Sukta 48

48.1

15 pragatho ghaurah kanvah, somah, trishtup, 5 jagati

स्वा॒दोर॑भक्षि॒ वय॑सः सुमे॒धाः स्वा॒ध्यो॑ वरिवो॒वित्त॑रस्य ।
विश्वे॒ यं दे॒वा उ॒त मर्त्या॑सो॒ मधु॑ ब्रु॒वन्तो॑ अ॒भि सं॒चर॑न्ति ॥१॥

Svadorabhakshi vayasah sumedhah svadhyo varivovittarasya
Vishve yam deva uta martyaso madhu bruvanto abhi sancharanti

अ॒न्तश्च॒ प्रागा॒ अदि॑तिर्भवास्यवया॒ता हर॑सो॒ दैव्य॑स्य ।
इन्द॒विन्द्र॑स्य स॒ख्यं जु॑षा॒णः श्रौष्टी॑व॒ धुर॒मनु॑ रा॒य ऋ॑ध्याः ॥२॥

Antashcha praga aditirbhavasyavayata haraso daivyasya
Indavindrasya sakhyam jushanah shraushtiva dhuramanu raya ridhyah

अपा॑म॒ सोम॑म॒मृता॑ अभू॒माग॑न्म॒ ज्योति॒रवि॑दाम दे॒वान् ।
किं नू॒नम॒स्मान्कृ॑णव॒दरा॑ति॒ः किमु॑ धू॒र्तिर॑मृत॒ मर्त्य॑स्य ॥३॥

Apama somamamrita abhumaganma jyotiravidama devan
Kim nunamasmankrinavadaratih kimu dhurtiramrita martyasya

शं नो॑ भव हृ॒द आ पी॒त इ॑न्दो पि॒तेव॑ सोम सू॒नवे॑ सु॒शेव॑ः ।
सखे॑व॒ सख्य॑ उरुशंस॒ धीर॒ः प्र ण॒ आयु॑र्जी॒वसे॑ सोम तारीः ॥४॥

Sham no bhava hrida a pita indo piteva soma sunave sushevah
Sakheva sakhya urushansa dhirah pra na ayurjivase soma tarih

इ॒मे मा॑ पी॒ता य॒शस॑ उरु॒ष्यवो॒ रथं॒ न गाव॒ः सम॑नाह॒ पर्व॑सु ।
ते मा॑ रक्षन्तु वि॒स्रस॑श्च॒रित्रा॑दु॒त मा॒ स्रामा॑द्यवय॒न्त्विन्द॑वः ॥५॥

Ime ma pita yashasa urushyavo ratham na gavah samanaha parvasu
Te ma rakshantu visrasashcharitraduta ma sramadyavayantvindavah

अ॒ग्निं न मा॑ मथि॒तं सं दि॑दीप॒ः प्र च॑क्षय कृणु॒हि वस्य॑सो नः ।
अथा॒ हि ते॒ मद॒ आ सो॑म॒ मन्ये॑ रे॒वाँ इ॑व॒ प्र च॑रा पु॒ष्टिमच्छ॑ ॥६॥

Agnim na ma mathitam sam didipah pra chakshaya krinuhi vasyaso nah
Atha hi te mada a soma manye revam iva pra chara pushtimachchha

इ॒षि॒रेण॑ ते॒ मन॑सा सु॒तस्य॑ भक्षी॒महि॒ पित्र्य॑स्येव रा॒यः ।
सोम॑ राज॒न्प्र ण॒ आयूं॑षि तारी॒रहा॑नीव॒ सूर्यो॑ वास॒राणि॑ ॥७॥

Ishirena te manasa sutasya bhakshimahi pitryasyeva rayah
Soma rajanpra na ayunshi tarirahaniva suryo vasarani

सोम॑ राजन्मृ॒ळया॑ नः स्व॒स्ति तव॑ स्मसि व्र॒त्या॒३स्तस्य॑ विद्धि ।
अल॑र्ति॒ दक्ष॑ उ॒त म॒न्युरि॑न्दो॒ मा नो॑ अ॒र्यो अ॑नुका॒मं परा॑ दाः ॥८॥

Soma rajanmrilaya nah svasti tava smasi vratya3stasya viddhi
Alarti daksha uta manyurindo ma no aryo anukamam para dah

त्वं हि न॑स्त॒न्व॑ः सोम गो॒पा गात्रे॑गात्रे निष॒सत्था॑ नृ॒चक्षा॑ः ।
यत्ते॑ व॒यं प्र॑मि॒नाम॑ व्र॒तानि॒ स नो॑ मृळ सुष॒खा दे॑व॒ वस्य॑ः ॥९॥

Tvam hi nastanvah soma gopa gatregatre nishasattha nrichakshah
Yatte vayam praminama vratani sa no mrila sushakha deva vasyah

ऋ॒दू॒दरे॑ण॒ सख्या॑ सचेय॒ यो मा॒ न रिष्ये॑द्धर्यश्व पी॒तः ।
अ॒यं यः सोमो॒ न्यधा॑य्य॒स्मे तस्मा॒ इन्द्रं॑ प्र॒तिर॑मे॒म्यायु॑ः ॥१०॥

Ridudarena sakhya sacheya yo ma na rishyeddharyashva pitah
Ayam yah somo nyadhayyasme tasma indram pratiramemyayuh

अप॒ त्या अ॑स्थु॒रनि॑रा॒ अमी॑वा॒ निर॑त्रस॒न्तमि॑षीची॒रभै॑षुः ।
आ सोमो॑ अ॒स्माँ अ॑रुह॒द्विहा॑या॒ अग॑न्म॒ यत्र॑ प्रति॒रन्त॒ आयु॑ः ॥११॥

Apa tya asthuranira amiva niratrasantamishichirabhaishuh
A somo asmam aruhadvihaya aganma yatra pratiranta ayuh

यो न॒ इन्दु॑ः पितरो हृ॒त्सु पी॒तोऽम॑र्त्यो॒ मर्त्याँ॑ आवि॒वेश॑ ।
तस्मै॒ सोमा॑य ह॒विषा॑ विधेम मृळी॒के अ॑स्य सुम॒तौ स्या॑म ॥१२॥

Yo na induh pitaro hritsu pitomartyo martyam avivesha
Tasmai somaya havisha vidhema mrilike asya sumatau syama

त्वं सो॑म पि॒तृभि॑ः संविदा॒नोऽनु॒ द्यावा॑पृथि॒वी आ त॑तन्थ ।
तस्मै॑ त इन्दो ह॒विषा॑ विधेम व॒यं स्या॑म॒ पत॑यो रयी॒णाम् ॥१३॥

Tvam soma pitribhih sanvidanonu dyavaprithivi a tatantha
Tasmai ta indo havisha vidhema vayam syama patayo rayinam

त्राता॑रो देवा॒ अधि॑ वोचता नो॒ मा नो॑ नि॒द्रा ई॑शत॒ मोत
जल्पि॑ः । व॒यं सोम॑स्य वि॒श्वह॑ प्रि॒यास॑ः सु॒वीरा॑सो वि॒दथ॒मा व॑देम ॥१४॥

Trataro deva adhi vochata no ma no nidra ishata mota
Jalpih, vayam somasya vishvaha priyasah suviraso vidathama vadema

त्वं न॑ः सोम वि॒श्वतो॑ वयो॒धास्त्वं स्व॒र्विदा वि॑शा नृ॒चक्षा॑ः ।
त्वं न॑ इन्द ऊ॒तिभि॑ः स॒जोषा॑ः पा॒हि प॒श्चाता॑दु॒त वा॑ पु॒रस्ता॑त् ॥१५॥

Tvam nah soma vishvato vayodhastvam svarvida visha nrichakshah
Tvam na inda utibhih sajoshah pahi pashchataduta va purastat