সূক্ত 22

22.1

১৮ সোভরি : কাণ্বঃ।অশ্বিনৌ ।১-৬ প্রগাথঃ = ( বিষমা বৃহতী , সমা সতোবৃহতী ), ৭ বৃহতী , ৮ অনুষ্টুপ্ , ১১ ককুপ্ , ১২ মধ্যেজ্যোতিঃ, প্রগাথঃ=(৯ ,১৩,১৫,১৭ ককুপ্ ; ১০, ১৪ ,১৬ ,১৮ সতোবৃহতী ) ।

ও ত্যমহ্ব আ রথমদ্যা দংসিষ্ঠমূতয়ে । যমশ্বিনা সুহবা রুদ্রবর্তনী আ সূর্যায়ৈ তস্থথুঃ ॥১॥

22.2

পূর্বাপুষং সুহবং পুরুস্পৃহং ভুজ্যুং বাজেষু পূর্ব্যম্ । সচনাবন্তং সুমতিভিঃ সোভরে বিদ্বেষসমনেহসম্ ॥২॥

22.3

ইহ ত্যা পুরুভূতমা দেবা নমোভিরশ্বিনা । অর্বাচীনা স্ববসে করামহে গন্তারা দাশুষো গৃহম্ ॥৩॥

22.4

যুবো রথস্য পরি চক্রমীয়ত ঈর্মান্যদ্বামিষণ্যতি ।
অস্মাঁ অচ্ছা সুমতির্বাং শুভস্পতী আ ধেনুরিব ধাবতু ॥৪॥

22.5

রথো যো বাং ত্রিবন্ধুরো হিরণ্যাভীশুরশ্বিনা । পরি দ্যাবাপৃথিবী ভূষতি শ্রুতস্তেন নাসত্যা গতম্ ॥৫॥

22.6

দশস্যন্তা মনবে পূর্ব্যং দিবি যবং বৃকেণ কর্ষথঃ । তা বামদ্য সুমতিভিঃ শুভস্পতী অশ্বিনা প্র স্তুবীমহি ॥৬॥

22.7

উপ নো বাজিনীবসূ যাতমৃতস্য পথিভিঃ । যেভিস্তৃক্ষিং বৃষণা ত্রাসদস্যবং মহে ক্ষত্রায় জিন্বথঃ ॥৭॥

22.8

অয়ং বামদ্রিভিঃ সুতঃ সোমো নরা বৃষণ্বসূ । আ যাতং সোমপীতয়ে পিবতং দাশুষো গৃহে ॥৮॥

22.9

আ হি রুহতমশ্বিনা রথে কোশে হিরণ্যয়ে বৃষণ্বসূ । যুঞ্জাথাং পীবরীরিষঃ ॥৯॥

22.10

যাভিঃ পক্থমবথো যাভিরধ্রিগুং যাভির্বভ্রুং বিজোষসম্ ।
তাভির্নো মক্ষূ তূয়মশ্বিনা গতং ভিষজ্যতং যদাতুরম্ ॥১০॥

22.11

যদধ্রিগাবো অধ্রিগূ ইদা চিদহ্নো অশ্বিনা হবামহে । বয়ং গীর্ভির্বিপন্যবঃ ॥১১॥

22.12

তাভিরা যাতং বৃষণোপ মে হবং বিশ্বপ্সুং বিশ্ববার্যম্ ।
ইষা মংহিষ্ঠা পুরুভূতমা নরা যাভিঃ ক্রিবিং বাবৃধুস্তাভিরা গতম্ ॥১২॥

22.13

তাবিদা চিদহানাং তাবশ্বিনা বন্দমান উপ ব্রুবে । তা ঊ নমোভিরীমহে ॥১৩॥

22.14

তাবিদ্দোষা তা উষসি শুভস্পতী তা যামন্রুদ্রবর্তনী ।
মা নো মর্তায় রিপবে বাজিনীবসূ পরো রুদ্রাবতি খ্যতম্ ॥১৪॥

22.15

আ সুগ্ম্যায় সুগ্ম্যং প্রাতা রথেনাশ্বিনা বা সক্ষণী । হুবে পিতেব সোভরী ॥১৫॥

22.16

মনোজবসা বৃষণা মদচ্যুতা মক্ষুংগমাভিরূতিভিঃ । আরাত্তাচ্চিদ্ভূতমস্মে অবসে পূর্বীভিঃ পুরুভোজসা ॥১৬॥

22.17

আ নো অশ্বাবদশ্বিনা বর্তির্যাসিষ্টং মধুপাতমা নরা । গোমদ্দস্রা হিরণ্যবৎ ॥১৭॥

22.18

সুপ্রাবর্গং সুবীর্যং সুষ্ঠু বার্যমনাধৃষ্টং রক্ষস্বিনা । অস্মিন্না বামায়ানে বাজিনীবসূ বিশ্বা বামানি ধীমহি ॥১৮॥