সূক্ত 61

61.1

১৮ ভর্গঃ প্রাগাথঃ । ইন্দ্রঃ । প্রগাথঃ= ( বিষমা বৃহতী, সমা সতোবৃহতী, ) ১৭ শংকুমতী ।

উভয়ং শৃণবচ্চ ন ইন্দ্রো অর্বাগিদং বচঃ । সত্রাচ্যা মঘবা সোমপীতয়ে ধিয়া শবিষ্ঠ আ গমৎ ॥১॥

61.2

তং হি স্বরাজং বৃষভং তমোজসে ধিষণে নিষ্টতক্ষতুঃ । উতোপমানাং প্রথমো নি ষীদসি সোমকামং হি তে মনঃ ॥২॥

61.3

আ বৃষস্ব পুরূবসো সুতস্যেন্দ্রান্ধসঃ । বিদ্মা হি ত্বা হরিবঃ পৃত্সু সাসহিমধৃষ্টং চিদ্দধৃষ্বণিম্ ॥৩॥

61.4

অপ্রামিসত্য মঘবন্তথেদসদিন্দ্র ক্রত্বা যথা বশঃ । সনেম বাজং তব শিপ্রিন্নবসা মক্ষূ চিদ্যন্তো অদ্রিবঃ ॥৪॥

61.5

শগ্ধ্যূ৩ ষু শচীপত ইন্দ্র বিশ্বাভিরূতিভিঃ । ভগং ন হি ত্বা যশসং বসুবিদমনু শূর চরামসি ॥৫॥

61.6

পৌরো অশ্বস্য পুরুকৃদ্গবামস্যুত্সো দেব হিরণ্যয়ঃ । নকির্হি দানং পরিমর্ধিষত্ত্বে যদ্যদ্যামি তদা ভর ॥৬॥

61.7

ত্বং হ্যেহি চেরবে বিদা ভগং বসুত্তয়ে । উদ্বাবৃষস্ব মঘবন্গবিষ্টয় উদিন্দ্রাশ্বমিষ্টয়ে ॥৭॥

61.8

ত্বং পুরূ সহস্রাণি শতানি চ যূথা দানায় মংহসে । আ পুরংদরং চকৃম বিপ্রবচস ইন্দ্রং গায়ন্তোঽবসে ॥৮॥

61.9

অবিপ্রো বা যদবিধদ্বিপ্রো বেন্দ্র তে বচঃ । স প্র মমন্দত্ত্বায়া শতক্রতো প্রাচামন্যো অহংসন ॥৯॥

61.10

উগ্রবাহুর্ম্রক্ষকৃত্বা পুরংদরো যদি মে শৃণবদ্ধবম্ । বসূয়বো বসুপতিং শতক্রতুং স্তোমৈরিন্দ্রং হবামহে ॥১০॥

61.11

ন পাপাসো মনামহে নারায়াসো ন জল্হবঃ । যদিন্ন্বিন্দ্রং বৃষণং সচা সুতে সখায়ং কৃণবামহৈ ॥১১॥

61.12

উগ্রং যুয়ুজ্ম পৃতনাসু সাসহিমৃণকাতিমদাভ্যম্ । বেদা ভৃমং চিত্সনিতা রথীতমো বাজিনং যমিদূ নশৎ ॥১২॥

61.13

যত ইন্দ্র ভয়ামহে ততো নো অভয়ং কৃধি । মঘবঞ্ছগ্ধি তব তন্ন ঊতিভির্বি দ্বিষো বি মৃধো জহি ॥১৩॥

61.14

ত্বং হি রাধস্পতে রাধসো মহঃ ক্ষয়স্যাসি বিধতঃ । তং ত্বা বয়ং মঘবন্নিন্দ্র গির্বণঃ সুতাবন্তো হবামহে ॥১৪॥

61.15

ইন্দ্রঃ স্পলুত বৃত্রহা পরস্পা নো বরেণ্যঃ । স নো রক্ষিষচ্চরমং স মধ্যমং স পশ্চাত্পাতু নঃ পুরঃ ॥১৫॥

61.16

ত্বং নঃ পশ্চাদধরাদুত্তরাত্পুর ইন্দ্র নি পাহি বিশ্বতঃ । আরে অস্মত্কৃণুহি দৈব্যং ভয়মারে হেতীরদেবীঃ ॥১৬॥

61.17

অদ্যাদ্যা শ্বঃশ্ব ইন্দ্র ত্রাস্ব পরে চ নঃ । বিশ্বা চ নো জরিতৄন্ত্সত্পতে অহা দিবা নক্তং চ রক্ষিষঃ ॥১৭॥

61.18

প্রভঙ্গী শূরো মঘবা তুবীমঘঃ সম্মিশ্লো বির্যায় কম্ ।
উভা তে বাহূ বৃষণা শতক্রতো নি যা বজ্রং মিমিক্ষতুঃ ॥১৮॥