Sukta 6

6.1

48 vatsah kanva, indrah, 46 -48 tirindirah parshavyah, gayatri

म॒हाँ इन्द्रो॒ य ओज॑सा प॒र्जन्यो॑ वृष्टि॒माँ इ॑व । स्तोमै॑र्व॒त्सस्य॑ वावृधे ॥१॥

Maham indro ya ojasa parjanyo vrishtimam iva, stomairvatsasya vavridhe

6.2

प्र॒जामृ॒तस्य॒ पिप्र॑त॒ः प्र यद्भर॑न्त॒ वह्न॑यः । विप्रा॑ ऋ॒तस्य॒ वाह॑सा ॥२॥

Prajamritasya pipratah pra yadbharanta vahnayah, vipra ritasya vahasa

6.3

कण्वा॒ इन्द्रं॒ यदक्र॑त॒ स्तोमै॑र्य॒ज्ञस्य॒ साध॑नम् । जा॒मि ब्रु॑वत॒ आयु॑धम् ॥३॥

Kanva indram yadakrata stomairyagyasya sadhanam, jami bruvata ayudham

6.4

सम॑स्य म॒न्यवे॒ विशो॒ विश्वा॑ नमन्त कृ॒ष्टय॑ः । स॒मु॒द्राये॑व॒ सिन्ध॑वः ॥४॥

Samasya manyave visho vishva namanta krishtayah, samudrayeva sindhavah

6.5

ओज॒स्तद॑स्य तित्विष उ॒भे यत्स॒मव॑र्तयत् । इन्द्र॒श्चर्मे॑व॒ रोद॑सी ॥५॥

Ojastadasya titvisha ubhe yatsamavartayat, indrashcharmeva rodasi

6.6

वि चि॑द्वृ॒त्रस्य॒ दोध॑तो॒ वज्रे॑ण श॒तप॑र्वणा । शिरो॑ बिभेद वृ॒ष्णिना॑ ॥६॥

Vi chidvritrasya dodhato vajrena shataparvana, shiro bibheda vrishnina

6.7

इ॒मा अ॒भि प्र णो॑नुमो वि॒पामग्रे॑षु धी॒तय॑ः । अ॒ग्नेः शो॒चिर्न दि॒द्युत॑ः ॥७॥

Ima abhi pra nonumo vipamagreshu dhitayah, agneh shochirna didyutah

6.8

गुहा॑ स॒तीरुप॒ त्मना॒ प्र यच्छोच॑न्त धी॒तय॑ः । कण्वा॑ ऋ॒तस्य॒ धार॑या ॥८॥

Guha satirupa tmana pra yachchhochanta dhitayah, kanva ritasya dharaya

6.9

प्र तमि॑न्द्र नशीमहि र॒यिं गोम॑न्तम॒श्विन॑म् । प्र ब्रह्म॑ पू॒र्वचि॑त्तये ॥९॥

Pra tamindra nashimahi rayim gomantamashvinam, pra brahma purvachittaye

6.10

अ॒हमिद्धि पि॒तुष्परि॑ मे॒धामृ॒तस्य॑ ज॒ग्रभ॑ । अ॒हं सूर्य॑ इवाजनि ॥१०॥

Ahamiddhi pitushpari medhamritasya jagrabha, aham surya ivajani

6.11

अ॒हं प्र॒त्नेन॒ मन्म॑ना॒ गिर॑ः शुम्भामि कण्व॒वत् । येनेन्द्र॒ः शुष्म॒मिद्द॒धे ॥११॥

Aham pratnena manmana girah shumbhami kanvavat, yenendrah shushmamiddadhe

6.12

ये त्वामि॑न्द्र॒ न तु॑ष्टु॒वुॠष॑यो॒ ये च॑ तुष्टु॒वुः । ममेद्व॑र्धस्व॒ सुष्टु॑तः ॥१२॥

Ye tvamindra na tushtuvurishayo ye cha tushtuvuh, mamedvardhasva sushtutah

6.13

यद॑स्य म॒न्युरध्व॑नी॒द्वि वृ॒त्रं प॑र्व॒शो रु॒जन् । अ॒पः स॑मु॒द्रमैर॑यत् ॥१३॥

Yadasya manyuradhvanidvi vritram parvasho rujan, apah samudramairayat

6.14

नि शुष्ण॑ इन्द्र धर्ण॒सिं वज्रं॑ जघन्थ॒ दस्य॑वि । वृषा॒ ह्यु॑ग्र शृण्वि॒षे ॥१४॥

Ni shushna indra dharnasim vajram jaghantha dasyavi, vrisha hyugra shrinvishe

6.15

न द्याव॒ इन्द्र॒मोज॑सा॒ नान्तरि॑क्षाणि व॒ज्रिण॑म् । न वि॑व्यचन्त॒ भूम॑यः ॥१५॥

Na dyava indramojasa nantarikshani vajrinam, na vivyachanta bhumayah

6.16

यस्त॑ इन्द्र म॒हीर॒पः स्त॑भू॒यमा॑न॒ आश॑यत् । नि तं पद्या॑सु शिश्नथः ॥१६॥

Yasta indra mahirapah stabhuyamana ashayat, ni tam padyasu shishnathah

6.17

य इ॒मे रोद॑सी म॒ही स॑मी॒ची स॒मज॑ग्रभीत् । तमो॑भिरिन्द्र॒ तं गु॑हः ॥१७॥

Ya ime rodasi mahi samichi samajagrabhit, tamobhirindra tam guhah

6.18

य इ॑न्द्र॒ यत॑यस्त्वा॒ भृग॑वो॒ ये च॑ तुष्टु॒वुः । ममेदु॑ग्र श्रुधी॒ हव॑म् ॥१८॥

Ya indra yatayastva bhrigavo ye cha tushtuvuh, mamedugra shrudhi havam

6.19

इ॒मास्त॑ इन्द्र॒ पृश्न॑यो घृ॒तं दु॑हत आ॒शिर॑म् । ए॒नामृ॒तस्य॑ पि॒प्युषी॑ः ॥१९॥

Imasta indra prishnayo ghritam duhata ashiram, enamritasya pipyushih

6.20

या इ॑न्द्र प्र॒स्व॑स्त्वा॒ऽऽसा गर्भ॒मच॑क्रिरन् । परि॒ धर्मे॑व॒ सूर्य॑म् ॥२०॥

Ya indra prasvastvasa garbhamachakriran, pari dharmeva suryam

6.21

त्वामिच्छ॑वसस्पते॒ कण्वा॑ उ॒क्थेन॑ वावृधुः । त्वां सु॒तास॒ इन्द॑वः ॥२१॥

Tvamichchhavasaspate kanva ukthena vavridhuh, tvam sutasa indavah

6.22

तवेदि॑न्द्र॒ प्रणी॑तिषू॒त प्रश॑स्तिरद्रिवः । य॒ज्ञो वि॑तन्त॒साय्य॑ः ॥२२॥

Tavedindra pranitishuta prashastiradrivah, yagyo vitantasayyah

6.23

आ न॑ इन्द्र म॒हीमिषं॒ पुरं॒ न द॑र्षि॒ गोम॑तीम् । उ॒त प्र॒जां सु॒वीर्य॑म् ॥२३॥

A na indra mahimisham puram na darshi gomatim, uta prajam suviryam

6.24

उ॒त त्यदा॒श्वश्व्यं॒ यदि॑न्द्र॒ नाहु॑षी॒ष्वा । अग्रे॑ वि॒क्षु प्र॒दीद॑यत् ॥२४॥

Uta tyadashvashvyam yadindra nahushishva, agre vikshu pradidayat

6.25

अ॒भि व्र॒जं न त॑त्निषे॒ सूर॑ उपा॒कच॑क्षसम् । यदि॑न्द्र मृ॒ळया॑सि नः ॥२५॥

Abhi vrajam na tatnishe sura upakachakshasam, yadindra mrilayasi nah

6.26

यद॒ङ्ग त॑विषी॒यस॒ इन्द्र॑ प्र॒राज॑सि क्षि॒तीः । म॒हाँ अ॑पा॒र ओज॑सा ॥२६॥

Yadanga tavishiyasa indra prarajasi kshitih, maham apara ojasa

6.27

तं त्वा॑ ह॒विष्म॑ती॒र्विश॒ उप॑ ब्रुवत ऊ॒तये॑ । उ॒रु॒ज्रय॑स॒मिन्दु॑भिः ॥२७॥

Tam tva havishmatirvisha upa bruvata utaye, urujrayasamindubhih

6.28

उ॒प॒ह्व॒रे गि॑री॒णां सं॑ग॒थे च॑ न॒दीना॑म् । धि॒या विप्रो॑ अजायत ॥२८॥

Upahvare girinam sangathe cha nadinam, dhiya vipro ajayata

6.29

अत॑ः समु॒द्रमु॒द्वत॑श्चिकि॒त्वाँ अव॑ पश्यति । यतो॑ विपा॒न एज॑ति ॥२९॥

Atah samudramudvatashchikitvam ava pashyati, yato vipana ejati

6.30

आदित्प्र॒त्नस्य॒ रेत॑सो॒ ज्योति॑ष्पश्यन्ति वास॒रम् । प॒रो यदि॒ध्यते॑ दि॒वा ॥३०॥

Aditpratnasya retaso jyotishpashyanti vasaram, paro yadidhyate diva

6.31

कण्वा॑स इन्द्र ते म॒तिं विश्वे॑ वर्धन्ति॒ पौंस्य॑म् । उ॒तो श॑विष्ठ॒ वृष्ण्य॑म् ॥३१॥

Kanvasa indra te matim vishve vardhanti paunsyam, uto shavishtha vrishnyam

6.32

इ॒मां म॑ इन्द्र सुष्टु॒तिं जु॒षस्व॒ प्र सु माम॑व । उ॒त प्र व॑र्धया म॒तिम् ॥३२॥

Imam ma indra sushtutim jushasva pra su mamava, uta pra vardhaya matim

6.33

उ॒त ब्र॑ह्म॒ण्या व॒यं तुभ्यं॑ प्रवृद्ध वज्रिवः । विप्रा॑ अतक्ष्म जी॒वसे॑ ॥३३॥

Uta brahmanya vayam tubhyam pravriddha vajrivah, vipra atakshma jivase

6.34

अ॒भि कण्वा॑ अनूष॒ताऽऽपो॒ न प्र॒वता॑ य॒तीः । इन्द्रं॒ वन॑न्वती म॒तिः ॥३४॥

Abhi kanva anushatapo na pravata yatih, indram vananvati matih

6.35

इन्द्र॑मु॒क्थानि॑ वावृधुः समु॒द्रमि॑व॒ सिन्ध॑वः । अनु॑त्तमन्युम॒जर॑म् ॥३५॥

Indramukthani vavridhuh samudramiva sindhavah, anuttamanyumajaram

6.36

आ नो॑ याहि परा॒वतो॒ हरि॑भ्यां हर्य॒ताभ्या॑म् । इ॒ममि॑न्द्र सु॒तं पि॑ब ॥३६॥

A no yahi paravato haribhyam haryatabhyam, imamindra sutam piba

6.37

त्वामिद्वृ॑त्रहन्तम॒ जना॑सो वृ॒क्तब॑र्हिषः । हव॑न्ते॒ वाज॑सातये ॥३७॥

Tvamidvritrahantama janaso vriktabarhishah, havante vajasataye

6.38

अनु॑ त्वा॒ रोद॑सी उ॒भे च॒क्रं न व॒र्त्येत॑शम् । अनु॑ सुवा॒नास॒ इन्द॑वः ॥३८॥

Anu tva rodasi ubhe chakram na vartyetasham, anu suvanasa indavah

6.39

मन्द॑स्वा॒ सु स्व॑र्णर उ॒तेन्द्र॑ शर्य॒णाव॑ति । मत्स्वा॒ विव॑स्वतो म॒ती ॥३९॥

Mandasva su svarnara utendra sharyanavati, matsva vivasvato mati

6.40

वा॒वृ॒धा॒न उप॒ द्यवि॒ वृषा॑ व॒ज्र्य॑रोरवीत् । वृ॒त्र॒हा सो॑म॒पात॑मः ॥४०॥

Vavridhana upa dyavi vrisha vajryaroravit, vritraha somapatamah

6.41

ऋषि॒र्हि पू॑र्व॒जा अस्येक॒ ईशा॑न॒ ओज॑सा । इन्द्र॑ चोष्कू॒यसे॒ वसु॑ ॥४१॥

Rishirhi purvaja asyeka ishana ojasa, indra choshkuyase vasu

6.42

अ॒स्माकं॑ त्वा सु॒ताँ उप॑ वी॒तपृ॑ष्ठा अ॒भि प्रय॑ः । श॒तं व॑हन्तु॒ हर॑यः ॥४२॥

Asmakam tva sutam upa vitaprishtha abhi prayah, shatam vahantu harayah

6.43

इ॒मां सु पू॒र्व्यां धियं॒ मधो॑र्घृ॒तस्य॑ पि॒प्युषी॑म् । कण्वा॑ उ॒क्थेन॑ वावृधुः ॥४३॥

Imam su purvyam dhiyam madhorghritasya pipyushim, kanva ukthena vavridhuh

6.44

इन्द्र॒मिद्विम॑हीनां॒ मेधे॑ वृणीत॒ मर्त्य॑ः । इन्द्रं॑ सनि॒ष्युरू॒तये॑ ॥४४॥

Indramidvimahinam medhe vrinita martyah, indram sanishyurutaye

6.45

अ॒र्वाञ्चं॑ त्वा पुरुष्टुत प्रि॒यमे॑धस्तुता॒ हरी॑ । सो॒म॒पेया॑य वक्षतः ॥४५॥

Arvancham tva purushtuta priyamedhastuta hari, somapeyaya vakshatah

6.46

श॒तम॒हं ति॒रिन्दि॑रे स॒हस्रं॒ पर्शा॒वा द॑दे । राधां॑सि॒ याद्वा॑नाम् ॥४६॥

Shatamaham tirindire sahasram parshava dade, radhansi yadvanam

6.47

त्रीणि॑ श॒तान्यर्व॑तां स॒हस्रा॒ दश॒ गोना॑म् । द॒दुष्प॒ज्राय॒ साम्ने॑ ॥४७॥

Trini shatanyarvatam sahasra dasha gonam, dadushpajraya samne

6.48

उदा॑नट् ककु॒हो दिव॒मुष्ट्रा॑ञ्चतु॒र्युजो॒ दद॑त् । श्रव॑सा॒ याद्वं॒ जन॑म् ॥४८॥

Udanat kakuho divamushtranchaturyujo dadat, shravasa yadvam janam