সূক্ত 43

43.1

৩৩ বিরূপ আঙ্গিরসঃ । অগ্নিঃ । গায়ত্রী ।

ইমে বিপ্রস্য বেধসোঽগ্নেরস্তৃতয়জ্বনঃ । গিরঃ স্তোমাস ঈরতে ॥১॥

43.2

অস্মৈ তে প্রতিহর্যতে জাতবেদো বিচর্ষণে । অগ্নে জনামি সুষ্টুতিম্ ॥২॥

43.3

আরোকা ইব ঘেদহ তিগ্মা অগ্নে তব ত্বিষঃ । দদ্ভির্বনানি বপ্সতি ॥৩॥

43.4

হরয়ো ধূমকেতবো বাতজূতা উপ দ্যবি । যতন্তে বৃথগগ্নয়ঃ ॥৪॥

43.5

এতে ত্যে বৃথগগ্নয় ইদ্ধাসঃ সমদৃক্ষত । উষসামিব কেতবঃ ॥৫॥

43.6

কৃষ্ণা রজাংসি পত্সুতঃ প্রয়াণে জাতবেদসঃ । অগ্নির্যদ্রোধতি ক্ষমি ॥৬॥

43.7

ধাসিং কৃণ্বান ওষধীর্বপ্সদগ্নির্ন বায়তি । পুনর্যন্তরুণীরপি ॥৭॥

43.8

জিহ্বাভিরহ নন্নমদর্চিষা জঞ্জণাভবন্ । অগ্নির্বনেষু রোচতে ॥৮॥

43.9

অপ্স্বগ্নে সধিষ্টব সৌষধীরনু রুধ্যসে । গর্ভে সঞ্জায়সে পুনঃ ॥৯॥

43.10

উদগ্নে তব তদ্ঘৃতাদর্চী রোচত আহুতম্ । নিংসানং জুহ্বো৩ মুখে ॥১০॥

43.11

উক্ষান্নায় বশান্নায় সোমপৃষ্ঠায় বেধসে । স্তোমৈর্বিধেমাগ্নয়ে ॥১১॥

43.12

উত ত্বা নমসা বয়ং হোতর্বরেণ্যক্রতো । অগ্নে সমিদ্ভিরীমহে ॥১২॥

43.13

উত ত্বা ভৃগুবচ্ছুচে মনুষ্বদগ্ন আহুত । অঙ্গিরস্বদ্ধবামহে ॥১৩॥

43.14

ত্বং হ্যগ্নে অগ্নিনা বিপ্রো বিপ্রেণ সন্ত্সতা । সখা সখ্যা সমিধ্যসে ॥১৪॥

43.15

স ত্বং বিপ্রায় দাশুষে রয়িং দেহি সহস্রিণম্ । অগ্নে বীরবতীমিষম্ ॥১৫॥

43.16

অগ্নে ভ্রাতঃ সহস্কৃত রোহিদশ্ব শুচিব্রত । ইমং স্তোমং জুষস্ব মে ॥১৬॥

43.17

উত ত্বাগ্নে মম স্তুতো বাশ্রায় প্রতিহর্যতে । গোষ্ঠং গাব ইবাশত ॥১৭॥

43.18

তুভ্যং তা অঙ্গিরস্তম বিশ্বাঃ সুক্ষিতয়ঃ পৃথক্ । অগ্নে কামায় যেমিরে ॥১৮॥

43.19

অগ্নিং ধীভির্মনীষিণো মেধিরাসো বিপশ্চিতঃ । অদ্মসদ্যায় হিন্বিরে ॥১৯॥

43.20

তং ত্বামজ্মেষু বাজিনং তন্বানা অগ্নে অধ্বরম্ । বহ্নিং হোতারমীলতে ॥২০॥

43.21

পুরুত্রা হি সদৃঙ্ঙসি বিশো বিশ্বা অনু প্রভুঃ । সমত্সু ত্বা হবামহে ॥২১॥

43.22

তমীলিষ্ব য আহুতোঽগ্নির্বিভ্রাজতে ঘৃতৈঃ । ইমং নঃ শৃণবদ্ধবম্ ॥২২॥

43.23

তং ত্বা বয়ং হবামহে শৃণ্বন্তং জাতবেদসম্ । অগ্নে ঘ্নন্তমপ দ্বিষঃ ॥২৩॥

43.24

বিশাং রাজানমদ্ভুতমধ্যক্ষং ধর্মণামিমম্ । অগ্নিমীলে স উ শ্রবৎ ॥২৪॥

43.25

অগ্নিং বিশ্বায়ুবেপসং মর্যং ন বাজিনং হিতম্ । সপ্তিং ন বাজয়ামসি ॥২৫॥

43.26

ঘ্নন্মৃধ্রাণ্যপ দ্বিষো দহন্রক্ষাংসি বিশ্বহা । অগ্নে তিগ্মেন দীদিহি ॥২৬॥

43.27

যং ত্বা জনাস ইন্ধতে মনুষ্বদঙ্গিরস্তম । অগ্নে স বোধি মে বচঃ ॥২৭॥

43.28

যদগ্নে দিবিজা অস্যপ্সুজা বা সহস্কৃত । তং ত্বা গীর্ভির্হবামহে ॥২৮॥

43.29

তুভ্যং ঘেত্তে জনা ইমে বিশ্বাঃ সুক্ষিতয়ঃ পৃথক্ । ধাসিং হিন্বন্ত্যত্তবে ॥২৯॥

43.30

তে ঘেদগ্নে স্বাধ্যোঽহা বিশ্বা নৃচক্ষসঃ । তরন্তঃ স্যাম দুর্গহা ॥৩০॥

43.31

অগ্নিং মন্দ্রং পুরুপ্রিয়ং শীরং পাবকশোচিষম্ । হৃদ্ভির্মন্দ্রেভিরীমহে ॥৩১॥

43.32

স ত্বমগ্নে বিভাবসুঃ সৃজন্ত্সূর্যো ন রশ্মিভিঃ । শর্ধন্তমাংসি জিঘ্নসে ॥৩২॥

43.33

তত্তে সহস্ব ঈমহে দাত্রং যন্নোপদস্যতি । ত্বদগ্নে বার্যং বসু ॥৩৩॥