Sukta 97

97.1

10 maitravarunirvasishthah, 1 indrah, 2, 4-8 brihaspatih, 3, 9 indrabrahmanaspati, 10 indrabrihaspati, trishtup

य॒ज्ञे दि॒वो नृ॒षद॑ने पृथि॒व्या नरो॒ यत्र॑ देव॒यवो॒ मद॑न्ति ।
इन्द्रा॑य॒ यत्र॒ सव॑नानि सु॒न्वे गम॒न्मदा॑य प्रथ॒मं वय॑श्च ॥१॥

Yagye divo nrishadane prithivya naro yatra devayavo madanti
Indraya yatra savanani sunve gamanmadaya prathamam vayashcha

97.2

आ दैव्या॑ वृणीम॒हेऽवां॑सि॒ बृह॒स्पति॑र्नो मह॒ आ स॑खायः ।
यथा॒ भवे॑म मी॒ळ्हुषे॒ अना॑गा॒ यो नो॑ दा॒ता प॑रा॒वत॑ः पि॒तेव॑ ॥२॥

A daivya vrinimahevansi brihaspatirno maha a sakhayah
Yatha bhavema milhushe anaga yo no data paravatah piteva

97.3

तमु॒ ज्येष्ठं॒ नम॑सा ह॒विर्भि॑ः सु॒शेवं॒ ब्रह्म॑ण॒स्पतिं॑ गृणीषे ।
इन्द्रं॒ श्लोको॒ महि॒ दैव्य॑ः सिषक्तु॒ यो ब्रह्म॑णो दे॒वकृ॑तस्य॒ राजा॑ ॥३॥

Tamu jyeshtham namasa havirbhih sushevam brahmanaspatim grinishe
Indram shloko mahi daivyah sishaktu yo brahmano devakritasya raja

97.4

स आ नो॒ योनिं॑ सदतु॒ प्रेष्ठो॒ बृह॒स्पति॑र्वि॒श्ववा॑रो॒ यो अस्ति॑ ।
कामो॑ रा॒यः सु॒वीर्य॑स्य॒ तं दा॒त्पर्ष॑न्नो॒ अति॑ स॒श्चतो॒ अरि॑ष्टान् ॥४॥

Sa a no yonim sadatu preshtho brihaspatirvishvavaro yo asti
Kamo rayah suviryasya tam datparshanno ati sashchato arishtan

97.5

तमा नो॑ अ॒र्कम॒मृता॑य॒ जुष्ट॑मि॒मे धा॑सुर॒मृता॑सः पुरा॒जाः ।
शुचि॑क्रन्दं यज॒तं प॒स्त्या॑नां॒ बृह॒स्पति॑मन॒र्वाणं॑ हुवेम ॥५॥

Tama no arkamamritaya jushtamime dhasuramritasah purajah
Shuchikrandam yajatam pastyanam brihaspatimanarvanam huvema

97.6

तं श॒ग्मासो॑ अरु॒षासो॒ अश्वा॒ बृह॒स्पतिं॑ सह॒वाहो॑ वहन्ति ।
सह॑श्चि॒द्यस्य॒ नील॑वत्स॒धस्थं॒ नभो॒ न रू॒पम॑रु॒षं वसा॑नाः ॥६॥

Tam shagmaso arushaso ashva brihaspatim sahavaho vahanti
Sahashchidyasya nilavatsadhastham nabho na rupamarusham vasanah

97.7

स हि शुचि॑ः श॒तप॑त्र॒ः स शु॒न्ध्युर्हिर॑ण्यवाशीरिषि॒रः स्व॒र्षाः ।
बृह॒स्पति॒ः स स्वा॑वे॒श ऋ॒ष्वः पु॒रू सखि॑भ्य आसु॒तिं करि॑ष्ठः ॥७॥

Sa hi shuchih shatapatrah sa shundhyurhiranyavashirishirah svarshah
Brihaspatih sa svavesha rishvah puru sakhibhya asutim karishthah

97.8

दे॒वी दे॒वस्य॒ रोद॑सी॒ जनि॑त्री॒ बृह॒स्पतिं॑ वावृधतुर्महि॒त्वा ।
द॒क्षाय्या॑य दक्षता सखाय॒ः कर॒द्ब्रह्म॑णे सु॒तरा॑ सुगा॒धा ॥८॥

Devi devasya rodasi janitri brihaspatim vavridhaturmahitva
Dakshayyaya dakshata sakhayah karadbrahmane sutara sugadha

97.9

इ॒यं वां॑ ब्रह्मणस्पते सुवृ॒क्तिर्ब्रह्मेन्द्रा॑य व॒ज्रिणे॑ अकारि ।
अ॒वि॒ष्टं धियो॑ जिगृ॒तं पुरं॑धीर्जज॒स्तम॒र्यो व॒नुषा॒मरा॑तीः ॥९॥

Iyam vam brahmanaspate suvriktirbrahmendraya vajrine akari
Avishtam dhiyo jigritam purandhirjajastamaryo vanushamaratih

97.10

बृह॑स्पते यु॒वमिन्द्र॑श्च॒ वस्वो॑ दि॒व्यस्ये॑शाथे उ॒त पार्थि॑वस्य ।
ध॒त्तं र॒यिं स्तु॑व॒ते की॒रये॑ चिद्यू॒यं पा॑त स्व॒स्तिभि॒ः सदा॑ नः ॥१०॥

Brihaspate yuvamindrashcha vasvo divyasyeshathe uta parthivasya
Dhattam rayim stuvate kiraye chidyuyam pata svastibhih sada nah