Sukta 98

98.1

7 maitravarunirvasishthah, indrah, 7 indrabrihaspati, trishtup

अध्व॑र्यवोऽरु॒णं दु॒ग्धमं॒शुं जु॒होत॑न वृष॒भाय॑ क्षिती॒नाम् ।
गौ॒राद्वेदी॑याँ अव॒पान॒मिन्द्रो॑ वि॒श्वाहेद्या॑ति सु॒तसो॑ममि॒च्छन् ॥१॥

Adhvaryavorunam dugdhamanshum juhotana vrishabhaya kshitinam
Gauradvediyam avapanamindro vishvahedyati sutasomamichchhan

यद्द॑धि॒षे प्र॒दिवि॒ चार्वन्नं॑ दि॒वेदि॑वे पी॒तिमिद॑स्य वक्षि ।
उ॒त हृ॒दोत मन॑सा जुषा॒ण उ॒शन्नि॑न्द्र॒ प्रस्थि॑तान्पाहि॒ सोमा॑न् ॥२॥

Yaddadhishe pradivi charvannam divedive pitimidasya vakshi
Uta hridota manasa jushana ushannindra prasthitanpahi soman

ज॒ज्ञा॒नः सोमं॒ सह॑से पपाथ॒ प्र ते॑ मा॒ता म॑हि॒मान॑मुवाच ।
एन्द्र॑ पप्राथो॒र्व१न्तरि॑क्षं यु॒धा दे॒वेभ्यो॒ वरि॑वश्चकर्थ ॥३॥

Jagyanah somam sahase papatha pra te mata mahimanamuvacha
Endra paprathorva1ntariksham yudha devebhyo varivashchakartha

यद्यो॒धया॑ मह॒तो मन्य॑माना॒न्त्साक्षा॑म॒ तान्बा॒हुभि॒ः शाश॑दानान् ।
यद्वा॒ नृभि॒र्वृत॑ इन्द्राभि॒युध्या॒स्तं त्वया॒जिं सौ॑श्रव॒सं ज॑येम ॥४॥

Yadyodhaya mahato manyamanantsakshama tanbahubhih shashadanan
Yadva nribhirvrita indrabhiyudhyastam tvayajim saushravasam jayema

प्रेन्द्र॑स्य वोचं प्रथ॒मा कृ॒तानि॒ प्र नूत॑ना म॒घवा॒ या च॒कार॑ ।
य॒देददे॑वी॒रस॑हिष्ट मा॒या अथा॑भव॒त्केव॑ल॒ः सोमो॑ अस्य ॥५॥

Prendrasya vocham prathama kritani pra nutana maghava ya chakara
Yadedadevirasahishta maya athabhavatkevalah somo asya

तवे॒दं विश्व॑म॒भित॑ः पश॒व्यं१ यत्पश्य॑सि॒ चक्ष॑सा॒ सूर्य॑स्य ।
गवा॑मसि॒ गोप॑ति॒रेक॑ इन्द्र भक्षी॒महि॑ ते॒ प्रय॑तस्य॒ वस्व॑ः ॥६॥

Tavedam vishvamabhitah pashavyan1 yatpashyasi chakshasa suryasya
Gavamasi gopatireka indra bhakshimahi te prayatasya vasvah

बृह॑स्पते यु॒वमिन्द्र॑श्च॒ वस्वो॑ दि॒व्यस्ये॑शाथे उ॒त पार्थि॑वस्य ।
ध॒त्तं र॒यिं स्तु॑व॒ते की॒रये॑ चिद्यू॒यं पा॑त स्व॒स्तिभि॒ः सदा॑ नः ॥७॥

Brihaspate yuvamindrashcha vasvo divyasyeshathe uta parthivasya
Dhattam rayim stuvate kiraye chidyuyam pata svastibhih sada nah