সূক্ত 39

39.1

১০ নাভাকঃ কাণ্বঃ। অগ্নিঃ । মহাপংক্তিঃ ।

অগ্নিমস্তোষ্যৃগ্মিয়মগ্নিমীলা যজধ্যৈ ।
অগ্নির্দেবাঁ অনক্তু ন উভে হি বিদথে কবিরন্তশ্চরতি দূত্যং১ নভন্তামন্যকে সমে ॥১॥

ন্যগ্নে নব্যসা বচস্তনূষু শংসমেষাম্ ।
ন্যরাতী ররাব্ণাং বিশ্বা অর্যো অরাতীরিতো যুচ্ছন্ত্বামুরো নভন্তামন্যকে সমে ॥২॥

অগ্নে মন্মানি তুভ্যং কং ঘৃতং ন জুহ্ব আসনি ।
স দেবেষু প্র চিকিদ্ধি ত্বং হ্যসি পূর্ব্যঃ শিবো দূতো বিবস্বতো নভন্তামন্যকে সমে ॥৩॥

তত্তদগ্নির্বয়ো দধে যথায়থা কৃপণ্যতি ।
ঊর্জাহুতির্বসূনাং শং চ যোশ্চ ময়ো দধে বিশ্বস্যৈ দেবহূত্যৈ নভন্তামন্যকে সমে ॥৪॥

স চিকেত সহীয়সাঽগ্নিশ্চিত্রেণ কর্মণা ।
স হোতা শশ্বতীনাং দক্ষিণাভিরভীবৃত ইনোতি চ প্রতীব্যং১ নভন্তামন্যকে সমে ॥৫॥

অগ্নির্জাতা দেবানামগ্নির্বেদ মর্তানামপীচ্যম্ ।
অগ্নিঃ স দ্রবিণোদা অগ্নির্দ্বারা ব্যূর্ণুতে স্বাহুতো নবীয়সা নভন্তামন্যকে সমে ॥৬॥

অগ্নির্দেবেষু সংবসুঃ স বিক্ষু যজ্ঞিয়াস্বা ।
স মুদা কাব্যা পুরু বিশ্বং ভূমেব পুষ্যতি দেবো দেবেষু যজ্ঞিয়ো নভন্তামন্যকে সমে ॥৭॥

যো অগ্নিঃ সপ্তমানুষঃ শ্রিতো বিশ্বেষু সিন্ধুষু ।
তমাগন্ম ত্রিপস্ত্যং মন্ধাতুর্দস্যুহন্তমমগ্নিং যজ্ঞেষু পূর্ব্যং নভন্তামন্যকে সমে ॥৮॥

অগ্নিস্ত্রীণি ত্রিধাতূন্যা ক্ষেতি বিদথা কবিঃ ।
স ত্রীঁরেকাদশাঁ ইহ যক্ষচ্চ পিপ্রয়চ্চ নো বিপ্রো দূতঃ পরিষ্কৃতো নভন্তামন্যকে সমে ॥৯॥

ত্বং নো অগ্ন আয়ুষু ত্বং দেবেষু পূর্ব্য বস্ব এক ইরজ্যসি ।
ত্বামাপঃ পরিস্রুতঃ পরি যন্তি স্বসেতবো নভন্তামন্যকে সমে ॥১০॥