সূক্ত 27

27.1

২২ মনুর্বৈবস্বতঃ ।বিশ্বে দেবাঃ ।প্রগাথঃ = ( বিষমা বৃহতী, সমা সতোবৃহতী ) ।

অগ্নিরুক্থে পুরোহিতো গ্রাবাণো বর্হিরধ্বরে । ঋচা যামি মরুতো ব্রহ্মণস্পতিং দেবাঁ অবো বরেণ্যম্ ॥১॥

আ পশুং গাসি পৃথিবীং বনস্পতীনুষাসা নক্তমোষধীঃ ।
বিশ্বে চ নো বসবো বিশ্ববেদসো ধীনাং ভূত প্রাবিতারঃ ॥২॥

প্র সূ ন এত্বধ্বরো৩ঽগ্না দেবেষু পূর্ব্যঃ । আদিত্যেষু প্র বরুণে ধৃতব্রতে মরুত্সু বিশ্বভানুষু ॥৩॥

বিশ্বে হি ষ্মা মনবে বিশ্ববেদসো ভুবন্বৃধে রিশাদসঃ । অরিষ্টেভিঃ পায়ুভির্বিশ্ববেদসো যন্তা নোঽবৃকং ছর্দিঃ ॥৪॥

আ নো অদ্য সমনসো গন্তা বিশ্বে সজোষসঃ । ঋচা গিরা মরুতো দেব্যদিতে সদনে পস্ত্যে মহি ॥৫॥

অভি প্রিয়া মরুতো যা বো অশ্ব্যা হব্যা মিত্র প্রয়াথন ।
আ বর্হিরিন্দ্রো বরুণস্তুরা নর আদিত্যাসঃ সদন্তু নঃ ॥৬॥

বয়ং বো বৃক্তবর্হিষো হিতপ্রয়স আনুষক্ । সুতসোমাসো বরুণ হবামহে মনুষ্বদিদ্ধাগ্নয়ঃ ॥৭॥

আ প্র যাত মরুতো বিষ্ণো অশ্বিনা পূষন্মাকীনয়া ধিয়া ।
ইন্দ্র আ যাতু প্রথমঃ সনিষ্যুভির্বৃষা যো বৃত্রহা গৃণে ॥৮॥

বি নো দেবাসো অদ্রুহোঽচ্ছিদ্রং শর্ম যচ্ছত । ন যদ্দূরাদ্বসবো নূ চিদন্তিতো বরূথমাদধর্ষতি ॥৯॥

অস্তি হি বঃ সজাত্যং রিশাদসো দেবাসো অস্ত্যাপ্যম্ ।
প্র ণঃ পূর্বস্মৈ সুবিতায় বোচত মক্ষূ সুম্নায় নব্যসে ॥১০॥

ইদা হি ব উপস্তুতিমিদা বামস্য ভক্তয়ে । উপ বো বিশ্ববেদসো নমস্যুরাঁ অসৃক্ষ্যন্যামিব ॥১১॥

উদু ষ্য বঃ সবিতা সুপ্রণীতয়োঽস্থাদূর্ধ্বো বরেণ্যঃ । নি দ্বিপাদশ্চতুষ্পাদো অর্থিনোঽবিশ্রন্পতয়িষ্ণবঃ ॥১২॥

দেবংদেবং বোঽবসে দেবংদেবমভিষ্টয়ে । দেবংদেবং হুবেম বাজসাতয়ে গৃণন্তো দেব্যা ধিয়া ॥১৩॥

দেবাসো হি ষ্মা মনবে সমন্যবো বিশ্বে সাকং সরাতয়ঃ ।
তে নো অদ্য তে অপরং তুচে তু নো ভবন্তু বরিবোবিদঃ ॥১৪॥

প্র বঃ শংসাম্যদ্রুহঃ সংস্থ উপস্তুতীনাম্ । ন তং ধূর্তির্বরুণ মিত্র মর্ত্যং যো বো ধামভ্যোঽবিধৎ ॥১৫॥

প্র স ক্ষয়ং তিরতে বি মহীরিষো যো বো বরায় দাশতি । প্র প্রজাভির্জায়তে ধর্মণস্পর্যরিষ্টঃ সর্ব এধতে ॥১৬॥

ঋতে স বিন্দতে যুধঃ সুগেভির্যাত্যধ্বনঃ । অর্যমা মিত্রো বরুণঃ সরাতয়ো যং ত্রায়ন্তে সজোষসঃ ॥১৭॥

অজ্রে চিদস্মৈ কৃণুথা ন্যঞ্চনং দুর্গে চিদা সুসরণম্ । এষা চিদস্মাদশনিঃ পরো নু সাস্রেধন্তী বি নশ্যতু ॥১৮॥

যদদ্য সূর্য উদ্যতি প্রিয়ক্ষত্রা ঋতং দধ । যন্নিম্রুচি প্রবুধি বিশ্ববেদসো যদ্বা মধ্যংদিনে দিবঃ ॥১৯॥

যদ্বাভিপিত্বে অসুরা ঋতং যতে ছর্দির্যেম বি দাশুষে । বয়ং তদ্বো বসবো বিশ্ববেদস উপ স্থেয়াম মধ্য আ ॥২০॥

যদদ্য সূর উদিতে যন্মধ্যংদিন আতুচি । বামং ধত্থ মনবে বিশ্ববেদসো জুহ্বানায় প্রচেতসে ॥২১॥

বয়ং তদ্বঃ সম্রাজ আ বৃণীমহে পুত্রো ন বহুপায্যম্ ।
অশ্যাম তদাদিত্যা জুহ্বতো হবির্যেন বস্যোঽনশামহৈ ॥২২॥