Sukta 62

62.1

12 pragatho ghaurah kanvah, indrah, panktih, 7-9 brihati

प्रो अ॑स्मा॒ उप॑स्तुतिं॒ भर॑ता॒ यज्जुजो॑षति ।
उ॒क्थैरिन्द्र॑स्य॒ माहि॑नं॒ वयो॑ वर्धन्ति सो॒मिनो॑ भ॒द्रा इन्द्र॑स्य रा॒तय॑ः ॥१॥

Pro asma upastutim bharata yajjujoshati
Ukthairindrasya mahinam vayo vardhanti somino bhadra indrasya ratayah

अ॒यु॒जो अस॑मो॒ नृभि॒रेक॑ः कृ॒ष्टीर॒यास्य॑ः । पू॒र्वीरति॒ प्र वा॑वृधे॒ विश्वा॑ जा॒तान्योज॑सा भ॒द्रा इन्द्र॑स्य रा॒तय॑ः ॥२॥

Ayujo asamo nribhirekah krishtirayasyah, purvirati pra vavridhe vishva jatanyojasa bhadra indrasya ratayah

अहि॑तेन चि॒दर्व॑ता जी॒रदा॑नुः सिषासति । प्र॒वाच्य॑मिन्द्र॒ तत्तव॑ वी॒र्या॑णि करिष्य॒तो भ॒द्रा इन्द्र॑स्य रा॒तय॑ः ॥३॥

Ahitena chidarvata jiradanuh sishasati, pravachyamindra tattava viryani karishyato bhadra indrasya ratayah

आ या॑हि कृ॒णवा॑म त॒ इन्द्र॒ ब्रह्मा॑णि॒ वर्ध॑ना ।
येभि॑ः शविष्ठ चा॒कनो॑ भ॒द्रमि॒ह श्र॑वस्य॒ते भ॒द्रा इन्द्र॑स्य रा॒तय॑ः ॥४॥

A yahi krinavama ta indra brahmani vardhana
Yebhih shavishtha chakano bhadramiha shravasyate bhadra indrasya ratayah

धृ॒ष॒तश्चि॑द्धृ॒षन्मन॑ः कृ॒णोषी॑न्द्र॒ यत्त्वम् । ती॒व्रैः सोमै॑ः सपर्य॒तो नमो॑भिः प्रति॒भूष॑तो भ॒द्रा इन्द्र॑स्य रा॒तय॑ः ॥५॥

Dhrishatashchiddhrishanmanah krinoshindra yattvam, tivraih somaih saparyato namobhih pratibhushato bhadra indrasya ratayah

अव॑ चष्ट॒ ऋची॑षमोऽव॒ताँ इ॑व॒ मानु॑षः । जु॒ष्ट्वी दक्ष॑स्य सो॒मिन॒ः सखा॑यं कृणुते॒ युजं॑ भ॒द्रा इन्द्र॑स्य रा॒तय॑ः ॥६॥

Ava chashta richishamovatam iva manushah, jushtvi dakshasya sominah sakhayam krinute yujam bhadra indrasya ratayah

विश्वे॑ त इन्द्र वी॒र्यं॑ दे॒वा अनु॒ क्रतुं॑ ददुः । भुवो॒ विश्व॑स्य॒ गोप॑तिः पुरुष्टुत भ॒द्रा इन्द्र॑स्य रा॒तय॑ः ॥७॥

Vishve ta indra viryam deva anu kratum daduh, bhuvo vishvasya gopatih purushtuta bhadra indrasya ratayah

गृ॒णे तदि॑न्द्र ते॒ शव॑ उप॒मं दे॒वता॑तये । यद्धंसि॑ वृ॒त्रमोज॑सा शचीपते भ॒द्रा इन्द्र॑स्य रा॒तय॑ः ॥८॥

Grine tadindra te shava upamam devatataye, yaddhansi vritramojasa shachipate bhadra indrasya ratayah

सम॑नेव वपुष्य॒तः कृ॒णव॒न्मानु॑षा यु॒गा । वि॒दे तदिन्द्र॒श्चेत॑न॒मध॑ श्रु॒तो भ॒द्रा इन्द्र॑स्य रा॒तय॑ः ॥९॥

Samaneva vapushyatah krinavanmanusha yuga, vide tadindrashchetanamadha shruto bhadra indrasya ratayah

उज्जा॒तमि॑न्द्र ते॒ शव॒ उत्त्वामुत्तव॒ क्रतु॑म् । भूरि॑गो॒ भूरि॑ वावृधु॒र्मघ॑व॒न्तव॒ शर्म॑णि भ॒द्रा इन्द्र॑स्य रा॒तय॑ः ॥१०॥

Ujjatamindra te shava uttvamuttava kratum, bhurigo bhuri vavridhurmaghavantava sharmani bhadra indrasya ratayah

अ॒हं च॒ त्वं च॑ वृत्रह॒न्त्सं यु॑ज्याव स॒निभ्य॒ आ ।
अ॒रा॒ती॒वा चि॑दद्रि॒वोऽनु॑ नौ शूर मंसते भ॒द्रा इन्द्र॑स्य रा॒तय॑ः ॥११॥

Aham cha tvam cha vritrahantsam yujyava sanibhya a
Arativa chidadrivonu nau shura mansate bhadra indrasya ratayah

स॒त्यमिद्वा उ॒ तं व॒यमिन्द्रं॑ स्तवाम॒ नानृ॑तम् ।
म॒हाँ असु॑न्वतो व॒धो भूरि॒ ज्योतीं॑षि सुन्व॒तो भ॒द्रा इन्द्र॑स्य रा॒तय॑ः ॥१२॥

Satyamidva u tam vayamindram stavama nanritam
Maham asunvato vadho bhuri jyotinshi sunvato bhadra indrasya ratayah