সূক্ত 6

6.1

৪৮ বত্সঃ কাণ্ব । ইন্দ্রঃ, ৪৬ -৪৮ তিরিন্দিরঃ পার্শব্যঃ । গায়ত্রী ।

মহাঁ ইন্দ্রো য ওজসা পর্জন্যো বৃষ্টিমাঁ ইব । স্তোমৈর্বত্সস্য বাবৃধে ॥১॥

6.2

প্রজামৃতস্য পিপ্রতঃ প্র যদ্ভরন্ত বহ্নয়ঃ । বিপ্রা ঋতস্য বাহসা ॥২॥

6.3

কণ্বা ইন্দ্রং যদক্রত স্তোমৈর্যজ্ঞস্য সাধনম্ । জামি ব্রুবত আয়ুধম্ ॥৩॥

6.4

সমস্য মন্যবে বিশো বিশ্বা নমন্ত কৃষ্টয়ঃ । সমুদ্রায়েব সিন্ধবঃ ॥৪॥

6.5

ওজস্তদস্য তিত্বিষ উভে যত্সমবর্তয়ৎ । ইন্দ্রশ্চর্মেব রোদসী ॥৫॥

6.6

বি চিদ্বৃত্রস্য দোধতো বজ্রেণ শতপর্বণা । শিরো বিভেদ বৃষ্ণিনা ॥৬॥

6.7

ইমা অভি প্র ণোনুমো বিপামগ্রেষু ধীতয়ঃ । অগ্নেঃ শোচির্ন দিদ্যুতঃ ॥৭॥

6.8

গুহা সতীরুপ ত্মনা প্র যচ্ছোচন্ত ধীতয়ঃ । কণ্বা ঋতস্য ধারয়া ॥৮॥

6.9

প্র তমিন্দ্র নশীমহি রয়িং গোমন্তমশ্বিনম্ । প্র ব্রহ্ম পূর্বচিত্তয়ে ॥৯॥

6.10

অহমিদ্ধি পিতুষ্পরি মেধামৃতস্য জগ্রভ । অহং সূর্য ইবাজনি ॥১০॥

6.11

অহং প্রত্নেন মন্মনা গিরঃ শুম্ভামি কণ্ববৎ । যেনেন্দ্রঃ শুষ্মমিদ্দধে ॥১১॥

6.12

যে ত্বামিন্দ্র ন তুষ্টুবুৠষয়ো যে চ তুষ্টুবুঃ । মমেদ্বর্ধস্ব সুষ্টুতঃ ॥১২॥

6.13

যদস্য মন্যুরধ্বনীদ্বি বৃত্রং পর্বশো রুজন্ । অপঃ সমুদ্রমৈরয়ৎ ॥১৩॥

6.14

নি শুষ্ণ ইন্দ্র ধর্ণসিং বজ্রং জঘন্থ দস্যবি । বৃষা হ্যুগ্র শৃণ্বিষে ॥১৪॥

6.15

ন দ্যাব ইন্দ্রমোজসা নান্তরিক্ষাণি বজ্রিণম্ । ন বিব্যচন্ত ভূময়ঃ ॥১৫॥

6.16

যস্ত ইন্দ্র মহীরপঃ স্তভূয়মান আশয়ৎ । নি তং পদ্যাসু শিশ্নথঃ ॥১৬॥

6.17

য ইমে রোদসী মহী সমীচী সমজগ্রভীৎ । তমোভিরিন্দ্র তং গুহঃ ॥১৭॥

6.18

য ইন্দ্র যতয়স্ত্বা ভৃগবো যে চ তুষ্টুবুঃ । মমেদুগ্র শ্রুধী হবম্ ॥১৮॥

6.19

ইমাস্ত ইন্দ্র পৃশ্নয়ো ঘৃতং দুহত আশিরম্ । এনামৃতস্য পিপ্যুষীঃ ॥১৯॥

6.20

যা ইন্দ্র প্রস্বস্ত্বাঽঽসা গর্ভমচক্রিরন্ । পরি ধর্মেব সূর্যম্ ॥২০॥

6.21

ত্বামিচ্ছবসস্পতে কণ্বা উক্থেন বাবৃধুঃ । ত্বাং সুতাস ইন্দবঃ ॥২১॥

6.22

তবেদিন্দ্র প্রণীতিষূত প্রশস্তিরদ্রিবঃ । যজ্ঞো বিতন্তসায্যঃ ॥২২॥

6.23

আ ন ইন্দ্র মহীমিষং পুরং ন দর্ষি গোমতীম্ । উত প্রজাং সুবীর্যম্ ॥২৩॥

6.24

উত ত্যদাশ্বশ্ব্যং যদিন্দ্র নাহুষীষ্বা । অগ্রে বিক্ষু প্রদীদয়ৎ ॥২৪॥

6.25

অভি ব্রজং ন তত্নিষে সূর উপাকচক্ষসম্ । যদিন্দ্র মৃলয়াসি নঃ ॥২৫॥

6.26

যদঙ্গ তবিষীয়স ইন্দ্র প্ররাজসি ক্ষিতীঃ । মহাঁ অপার ওজসা ॥২৬॥

6.27

তং ত্বা হবিষ্মতীর্বিশ উপ ব্রুবত ঊতয়ে । উরুজ্রয়সমিন্দুভিঃ ॥২৭॥

6.28

উপহ্বরে গিরীণাং সংগথে চ নদীনাম্ । ধিয়া বিপ্রো অজায়ত ॥২৮॥

6.29

অতঃ সমুদ্রমুদ্বতশ্চিকিত্বাঁ অব পশ্যতি । যতো বিপান এজতি ॥২৯॥

6.30

আদিত্প্রত্নস্য রেতসো জ্যোতিষ্পশ্যন্তি বাসরম্ । পরো যদিধ্যতে দিবা ॥৩০॥

6.31

কণ্বাস ইন্দ্র তে মতিং বিশ্বে বর্ধন্তি পৌংস্যম্ । উতো শবিষ্ঠ বৃষ্ণ্যম্ ॥৩১॥

6.32

ইমাং ম ইন্দ্র সুষ্টুতিং জুষস্ব প্র সু মামব । উত প্র বর্ধয়া মতিম্ ॥৩২॥

6.33

উত ব্রহ্মণ্যা বয়ং তুভ্যং প্রবৃদ্ধ বজ্রিবঃ । বিপ্রা অতক্ষ্ম জীবসে ॥৩৩॥

6.34

অভি কণ্বা অনূষতাঽঽপো ন প্রবতা যতীঃ । ইন্দ্রং বনন্বতী মতিঃ ॥৩৪॥

6.35

ইন্দ্রমুক্থানি বাবৃধুঃ সমুদ্রমিব সিন্ধবঃ । অনুত্তমন্যুমজরম্ ॥৩৫॥

6.36

আ নো যাহি পরাবতো হরিভ্যাং হর্যতাভ্যাম্ । ইমমিন্দ্র সুতং পিব ॥৩৬॥

6.37

ত্বামিদ্বৃত্রহন্তম জনাসো বৃক্তবর্হিষঃ । হবন্তে বাজসাতয়ে ॥৩৭॥

6.38

অনু ত্বা রোদসী উভে চক্রং ন বর্ত্যেতশম্ । অনু সুবানাস ইন্দবঃ ॥৩৮॥

6.39

মন্দস্বা সু স্বর্ণর উতেন্দ্র শর্যণাবতি । মত্স্বা বিবস্বতো মতী ॥৩৯॥

6.40

বাবৃধান উপ দ্যবি বৃষা বজ্র্যরোরবীৎ । বৃত্রহা সোমপাতমঃ ॥৪০॥

6.41

ঋষির্হি পূর্বজা অস্যেক ঈশান ওজসা । ইন্দ্র চোষ্কূয়সে বসু ॥৪১॥

6.42

অস্মাকং ত্বা সুতাঁ উপ বীতপৃষ্ঠা অভি প্রয়ঃ । শতং বহন্তু হরয়ঃ ॥৪২॥

6.43

ইমাং সু পূর্ব্যাং ধিয়ং মধোর্ঘৃতস্য পিপ্যুষীম্ । কণ্বা উক্থেন বাবৃধুঃ ॥৪৩॥

6.44

ইন্দ্রমিদ্বিমহীনাং মেধে বৃণীত মর্ত্যঃ । ইন্দ্রং সনিষ্যুরূতয়ে ॥৪৪॥

6.45

অর্বাঞ্চং ত্বা পুরুষ্টুত প্রিয়মেধস্তুতা হরী । সোমপেয়ায় বক্ষতঃ ॥৪৫॥

6.46

শতমহং তিরিন্দিরে সহস্রং পর্শাবা দদে । রাধাংসি যাদ্বানাম্ ॥৪৬॥

6.47

ত্রীণি শতান্যর্বতাং সহস্রা দশ গোনাম্ । দদুষ্পজ্রায় সাম্নে ॥৪৭॥

6.48

উদানট্ ককুহো দিবমুষ্ট্রাঞ্চতুর্যুজো দদৎ । শ্রবসা যাদ্বং জনম্ ॥৪৮॥