সূক্ত 49

49.1

১০ প্রস্কণ্বঃ কাণ্বঃ। ইন্দ্রঃ । প্রগাথঃ= ( বিষমা বৃহতী, সমা সতোবৃহতী ) ।

অভি প্র বঃ সুরাধসমিন্দ্রমর্চ যথা বিদে । যো জরিতৃভ্যো মঘবা পুরূবসুঃ সহস্রেণেব শিক্ষতি ॥১॥

49.2

শতানীকেব প্র জিগাতি ধৃষ্ণুয়া হন্তি বৃত্রাণি দাশুষে ।
গিরেরিব প্র রসা অস্য পিন্বিরে দত্রাণি পুরুভোজসঃ ॥২॥

49.3

আ ত্বা সুতাস ইন্দবো মদা য ইন্দ্র গির্বণঃ । আপো ন বজ্রিন্নন্বোক্যং১ সরঃ পৃণন্তি শূর রাধসে ॥৩॥

49.4

অনেহসং প্রতরণং বিবক্ষণং মধ্বঃ স্বাদিষ্ঠমীং পিব । আ যথা মন্দসানঃ কিরাসি নঃ প্র ক্ষুদ্রেব ত্মনা ধৃষৎ ॥৪॥

49.5

আ নঃ স্তোমমুপ দ্রবদ্ধিয়ানো অশ্বো ন সোতৃভিঃ । যং তে স্বধাবন্ত্স্বদয়ন্তি ধেনব ইন্দ্র কণ্বেষু রাতয়ঃ ॥৫॥

49.6

উগ্রং ন বীরং নমসোপ সেদিম বিভূতিমক্ষিতাবসুম্ । উদ্রীব বজ্রিন্নবতো ন সিঞ্চতে ক্ষরন্তীন্দ্র ধীতয়ঃ ॥৬॥

49.7

যদ্ধ নূনং যদ্বা যজ্ঞে যদ্বা পৃথিব্যামধি । অতো নো যজ্ঞমাশুভির্মহেমত উগ্র উগ্রেভিরা গহি ॥৭॥

49.8

অজিরাসো হরয়ো যে ত আশবো বাতা ইব প্রসক্ষিণঃ । যেভিরপত্যং মনুষঃ পরীয়সে যেভির্বিশ্বং স্বর্দৃশে ॥৮॥

49.9

এতাবতস্ত ঈমহ ইন্দ্র সুম্নস্য গোমতঃ । যথা প্রাবো মঘবন্মেধ্যাতিথিং যথা নীপাতিথিং ধনে ॥৯॥

49.10

যথা কণ্বে মঘবন্ত্রসদস্যবি যথা পক্থে দশব্রজে । যথা গোশর্যে অসনোৠজিশ্বনীন্দ্র গোমদ্ধিরণ্যবৎ ॥১০॥