সূক্ত 48

48.1

১৫ প্রগাথো ঘৌরঃ কাণ্বঃ। সোমঃ । ত্রিষ্টুপ্ , ৫ জগতী ।

স্বাদোরভক্ষি বয়সঃ সুমেধাঃ স্বাধ্যো বরিবোবিত্তরস্য ।
বিশ্বে যং দেবা উত মর্ত্যাসো মধু ব্রুবন্তো অভি সংচরন্তি ॥১॥

অন্তশ্চ প্রাগা অদিতির্ভবাস্যবয়াতা হরসো দৈব্যস্য ।
ইন্দবিন্দ্রস্য সখ্যং জুষাণঃ শ্রৌষ্টীব ধুরমনু রায় ঋধ্যাঃ ॥২॥

অপাম সোমমমৃতা অভূমাগন্ম জ্যোতিরবিদাম দেবান্ ।
কিং নূনমস্মান্কৃণবদরাতিঃ কিমু ধূর্তিরমৃত মর্ত্যস্য ॥৩॥

শং নো ভব হৃদ আ পীত ইন্দো পিতেব সোম সূনবে সুশেবঃ ।
সখেব সখ্য উরুশংস ধীরঃ প্র ণ আয়ুর্জীবসে সোম তারীঃ ॥৪॥

ইমে মা পীতা যশস উরুষ্যবো রথং ন গাবঃ সমনাহ পর্বসু ।
তে মা রক্ষন্তু বিস্রসশ্চরিত্রাদুত মা স্রামাদ্যবয়ন্ত্বিন্দবঃ ॥৫॥

অগ্নিং ন মা মথিতং সং দিদীপঃ প্র চক্ষয় কৃণুহি বস্যসো নঃ ।
অথা হি তে মদ আ সোম মন্যে রেবাঁ ইব প্র চরা পুষ্টিমচ্ছ ॥৬॥

ইষিরেণ তে মনসা সুতস্য ভক্ষীমহি পিত্র্যস্যেব রায়ঃ ।
সোম রাজন্প্র ণ আয়ূংষি তারীরহানীব সূর্যো বাসরাণি ॥৭॥

সোম রাজন্মৃলয়া নঃ স্বস্তি তব স্মসি ব্রত্যা৩স্তস্য বিদ্ধি ।
অলর্তি দক্ষ উত মন্যুরিন্দো মা নো অর্যো অনুকামং পরা দাঃ ॥৮॥

ত্বং হি নস্তন্বঃ সোম গোপা গাত্রেগাত্রে নিষসত্থা নৃচক্ষাঃ ।
যত্তে বয়ং প্রমিনাম ব্রতানি স নো মৃল সুষখা দেব বস্যঃ ॥৯॥

ঋদূদরেণ সখ্যা সচেয় যো মা ন রিষ্যেদ্ধর্যশ্ব পীতঃ ।
অয়ং যঃ সোমো ন্যধায্যস্মে তস্মা ইন্দ্রং প্রতিরমেম্যায়ুঃ ॥১০॥

অপ ত্যা অস্থুরনিরা অমীবা নিরত্রসন্তমিষীচীরভৈষুঃ ।
আ সোমো অস্মাঁ অরুহদ্বিহায়া অগন্ম যত্র প্রতিরন্ত আয়ুঃ ॥১১॥

যো ন ইন্দুঃ পিতরো হৃত্সু পীতোঽমর্ত্যো মর্ত্যাঁ আবিবেশ ।
তস্মৈ সোমায় হবিষা বিধেম মৃলীকে অস্য সুমতৌ স্যাম ॥১২॥

ত্বং সোম পিতৃভিঃ সংবিদানোঽনু দ্যাবাপৃথিবী আ ততন্থ ।
তস্মৈ ত ইন্দো হবিষা বিধেম বয়ং স্যাম পতয়ো রয়ীণাম্ ॥১৩॥

ত্রাতারো দেবা অধি বোচতা নো মা নো নিদ্রা ঈশত মোত
জল্পিঃ । বয়ং সোমস্য বিশ্বহ প্রিয়াসঃ সুবীরাসো বিদথমা বদেম ॥১৪॥

ত্বং নঃ সোম বিশ্বতো বয়োধাস্ত্বং স্বর্বিদা বিশা নৃচক্ষাঃ ।
ত্বং ন ইন্দ ঊতিভিঃ সজোষাঃ পাহি পশ্চাতাদুত বা পুরস্তাৎ ॥১৫॥