সূক্ত 59

59.1

৭ সুপর্ণঃ কাণ্বঃ। ইন্দ্রাবরুণৌ ।জগতী ।

ইমানি বাং ভাগধেয়ানি সিস্রত ইন্দ্রাবরুণা প্র মহে সুতেষু বাম্ ।
যজ্ঞেয়জ্ঞে হ সবনা ভুরণ্যথো যত্সুন্বতে যজমানায় শিক্ষথঃ ॥১॥

59.2

নিষ্ষিধ্বরীরোষধীরাপ আস্তামিন্দ্রাবরুণা মহিমানমাশত ।
যা সিস্রতূ রজসঃ পারে অধ্বনো যয়োঃ শত্রুর্নকিরাদেব ওহতে ॥২॥

59.3

সত্যং তদিন্দ্রাবরুণা কৃশস্য বাং মধ্ব ঊর্মিং দুহতে সপ্ত বাণীঃ ।
তাভির্দাশ্বাংসমবতং শুভস্পতী যো বামদব্ধো অভি পাতি চিত্তিভিঃ ॥৩॥

59.4

ঘৃতপ্রুষঃ সৌম্যা জীরদানবঃ সপ্ত স্বসারঃ সদন ঋতস্য ।
যা হ বামিন্দ্রাবরুণা ঘৃতশ্চুতস্তাভির্ধত্তং যজমানায় শিক্ষতম্ ॥৪॥

59.5

অবোচাম মহতে সৌভগায় সত্যং ত্বেষাভ্যাং মহিমানমিন্দ্রিয়ম্ ।
অস্মান্ত্স্বিন্দ্রাবরুণা ঘৃতশ্চুতস্ত্রিভিঃ সাপ্তেভিরবতং শুভস্পতী ॥৫॥

59.6

ইন্দ্রাবরুণা যদৃষিভ্যো মনীষাং বাচো মতিং শ্রুতমদত্তমগ্রে ।
যানি স্থানান্যসৃজন্ত ধীরা যজ্ঞং তন্বানাস্তপসাভ্যপশ্যম্ ॥৬॥

59.7

ইন্দ্রাবরুণা সৌমনসমদৃপ্তং রায়স্পোষং যজমানেষু ধত্তম্ ।
প্রজাং পুষ্টিং ভূতিমস্মাসু ধত্তং দীর্ঘায়ুত্বায় প্র তিরতং ন আয়ুঃ ॥৭॥