Sukta 39

39.1

10 nabhakah kanvah, agnih, mahapanktih

अ॒ग्निम॑स्तोष्यृ॒ग्मिय॑म॒ग्निमी॒ळा य॒जध्यै॑ ।
अ॒ग्निर्दे॒वाँ अ॑नक्तु न उ॒भे हि वि॒दथे॑ क॒विर॒न्तश्चर॑ति दू॒त्यं१ नभ॑न्तामन्य॒के स॑मे ॥१॥

Agnimastoshyrigmiyamagnimila yajadhyai
Agnirdevam anaktu na ubhe hi vidathe kavirantashcharati dutyan1 nabhantamanyake same

39.2

न्य॑ग्ने॒ नव्य॑सा॒ वच॑स्त॒नूषु॒ शंस॑मेषाम् ।
न्यरा॑ती॒ ररा॑व्णां॒ विश्वा॑ अ॒र्यो अरा॑तीरि॒तो यु॑च्छन्त्वा॒मुरो॒ नभ॑न्तामन्य॒के स॑मे ॥२॥

Nyagne navyasa vachastanushu shansamesham
Nyarati raravnam vishva aryo aratirito yuchchhantvamuro nabhantamanyake same

39.3

अग्ने॒ मन्मा॑नि॒ तुभ्यं॒ कं घृ॒तं न जु॑ह्व आ॒सनि॑ ।
स दे॒वेषु॒ प्र चि॑किद्धि॒ त्वं ह्यसि॑ पू॒र्व्यः शि॒वो दू॒तो वि॒वस्व॑तो॒ नभ॑न्तामन्य॒के स॑मे ॥३॥

Agne manmani tubhyam kam ghritam na juhva asani
Sa deveshu pra chikiddhi tvam hyasi purvyah shivo duto vivasvato nabhantamanyake same

39.4

तत्त॑द॒ग्निर्वयो॑ दधे॒ यथा॑यथा कृप॒ण्यति॑ ।
ऊ॒र्जाहु॑ति॒र्वसू॑नां॒ शं च॒ योश्च॒ मयो॑ दधे॒ विश्व॑स्यै दे॒वहू॑त्यै॒ नभ॑न्तामन्य॒के स॑मे ॥४॥

Tattadagnirvayo dadhe yathayatha kripanyati
Urjahutirvasunam sham cha yoshcha mayo dadhe vishvasyai devahutyai nabhantamanyake same

39.5

स चि॑केत॒ सही॑यसा॒ऽग्निश्चि॒त्रेण॒ कर्म॑णा ।
स होता॒ शश्व॑तीनां॒ दक्षि॑णाभिर॒भीवृ॑त इ॒नोति॑ च प्रती॒व्यं१ नभ॑न्तामन्य॒के स॑मे ॥५॥

Sa chiketa sahiyasagnishchitrena karmana
Sa hota shashvatinam dakshinabhirabhivrita inoti cha prativyan1 nabhantamanyake same

39.6

अ॒ग्निर्जा॒ता दे॒वाना॑म॒ग्निर्वे॑द॒ मर्ता॑नामपी॒च्य॑म् ।
अ॒ग्निः स द्र॑विणो॒दा अ॒ग्निर्द्वारा॒ व्यू॑र्णुते॒ स्वा॑हुतो॒ नवी॑यसा॒ नभ॑न्तामन्य॒के स॑मे ॥६॥

Agnirjata devanamagnirveda martanamapichyam
Agnih sa dravinoda agnirdvara vyurnute svahuto naviyasa nabhantamanyake same

39.7

अ॒ग्निर्दे॒वेषु॒ संव॑सु॒ः स वि॒क्षु य॒ज्ञिया॒स्वा ।
स मु॒दा काव्या॑ पु॒रु विश्वं॒ भूमे॑व पुष्यति दे॒वो दे॒वेषु॑ य॒ज्ञियो॒ नभ॑न्तामन्य॒के स॑मे ॥७॥

Agnirdeveshu sanvasuh sa vikshu yagyiyasva
Sa muda kavya puru vishvam bhumeva pushyati devo deveshu yagyiyo nabhantamanyake same

39.8

यो अ॒ग्निः स॒प्तमा॑नुषः श्रि॒तो विश्वे॑षु॒ सिन्धु॑षु ।
तमाग॑न्म त्रिप॒स्त्यं म॑न्धा॒तुर्द॑स्यु॒हन्त॑मम॒ग्निं य॒ज्ञेषु॑ पू॒र्व्यं नभ॑न्तामन्य॒के स॑मे ॥८॥

Yo agnih saptamanushah shrito vishveshu sindhushu
Tamaganma tripastyam mandhaturdasyuhantamamagnim yagyeshu purvyam nabhantamanyake same

39.9

अ॒ग्निस्त्रीणि॑ त्रि॒धातू॒न्या क्षे॑ति वि॒दथा॑ क॒विः ।
स त्रीँरे॑काद॒शाँ इ॒ह यक्ष॑च्च पि॒प्रय॑च्च नो॒ विप्रो॑ दू॒तः परि॑ष्कृतो॒ नभ॑न्तामन्य॒के स॑मे ॥९॥

Agnistrini tridhatunya ksheti vidatha kavih
Sa trinrekadasham iha yakshachcha piprayachcha no vipro dutah parishkrito nabhantamanyake same

39.10

त्वं नो॑ अग्न आ॒युषु॒ त्वं दे॒वेषु॑ पूर्व्य॒ वस्व॒ एक॑ इरज्यसि ।
त्वामाप॑ः परि॒स्रुत॒ः परि॑ यन्ति॒ स्वसे॑तवो॒ नभ॑न्तामन्य॒के स॑मे ॥१०॥

Tvam no agna ayushu tvam deveshu purvya vasva eka irajyasi
Tvamapah parisrutah pari yanti svasetavo nabhantamanyake same