্ত্বামুত্তব ক্রতুম্ । ভূরিগো ভূরি বাবৃধুর্মঘবন্তব শর্মণি ভদ্রা ইন্দ্রস্য রাতয়ঃ ॥১০॥

62.11

অহং চ ত্বং চ বৃত্রহন্ত্সং যুজ্যাব সনিভ্য আ ।
অরাতীবা চিদদ্রিবোঽনু নৌ শূর মংসতে ভদ্রা ইন্দ্রস্য রাতয়ঃ ॥১১॥

62.12

সত্যমিদ্বা উ তং বয়মিন্দ্রং স্তবাম নানৃতম্ ।
মহাঁ অসুন্বতো বধো ভূরি জ্যোতীংষি সুন্বতো ভদ্রা ইন্দ্রস্য রাতয়ঃ ॥১২॥