সূক্ত 102

102.1

২২ ভার্গবঃ প্রয়োগঃ, অগ্নির্বার্হস্পত্যঃ, পাবকো বা, সহসঃ পুত্রৌ গৃহপতি-যবিষ্ঠৌ তয়োর্বান্যতরঃ । অগ্নিঃ । গায়ত্রী ।

ত্বমগ্নে বৃহদ্বয়ো দধাসি দেব দাশুষে । কবির্গৃহপতির্যুবা ॥১॥

স ন ঈলানয়া সহ দেবাঁ অগ্নে দুবস্যুবা । চিকিদ্বিভানবা বহ ॥২॥

ত্বয়া হ স্বিদ্যুজা বয়ং চোদিষ্ঠেন যবিষ্ঠ্য । অভি ষ্মো বাজসাতয়ে ॥৩॥

ঔর্বভৃগুবচ্ছুচিমপ্নবানবদা হুবে । অগ্নিং সমুদ্রবাসসম্ ॥৪॥

হুবে বাতস্বনং কবিং পর্জন্যক্রন্দ্যং সহঃ । অগ্নিং সমুদ্রবাসসম্ ॥৫॥

আ সবং সবিতুর্যথা ভগস্যেব ভুজিং হুবে । অগ্নিং সমুদ্রবাসসম্ ॥৬॥

অগ্নিং বো বৃধন্তমধ্বরাণাং পুরূতমম্ । অচ্ছা নপ্ত্রে সহস্বতে ॥৭॥

অয়ং যথা ন আভুবত্ত্বষ্টা রূপেব তক্ষ্যা । অস্য ক্রত্বা যশস্বতঃ ॥৮॥

অয়ং বিশ্বা অভি শ্রিয়োঽগ্নির্দেবেষু পত্যতে । আ বাজৈরুপ নো গমৎ ॥৯॥

বিশ্বেষামিহ স্তুহি হোতৄণাং যশস্তমম্ । অগ্নিং যজ্ঞেষু পূর্ব্যম্ ॥১০॥

শীরং পাবকশোচিষং জ্যেষ্ঠো যো দমেষ্বা । দীদায় দীর্ঘশ্রুত্তমঃ ॥১১॥

তমর্বন্তং ন সানসিং গৃণীহি বিপ্র শুষ্মিণম্ । মিত্রং ন যাতয়জ্জনম্ ॥১২॥

উপ ত্বা জাময়ো গিরো দেদিশতীর্হবিষ্কৃতঃ । বায়োরনীকে অস্থিরন্ ॥১৩॥

যস্য ত্রিধাত্ববৃতং বর্হিস্তস্থাবসংদিনম্ । আপশ্চিন্নি দধা পদম্ ॥১৪॥

পদং দেবস্য মীল্হুষোঽনাধৃষ্টাভিরূতিভিঃ । ভদ্রা সূর্য ইবোপদৃক্ ॥১৫॥

অগ্নে ঘৃতস্য ধীতিভিস্তেপানো দেব শোচিষা । আ দেবান্বক্ষি যক্ষি চ ॥১৬॥

তং ত্বাজনন্ত মাতরঃ কবিং দেবাসো অঙ্গিরঃ । হব্যবাহমমর্ত্যম্ ॥১৭॥

প্রচেতসং ত্বা কবেঽগ্নে দূতং বরেণ্যম্ । হব্যবাহং নি ষেদিরে ॥১৮॥

নহি মে অস্ত্যঘ্ন্যা ন স্বধিতির্বনন্বতি । অথৈতাদৃগ্ভরামি তে ॥১৯॥

যদগ্নে কানি কানি চিদা তে দারূণি দধ্মসি । তা জুষস্ব যবিষ্ঠ্য ॥২০॥

যদত্ত্যুপজিহ্বিকা যদ্বম্রো অতিসর্পতি । সর্বং তদস্তু তে ঘৃতম্ ॥২১॥

অগ্নিমিন্ধানো মনসা ধিয়ং সচেত মর্ত্যঃ । অগ্নিমীধে বিবস্বভিঃ ॥২২॥