সূক্ত 60

60.1

২০ ভর্গঃ প্রাগাথঃ । অগ্নিঃ । প্রগাথঃ= ( বিষমা বৃহতী, সমা সতোবৃহতী ) ।

অগ্ন আ যাহ্যগ্নিভির্হোতারং ত্বা বৃণীমহে । আ ত্বামনক্তু প্রয়তা হবিষ্মতী যজিষ্ঠং বর্হিরাসদে ॥১॥

অচ্ছা হি ত্বা সহসঃ সূনো অঙ্গিরঃ স্রুচশ্চরন্ত্যধ্বরে । ঊর্জো নপাতং ঘৃতকেশমীমহেঽগ্নিং যজ্ঞেষু পূর্ব্যম্ ॥২॥

অগ্নে কবির্বেধা অসি হোতা পাবক যক্ষ্যঃ । মন্দ্রো যজিষ্ঠো অধ্বরেষ্বীড্যো বিপ্রেভিঃ শুক্র মন্মভিঃ ॥৩॥

অদ্রোঘমা বহোশতো যবিষ্ঠ্য দেবাঁ অজস্র বীতয়ে । অভি প্রয়াংসি সুধিতা বসো গহি মন্দস্ব ধীতিভির্হিতঃ ॥৪॥

ত্বমিত্সপ্রথা অস্যগ্নে ত্রাতৠতস্কবিঃ । ত্বাং বিপ্রাসঃ সমিধান দীদিব আ বিবাসন্তি বেধসঃ ॥৫॥

শোচা শোচিষ্ঠ দীদিহি বিশে ময়ো রাস্ব স্তোত্রে মহাঁ অসি ।
দেবানাং শর্মন্মম সন্তু সূরয়ঃ শত্রূষাহঃ স্বগ্নয়ঃ ॥৬॥

যথা চিদ্বৃদ্ধমতসমগ্নে সংজূর্বসি ক্ষমি । এবা দহ মিত্রমহো যো অস্মধ্রুগ্দুর্মন্মা কশ্চ বেনতি ॥৭॥

মা নো মর্তায় রিপবে রক্ষস্বিনে মাঘশংসায় রীরধঃ । অস্রেধদ্ভিস্তরণিভির্যবিষ্ঠ্য শিবেভিঃ পাহি পায়ুভিঃ ॥৮॥

পাহি নো অগ্ন একয়া পাহ্যু১ত দ্বিতীয়য়া । পাহি গীর্ভিস্তিসৃভিরূর্জাং পতে পাহি চতসৃভির্বসো ॥৯॥

পাহি বিশ্বস্মাদ্রক্ষসো অরাব্ণঃ প্র স্ম বাজেষু নোঽব । ত্বামিদ্ধি নেদিষ্ঠং দেবতাতয় আপিং নক্ষামহে বৃধে ॥১০॥

আ নো অগ্নে বয়োবৃধং রয়িং পাবক শংস্যম্ । রাস্বা চ ন উপমাতে পুরুস্পৃহং সুনীতী স্বয়শস্তরম্ ॥১১॥

যেন বংসাম পৃতনাসু শর্ধতস্তরন্তো অর্য আদিশঃ ।
স ত্বং নো বর্ধ প্রয়সা শচীবসো জিন্বা ধিয়ো বসুবিদঃ ॥১২॥

শিশানো বৃষভো যথাগ্নিঃ শৃঙ্গে দবিধ্বৎ । তিগ্মা অস্য হনবো ন প্রতিধৃষে সুজম্ভঃ সহসো যহুঃ ॥১৩॥

নহি তে অগ্নে বৃষভ প্রতিধৃষে জম্ভাসো যদ্বিতিষ্ঠসে । স ত্বং নো হোতঃ সুহুতং হবিষ্কৃধি বংস্বা নো বার্যা পুরু ॥১৪॥

শেষে বনেষু মাত্রোঃ সং ত্বা মর্তাস ইন্ধতে । অতন্দ্রো হব্যা বহসি হবিষ্কৃত আদিদ্দেবেষু রাজসি ॥১৫॥

সপ্ত হোতারস্তমিদীলতে ত্বাঽগ্নে সুত্যজমহ্রয়ম্ । ভিনত্স্যদ্রিং তপসা বি শোচিষা প্রাগ্নে তিষ্ঠ জনাঁ অতি ॥১৬॥

অগ্নিমগ্নিং বো অধ্রিগুং হুবেম বৃক্তবর্হিষঃ । অগ্নিং হিতপ্রয়সঃ শশ্বতীষ্বা ঽঽহোতারং চর্ষণীনাম্ ॥১৭॥

কেতেন শর্মন্ত্সচতে সুষামণ্যগ্নে তুভ্যং চিকিত্বনা । ইষণ্যয়া নঃ পুরুরূপমা ভর বাজং নেদিষ্ঠমূতয়ে ॥১৮॥

অগ্নে জরিতর্বিশ্পতিস্তেপানো দেব রক্ষসঃ । অপ্রোষিবান্গৃহপতির্মহাঁ অসি দিবস্পায়ুর্দুরোণয়ুঃ ॥১৯॥

মা নো রক্ষ আ বেশীদাঘৃণীবসো মা যাতুর্যাতুমাবতাম্ । পরোগব্যূত্যনিরামপ ক্ষুধমগ্নে সেধ রক্ষস্বিনঃ ॥২০॥