Sukta 49

49.1

10 praskanvah kanvah, indrah, pragathah= ( vishama brihati, sama satobrihati )

अ॒भि प्र व॑ः सु॒राध॑स॒मिन्द्र॑मर्च॒ यथा॑ वि॒दे । यो ज॑रि॒तृभ्यो॑ म॒घवा॑ पुरू॒वसु॑ः स॒हस्रे॑णेव॒ शिक्ष॑ति ॥१॥

Abhi pra vah suradhasamindramarcha yatha vide, yo jaritribhyo maghava puruvasuh sahasreneva shikshati

श॒तानी॑केव॒ प्र जि॑गाति धृष्णु॒या हन्ति॑ वृ॒त्राणि॑ दा॒शुषे॑ ।
गि॒रेरि॑व॒ प्र रसा॑ अस्य पिन्विरे॒ दत्रा॑णि पुरु॒भोज॑सः ॥२॥

Shatanikeva pra jigati dhrishnuya hanti vritrani dashushe
Gireriva pra rasa asya pinvire datrani purubhojasah

आ त्वा॑ सु॒तास॒ इन्द॑वो॒ मदा॒ य इ॑न्द्र गिर्वणः । आपो॒ न व॑ज्रि॒न्नन्वो॒क्यं१ सर॑ः पृ॒णन्ति॑ शूर॒ राध॑से ॥३॥

A tva sutasa indavo mada ya indra girvanah, apo na vajrinnanvokyan1 sarah prinanti shura radhase

अ॒ने॒हसं॑ प्र॒तर॑णं वि॒वक्ष॑णं॒ मध्व॒ः स्वादि॑ष्ठमीं पिब । आ यथा॑ मन्दसा॒नः कि॒रासि॑ न॒ः प्र क्षु॒द्रेव॒ त्मना॑ धृ॒षत् ॥४॥

Anehasam prataranam vivakshanam madhvah svadishthamim piba, a yatha mandasanah kirasi nah pra kshudreva tmana dhrishat

आ न॒ः स्तोम॒मुप॑ द्र॒वद्धि॑या॒नो अश्वो॒ न सोतृ॑भिः । यं ते॑ स्वधावन्त्स्व॒दय॑न्ति धे॒नव॒ इन्द्र॒ कण्वे॑षु रा॒तय॑ः ॥५॥

A nah stomamupa dravaddhiyano ashvo na sotribhih, yam te svadhavantsvadayanti dhenava indra kanveshu ratayah

उ॒ग्रं न वी॒रं नम॒सोप॑ सेदिम॒ विभू॑ति॒मक्षि॑तावसुम् । उ॒द्रीव॑ वज्रिन्नव॒तो न सि॑ञ्च॒ते क्षर॑न्तीन्द्र धी॒तय॑ः ॥६॥

Ugram na viram namasopa sedima vibhutimakshitavasum, udriva vajrinnavato na sinchate ksharantindra dhitayah

यद्ध॑ नू॒नं यद्वा॑ य॒ज्ञे यद्वा॑ पृथि॒व्यामधि॑ । अतो॑ नो य॒ज्ञमा॒शुभि॑र्महेमत उ॒ग्र उ॒ग्रेभि॒रा ग॑हि ॥७॥

Yaddha nunam yadva yagye yadva prithivyamadhi, ato no yagyamashubhirmahemata ugra ugrebhira gahi

अ॒जि॒रासो॒ हर॑यो॒ ये त॑ आ॒शवो॒ वाता॑ इव प्रस॒क्षिण॑ः । येभि॒रप॑त्यं॒ मनु॑षः प॒रीय॑से॒ येभि॒र्विश्वं॒ स्व॑र्दृ॒शे ॥८॥

Ajiraso harayo ye ta ashavo vata iva prasakshinah, yebhirapatyam manushah pariyase yebhirvishvam svardrishe

ए॒ताव॑तस्त ईमह॒ इन्द्र॑ सु॒म्नस्य॒ गोम॑तः । यथा॒ प्रावो॑ मघव॒न्मेध्या॑तिथिं॒ यथा॒ नीपा॑तिथिं॒ धने॑ ॥९॥

Etavatasta imaha indra sumnasya gomatah, yatha pravo maghavanmedhyatithim yatha nipatithim dhane

यथा॒ कण्वे॑ मघवन्त्र॒सद॑स्यवि॒ यथा॑ प॒क्थे दश॑व्रजे । यथा॒ गोश॑र्ये॒ अस॑नोॠ॒जिश्व॒नीन्द्र॒ गोम॒द्धिर॑ण्यवत् ॥१०॥

Yatha kanve maghavantrasadasyavi yatha pakthe dashavraje, yatha gosharye asanorijishvanindra gomaddhiranyavat