সূক্ত 44

44.1

৩০ বিরূপ আঙ্গিরসঃ । অগ্নিঃ । গায়ত্রী ।

সমিধাগ্নিং দুবস্যত ঘৃতৈর্বোধয়তাতিথিম্ । আস্মিন্হব্যা জুহোতন ॥১॥

44.2

অগ্নে স্তোমং জুষস্ব মে বর্ধস্বানেন মন্মনা । প্রতি সূক্তানি হর্য নঃ ॥২॥

44.3

অগ্নিং দূতং পুরো দধে হব্যবাহমুপ ব্রুবে । দেবাঁ আ সাদয়াদিহ ॥৩॥

44.4

উত্তে বৃহন্তো অর্চয়ঃ সমিধানস্য দীদিবঃ । অগ্নে শুক্রাস ঈরতে ॥৪॥

44.5

উপ ত্বা জুহ্বো৩ মম ঘৃতাচীর্যন্তু হর্যত । অগ্নে হব্যা জুষস্ব নঃ ॥৫॥

44.6

মন্দ্রং হোতারমৃত্বিজং চিত্রভানুং বিভাবসুম্ । অগ্নিমীলে স উ শ্রবৎ ॥৬॥

44.7

প্রত্নং হোতারমীড্যং জুষ্টমগ্নিং কবিক্রতুম্ । অধ্বরাণামভিশ্রিয়ম্ ॥৭॥

44.8

জুষাণো অঙ্গিরস্তমেমা হব্যান্যানুষক্ । অগ্নে যজ্ঞং নয় ঋতুথা ॥৮॥

44.9

সমিধান উ সন্ত্য শুক্রশোচ ইহা বহ । চিকিত্বান্দৈব্যং জনম্ ॥৯॥

44.10

বিপ্রং হোতারমদ্রুহং ধূমকেতুং বিভাবসুম্ । যজ্ঞানাং কেতুমীমহে ॥১০॥

44.11

অগ্নে নি পাহি নস্ত্বং প্রতি ষ্ম দেব রীষতঃ । ভিন্ধি দ্বেষঃ সহস্কৃত ॥১১॥

44.12

অগ্নিঃ প্রত্নেন মন্মনা শুম্ভানস্তন্বং১ স্বাম্ । কবির্বিপ্রেণ বাবৃধে ॥১২॥

44.13

ঊর্জো নপাতমা হুবেঽগ্নিং পাবকশোচিষম্ । অস্মিন্যজ্ঞে স্বধ্বরে ॥১৩॥

44.14

স নো মিত্রমহস্ত্বমগ্নে শুক্রেণ শোচিষা । দেবৈরা সত্সি বর্হিষি ॥১৪॥

44.15

যো অগ্নিং তন্বো৩ দমে দেবং মর্তঃ সপর্যতি । তস্মা ইদ্দীদয়দ্বসু ॥১৫॥

44.16

অগ্নির্মূর্ধা দিবঃ ককুত্পতিঃ পৃথিব্যা অয়ম্ । অপাং রেতাংসি জিন্বতি ॥১৬॥

44.17

উদগ্নে শুচয়স্তব শুক্রা ভ্রাজন্ত ঈরতে । তব জ্যোতীংষ্যর্চয়ঃ ॥১৭॥

44.18

ঈশিষে বার্যস্য হি দাত্রস্যাগ্নে স্বর্পতিঃ । স্তোতা স্যাং তব শর্মণি ॥১৮॥

44.19

ত্বামগ্নে মনীষিণস্ত্বাং হিন্বন্তি চিত্তিভিঃ । ত্বাং বর্ধন্তু নো গিরঃ ॥১৯॥

44.20

অদব্ধস্য স্বধাবতো দূতস্য রেভতঃ সদা । অগ্নেঃ সখ্যং বৃণীমহে ॥২০॥

44.21

অগ্নিঃ শুচিব্রততমঃ শুচির্বিপ্রঃ শুচিঃ কবিঃ । শুচী রোচত আহুতঃ ॥২১॥

44.22

উত ত্বা ধীতয়ো মম গিরো বর্ধন্তু বিশ্বহা । অগ্নে সখ্যস্য বোধি নঃ ॥২২॥

44.23

যদগ্নে স্যামহং ত্বং ত্বং বা ঘা স্যা অহম্ । স্যুষ্টে সত্যা ইহাশিষঃ ॥২৩॥

44.24

বসুর্বসুপতির্হি কমস্যগ্নে বিভাবসুঃ । স্যাম তে সুমতাবপি ॥২৪॥

44.25

অগ্নে ধৃতব্রতায় তে সমুদ্রায়েব সিন্ধবঃ । গিরো বাশ্রাস ঈরতে ॥২৫॥

44.26

যুবানং বিশ্পতিং কবিং বিশ্বাদং পুরুবেপসম্ । অগ্নিং শুম্ভামি মন্মভিঃ ॥২৬॥

44.27

যজ্ঞানাং রথ্যে বয়ং তিগ্মজম্ভায় বীলবে । স্তোমৈরিষেমাগ্নয়ে ॥২৭॥

44.28

অয়মগ্নে ত্বে অপি জরিতা ভূতু সন্ত্য । তস্মৈ পাবক মৃলয় ॥২৮॥

44.29

ধীরো হ্যস্যদ্মসদ্বিপ্রো ন জাগৃবিঃ সদা । অগ্নে দীদয়সি দ্যবি ॥২৯॥

44.30

পুরাগ্নে দুরিতেভ্যঃ পুরা মৃধ্রেভ্যঃ কবে । প্র ণ আয়ুর্বসো তির ॥৩০॥