Sukta 103

103.1

14 saubharih kanvah, agnih; 14 agnamarutah, brihati; 5 viradrupa; 7, 9, 11, 13 satobrihati ; 8, 12 kakup ; 10 hrasiyasi; 14 anushtup

अद॑र्शि गातु॒वित्त॑मो॒ यस्मि॑न्व्र॒तान्या॑द॒धुः । उपो॒ षु जा॒तमार्य॑स्य॒ वर्ध॑नम॒ग्निं न॑क्षन्त नो॒ गिर॑ः ॥१॥

Adarshi gatuvittamo yasminvratanyadadhuh, upo shu jatamaryasya vardhanamagnim nakshanta no girah

प्र दैवो॑दासो अ॒ग्निर्दे॒वाँ अच्छा॒ न म॒ज्मना॑ । अनु॑ मा॒तरं॑ पृथि॒वीं वि वा॑वृते त॒स्थौ नाक॑स्य॒ सान॑वि ॥२॥

Pra daivodaso agnirdevam achchha na majmana, anu mataram prithivim vi vavrite tasthau nakasya sanavi

यस्मा॒द्रेज॑न्त कृ॒ष्टय॑श्च॒र्कृत्या॑नि कृण्व॒तः । स॒ह॒स्र॒सां मे॒धसा॑ताविव॒ त्मना॒ऽग्निं धी॒भिः स॑पर्यत ॥३॥

Yasmadrejanta krishtayashcharkrityani krinvatah, sahasrasam medhasataviva tmanagnim dhibhih saparyata

प्र यं रा॒ये निनी॑षसि॒ मर्तो॒ यस्ते॑ वसो॒ दाश॑त् । स वी॒रं ध॑त्ते अग्न उक्थशं॒सिनं॒ त्मना॑ सहस्रपो॒षिण॑म् ॥४॥

Pra yam raye ninishasi marto yaste vaso dashat, sa viram dhatte agna ukthashansinam tmana sahasraposhinam

स दृ॒ळ्हे चि॑द॒भि तृ॑णत्ति॒ वाज॒मर्व॑ता॒ स ध॑त्ते॒ अक्षि॑ति॒ श्रव॑ः ।
त्वे दे॑व॒त्रा सदा॑ पुरूवसो॒ विश्वा॑ वा॒मानि॑ धीमहि ॥५॥

Sa drilhe chidabhi trinatti vajamarvata sa dhatte akshiti shravah
Tve devatra sada puruvaso vishva vamani dhimahi

यो विश्वा॒ दय॑ते॒ वसु॒ होता॑ म॒न्द्रो जना॑नाम् । मधो॒र्न पात्रा॑ प्रथ॒मान्य॑स्मै॒ प्र स्तोमा॑ यन्त्य॒ग्नये॑ ॥६॥

Yo vishva dayate vasu hota mandro jananam, madhorna patra prathamanyasmai pra stoma yantyagnaye

अश्वं॒ न गी॒र्भी र॒थ्यं॑ सु॒दान॑वो मर्मृ॒ज्यन्ते॑ देव॒यव॑ः । उ॒भे तो॒के तन॑ये दस्म विश्पते॒ पर्षि॒ राधो॑ म॒घोना॑म् ॥७॥

Ashvam na girbhi rathyam sudanavo marmrijyante devayavah, ubhe toke tanaye dasma vishpate parshi radho maghonam

प्र मंहि॑ष्ठाय गायत ऋ॒ताव्ने॑ बृह॒ते शु॒क्रशो॑चिषे । उप॑स्तुतासो अ॒ग्नये॑ ॥८॥

Pra manhishthaya gayata ritavne brihate shukrashochishe, upastutaso agnaye

आ वं॑सते म॒घवा॑ वी॒रव॒द्यश॒ः समि॑द्धो द्यु॒म्न्याहु॑तः । कु॒विन्नो॑ अस्य सुम॒तिर्नवी॑य॒स्यच्छा॒ वाजे॑भिरा॒गम॑त् ॥९॥

A vansate maghava viravadyashah samiddho dyumnyahutah, kuvinno asya sumatirnaviyasyachchha vajebhiragamat

प्रेष्ठ॑मु प्रि॒याणां॑ स्तु॒ह्या॑सा॒वाति॑थिम् । अ॒ग्निं रथा॑नां॒ यम॑म् ॥१०॥

Preshthamu priyanam stuhyasavatithim, agnim rathanam yamam

उदि॑ता॒ यो निदि॑ता॒ वेदि॑ता॒ वस्वा य॒ज्ञियो॑ व॒वर्त॑ति । दु॒ष्टरा॒ यस्य॑ प्रव॒णे नोर्मयो॑ धि॒या वाज॒ सिषा॑सतः ॥११॥

Udita yo nidita vedita vasva yagyiyo vavartati, dushtara yasya pravane normayo dhiya vaja sishasatah

मा नो॑ हृणीता॒मति॑थि॒र्वसु॑र॒ग्निः पु॑रुप्रश॒स्त ए॒षः । यः सु॒होता॑ स्वध्व॒रः ॥१२॥

Ma no hrinitamatithirvasuragnih puruprashasta eshah, yah suhota svadhvarah

मो ते रि॑ष॒न्ये अच्छो॑क्तिभिर्व॒सोऽग्ने॒ केभि॑श्चि॒देवै॑ः । की॒रिश्चि॒द्धि त्वामीट्टे॑ दू॒त्या॑य रा॒तह॑व्यः स्वध्व॒रः ॥१३॥

Mo te rishanye achchhoktibhirvasogne kebhishchidevaih, kirishchiddhi tvamitte dutyaya ratahavyah svadhvarah

आग्ने॑ याहि म॒रुत्स॑खा रु॒द्रेभि॒ः सोम॑पीतये । सोभ॑र्या॒ उप॑ सुष्टु॒तिं मा॒दय॑स्व॒ स्व॑र्णरे ॥१४॥

Agne yahi marutsakha rudrebhih somapitaye, sobharya upa sushtutim madayasva svarnare