সূক্ত 103

103.1

১৪ সৌভরিঃ কাণ্বঃ ।অগ্নিঃ; ১৪ অগ্নামরুতঃ । বৃহতী; ৫ বিরাড্রূপা; ৭,৯,১১,১৩ সতোবৃহতী ; ৮,১২ ককুপ্ ; ১০ হ্রসীয়সী; ১৪ অনুষ্টুপ্ ।

অদর্শি গাতুবিত্তমো যস্মিন্ব্রতান্যাদধুঃ । উপো ষু জাতমার্যস্য বর্ধনমগ্নিং নক্ষন্ত নো গিরঃ ॥১॥

প্র দৈবোদাসো অগ্নির্দেবাঁ অচ্ছা ন মজ্মনা । অনু মাতরং পৃথিবীং বি বাবৃতে তস্থৌ নাকস্য সানবি ॥২॥

যস্মাদ্রেজন্ত কৃষ্টয়শ্চর্কৃত্যানি কৃণ্বতঃ । সহস্রসাং মেধসাতাবিব ত্মনাঽগ্নিং ধীভিঃ সপর্যত ॥৩॥

প্র যং রায়ে নিনীষসি মর্তো যস্তে বসো দাশৎ । স বীরং ধত্তে অগ্ন উক্থশংসিনং ত্মনা সহস্রপোষিণম্ ॥৪॥

স দৃল্হে চিদভি তৃণত্তি বাজমর্বতা স ধত্তে অক্ষিতি শ্রবঃ ।
ত্বে দেবত্রা সদা পুরূবসো বিশ্বা বামানি ধীমহি ॥৫॥

যো বিশ্বা দয়তে বসু হোতা মন্দ্রো জনানাম্ । মধোর্ন পাত্রা প্রথমান্যস্মৈ প্র স্তোমা যন্ত্যগ্নয়ে ॥৬॥

অশ্বং ন গীর্ভী রথ্যং সুদানবো মর্মৃজ্যন্তে দেবয়বঃ । উভে তোকে তনয়ে দস্ম বিশ্পতে পর্ষি রাধো মঘোনাম্ ॥৭॥

প্র মংহিষ্ঠায় গায়ত ঋতাব্নে বৃহতে শুক্রশোচিষে । উপস্তুতাসো অগ্নয়ে ॥৮॥

আ বংসতে মঘবা বীরবদ্যশঃ সমিদ্ধো দ্যুম্ন্যাহুতঃ । কুবিন্নো অস্য সুমতির্নবীয়স্যচ্ছা বাজেভিরাগমৎ ॥৯॥

প্রেষ্ঠমু প্রিয়াণাং স্তুহ্যাসাবাতিথিম্ । অগ্নিং রথানাং যমম্ ॥১০॥

উদিতা যো নিদিতা বেদিতা বস্বা যজ্ঞিয়ো ববর্ততি । দুষ্টরা যস্য প্রবণে নোর্ময়ো ধিয়া বাজ সিষাসতঃ ॥১১॥

মা নো হৃণীতামতিথির্বসুরগ্নিঃ পুরুপ্রশস্ত এষঃ । যঃ সুহোতা স্বধ্বরঃ ॥১২॥

মো তে রিষন্যে অচ্ছোক্তিভির্বসোঽগ্নে কেভিশ্চিদেবৈঃ । কীরিশ্চিদ্ধি ত্বামীট্টে দূত্যায় রাতহব্যঃ স্বধ্বরঃ ॥১৩॥

আগ্নে যাহি মরুত্সখা রুদ্রেভিঃ সোমপীতয়ে । সোভর্যা উপ সুষ্টুতিং মাদয়স্ব স্বর্ণরে ॥১৪॥