সূক্ত 21

21.1

১৮ সোভরিঃ কাণ্বঃ। ইন্দ্রঃ ১৭ -১৮ চিত্রঃ । প্রগাথঃ = (বিষমা ককুপ্ , সমা সতোবৃহতী ) ।

বয়মু ত্বামপূর্ব্য স্থূরং ন কচ্চিদ্ভরন্তোঽবস্যবঃ । বাজে চিত্রং হবামহে ॥১॥

উপ ত্বা কর্মন্নূতয়ে স নো যুবোগ্রশ্চক্রাম যো ধৃষৎ । ত্বামিদ্ধ্যবিতারং ববৃমহে সখায় ইন্দ্র সানসিম্ ॥২॥

আ যাহীম ইন্দবোঽশ্বপতে গোপত উর্বরাপতে । সোমং সোমপতে পিব ॥৩॥

বয়ং হি ত্বা বন্ধুমন্তমবন্ধবো বিপ্রাস ইন্দ্র যেমিম ।
যা তে ধামানি বৃষভ তেভিরা গহি বিশ্বেভিঃ সোমপীতয়ে ॥৪॥

সীদন্তস্তে বয়ো যথা গোশ্রীতে মধৌ মদিরে বিবক্ষণে । অভি ত্বামিন্দ্র নোনুমঃ ॥৫॥

অচ্ছা চ ত্বৈনা নমসা বদামসি কিং মুহুশ্চিদ্বি দীধয়ঃ ।
সন্তি কামাসো হরিবো দদিষ্ট্বং স্মো বয়ং সন্তি নো ধিয়ঃ ॥৬॥

নূত্না ইদিন্দ্র তে বয়মূতী অভূম নহি নূ তে অদ্রিবঃ । বিদ্মা পুরা পরীণসঃ ॥৭॥

বিদ্মা সখিত্বমুত শূর ভোজ্য১মা তে তা বজ্রিন্নীমহে ।
উতো সমস্মিন্না শিশীহি নো বসো বাজে সুশিপ্র গোমতি ॥৮॥

যো ন ইদমিদং পুরা প্র বস্য আনিনায় তমু বঃ স্তুষে । সখায় ইন্দ্রমূতয়ে ॥৯॥

হর্যশ্বং সত্পতিং চর্ষণীসহং স হি ষ্মা যো অমন্দত ।
আ তু নঃ স বয়তি গব্যমশ্ব্যং স্তোতৃভ্যো মঘবা শতম্ ॥১০॥

ত্বয়া হ স্বিদ্যুজা বয়ং প্রতি শ্বসন্তং বৃষভ ব্রুবীমহি । সংস্থে জনস্য গোমতঃ ॥১১॥

জয়েম কারে পুরুহূত কারিণোঽভি তিষ্ঠেম দূঢ্যঃ । নৃভির্বৃত্রং হন্যাম শূশুয়াম চাঽবেরিন্দ্র প্র ণো ধিয়ঃ ॥১২॥

অভ্রাতৃব্যো অনা ত্বমনাপিরিন্দ্র জনুষা সনাদসি । যুধেদাপিত্বমিচ্ছসে ॥১৩॥

নকী রেবন্তং সখ্যায় বিন্দসে পীয়ন্তি তে সুরাশ্বঃ । যদা কৃণোষি নদনুং সমূহস্যাদিত্পিতেব হূয়সে ॥১৪॥

মা তে অমাজুরো যথা মূরাস ইন্দ্র সখ্যে ত্বাবতঃ । নি ষদাম সচা সুতে ॥১৫॥

মা তে গোদত্র নিররাম রাধস ইন্দ্র মা তে গৃহামহি । দৃল্হা চিদর্যঃ প্র মৃশাভ্যা ভর ন তে দামান আদভে ॥১৬॥

ইন্দ্রো বা ঘেদিয়ন্মঘং সরস্বতী বা সুভগা দদির্বসু । ত্বং বা চিত্র দাশুষে ॥১৭॥

চিত্র ইদ্রাজা রাজকা ইদন্যকে যকে সরস্বতীমনু । পর্জন্য ইব ততনদ্ধি বৃষ্ট্যা সহস্রময়ুতা দদৎ ॥১৮॥