সূক্ত 97

97.1

১০ মৈত্রাবরুণির্বসিষ্ঠঃ। ১ ইন্দ্রঃ, ২,৪-৮ বৃহস্পতিঃ, ৩,৯ ইন্দ্রাব্রহ্মণস্পতী, ১০ ইন্দ্রাবৃহস্পতী । ত্রিষ্টুপ্ ।

যজ্ঞে দিবো নৃষদনে পৃথিব্যা নরো যত্র দেবয়বো মদন্তি ।
ইন্দ্রায় যত্র সবনানি সুন্বে গমন্মদায় প্রথমং বয়শ্চ ॥১॥

আ দৈব্যা বৃণীমহেঽবাংসি বৃহস্পতির্নো মহ আ সখায়ঃ ।
যথা ভবেম মীল্হুষে অনাগা যো নো দাতা পরাবতঃ পিতেব ॥২॥

তমু জ্যেষ্ঠং নমসা হবির্ভিঃ সুশেবং ব্রহ্মণস্পতিং গৃণীষে ।
ইন্দ্রং শ্লোকো মহি দৈব্যঃ সিষক্তু যো ব্রহ্মণো দেবকৃতস্য রাজা ॥৩॥

স আ নো যোনিং সদতু প্রেষ্ঠো বৃহস্পতির্বিশ্ববারো যো অস্তি ।
কামো রায়ঃ সুবীর্যস্য তং দাত্পর্ষন্নো অতি সশ্চতো অরিষ্টান্ ॥৪॥

তমা নো অর্কমমৃতায় জুষ্টমিমে ধাসুরমৃতাসঃ পুরাজাঃ ।
শুচিক্রন্দং যজতং পস্ত্যানাং বৃহস্পতিমনর্বাণং হুবেম ॥৫॥

তং শগ্মাসো অরুষাসো অশ্বা বৃহস্পতিং সহবাহো বহন্তি ।
সহশ্চিদ্যস্য নীলবত্সধস্থং নভো ন রূপমরুষং বসানাঃ ॥৬॥

স হি শুচিঃ শতপত্রঃ স শুন্ধ্যুর্হিরণ্যবাশীরিষিরঃ স্বর্ষাঃ ।
বৃহস্পতিঃ স স্বাবেশ ঋষ্বঃ পুরূ সখিভ্য আসুতিং করিষ্ঠঃ ॥৭॥

দেবী দেবস্য রোদসী জনিত্রী বৃহস্পতিং বাবৃধতুর্মহিত্বা ।
দক্ষায্যায় দক্ষতা সখায়ঃ করদ্ব্রহ্মণে সুতরা সুগাধা ॥৮॥

ইয়ং বাং ব্রহ্মণস্পতে সুবৃক্তির্ব্রহ্মেন্দ্রায় বজ্রিণে অকারি ।
অবিষ্টং ধিয়ো জিগৃতং পুরংধীর্জজস্তমর্যো বনুষামরাতীঃ ॥৯॥

বৃহস্পতে যুবমিন্দ্রশ্চ বস্বো দিব্যস্যেশাথে উত পার্থিবস্য ।
ধত্তং রয়িং স্তুবতে কীরয়ে চিদ্যূয়ং পাত স্বস্তিভিঃ সদা নঃ ॥১০॥