সূক্ত 23

23.1

৩০ বিশ্বমনা বৈয়শ্বঃ । অগ্নি : ।উষ্ণিক্ ।

ঈলিষ্বা হি প্রতীব্যং১ যজস্ব জাতবেদসম্ । চরিষ্ণুধূমমগৃভীতশোচিষম্ ॥১॥

23.2

দামানং বিশ্বচর্ষণেঽগ্নিং বিশ্বমনো গিরা । উত স্তুষে বিষ্পর্ধসো রথানাম্ ॥২॥

23.3

যেষামাবাধ ঋগ্মিয় ইষঃ পৃক্ষশ্চ নিগ্রভে । উপবিদা বহ্নির্বিন্দতে বসু ॥৩॥

23.4

উদস্য শোচিরস্থাদ্দীদিয়ুষো ব্য১জরম্ । তপুর্জম্ভস্য সুদ্যুতো গণশ্রিয়ঃ ॥৪॥

23.5

উদু তিষ্ঠ স্বধ্বর স্তবানো দেব্যা কৃপা । অভিখ্যা ভাসা বৃহতা শুশুক্বনিঃ ॥৫॥

23.6

অগ্নে যাহি সুশস্তিভির্হব্যা জুহ্বান আনুষক্ । যথা দূতো বভূথ হব্যবাহনঃ ॥৬॥

23.7

অগ্নিং বঃ পূর্ব্যং হুবে হোতারং চর্ষণীনাম্ । তময়া বাচা গৃণে তমু বঃ স্তুষে ॥৭॥

23.8

যজ্ঞেভিরদ্ভুতক্রতুং যং কৃপা সূদয়ন্ত ইৎ । মিত্রং ন জনে সুধিতমৃতাবনি ॥৮॥

23.9

ঋতাবানমৃতায়বো যজ্ঞস্য সাধনং গিরা । উপো এনং জুজুষুর্নমসস্পদে ॥৯॥

23.10

অচ্ছা নো অঙ্গিরস্তমং যজ্ঞাসো যন্তু সংয়তঃ । হোতা যো অস্তি বিক্ষ্বা যশস্তমঃ ॥১০॥

23.11

অগ্নে তব ত্যে অজরেন্ধানাসো বৃহদ্ভাঃ । অশ্বা ইব বৃষণস্তবিষীয়বঃ ॥১১॥

23.12

স ত্বং ন ঊর্জাং পতে রয়িং রাস্ব সুবীর্যম্ । প্রাব নস্তোকে তনয়ে সমত্স্বা ॥১২॥

23.13

যদ্বা উ বিশ্পতিঃ শিতঃ সুপ্রীতো মনুষো বিশি । বিশ্বেদগ্নিঃ প্রতি রক্ষাংসি সেধতি ॥১৩॥

23.14

শ্রুষ্ট্যগ্নে নবস্য মে স্তোমস্য বীর বিশ্পতে । নি মায়িনস্তপুষা রক্ষসো দহ ॥১৪॥

23.15

ন তস্য মায়য়া চন রিপুরীশীত মর্ত্যঃ । যো অগ্নয়ে দদাশ হব্যদাতিভিঃ ॥১৫॥

23.16

ব্যশ্বস্ত্বা বসুবিদমুক্ষণ্যুরপ্রীণাদৃষিঃ । মহো রায়ে তমু ত্বা সমিধীমহি ॥১৬॥

23.17

উশনা কাব্যস্ত্বা নি হোতারমসাদয়ৎ । আয়জিং ত্বা মনবে জাতবেদসম্ ॥১৭॥

23.18

বিশ্বে হি ত্বা সজোষসো দেবাসো দূতমক্রত । শ্রুষ্টী দেব প্রথমো যজ্ঞিয়ো ভুবঃ ॥১৮॥

23.19

ইমং ঘা বীরো অমৃতং দূতং কৃণ্বীত মর্ত্যঃ । পাবকং কৃষ্ণবর্তনিং বিহায়সম্ ॥১৯॥

23.20

তং হুবেম যতস্রুচঃ সুভাসং শুক্রশোচিষম্ । বিশামগ্নিমজরং প্রত্নমীড্যম্ ॥২০॥

23.21

যো অস্মৈ হব্যদাতিভিরাহুতিং মর্তোঽবিধৎ । ভূরি পোষং স ধত্তে বীরবদ্যশঃ ॥২১॥

23.22

প্রথমং জাতবেদসমগ্নিং যজ্ঞেষু পূর্ব্যম্ । প্রতি স্রুগেতি নমসা হবিষ্মতী ॥২২॥

23.23

আভির্বিধেমাগ্নয়ে জ্যেষ্ঠাভির্ব্যশ্ববৎ । মংহিষ্ঠাভির্মতিভিঃ শুক্রশোচিষে ॥২৩॥

23.24

নূনমর্চ বিহায়সে স্তোমেভিঃ স্থূরয়ূপবৎ । ঋষে বৈয়শ্ব দম্যায়াগ্নয়ে ॥২৪॥

23.25

অতিথিং মানুষাণাং সূনুং বনস্পতীনাম্ । বিপ্রা অগ্নিমবসে প্রত্নমীলতে ॥২৫॥

23.26

মহো বিশ্বাঁ অভি ষতো৩ঽভি হব্যানি মানুষা । অগ্নে নি ষত্সি নমসাধি বর্হিষি ॥২৬॥

23.27

বংস্বা নো বার্যা পুরু বংস্ব রায়ঃ পুরুস্পৃহঃ । সুবীর্যস্য প্রজাবতো যশস্বতঃ ॥২৭॥

23.28

ত্বং বরো সুষাম্ণেঽগ্নে জনায় চোদয় । সদা বসো রাতিং যবিষ্ঠ শশ্বতে ॥২৮॥

23.29

ত্বং হি সুপ্রতূরসি ত্বং নো গোমতীরিষঃ । মহো রায়ঃ সাতিমগ্নে অপা বৃধি ॥২৯॥

23.30

অগ্নে ত্বং যশা অস্যা মিত্রাবরুণা বহ । ঋতাবানা সম্রাজা পূতদক্ষসা ॥৩০॥