Sukta 99

99.1

7 maitravarunirvasishthah, vishnuh, 4-6 indravishnu, trishtup

प॒रो मात्र॑या त॒न्वा॑ वृधान॒ न ते॑ महि॒त्वमन्व॑श्नुवन्ति ।
उ॒भे ते॑ विद्म॒ रज॑सी पृथि॒व्या विष्णो॑ देव॒ त्वं प॑र॒मस्य॑ वित्से ॥१॥

Paro matraya tanva vridhana na te mahitvamanvashnuvanti
Ubhe te vidma rajasi prithivya vishno deva tvam paramasya vitse

न ते॑ विष्णो॒ जाय॑मानो॒ न जा॒तो देव॑ महि॒म्नः पर॒मन्त॑माप ।
उद॑स्तभ्ना॒ नाक॑मृ॒ष्वं बृ॒हन्तं॑ दा॒धर्थ॒ प्राचीं॑ क॒कुभं॑ पृथि॒व्याः ॥२॥

Na te vishno jayamano na jato deva mahimnah paramantamapa
Udastabhna nakamrishvam brihantam dadhartha prachim kakubham prithivyah

इरा॑वती धेनु॒मती॒ हि भू॒तं सू॑यव॒सिनी॒ मनु॑षे दश॒स्या ।
व्य॑स्तभ्ना॒ रोद॑सी विष्णवे॒ते दा॒धर्थ॑ पृथि॒वीम॒भितो॑ म॒यूखै॑ः ॥३॥

Iravati dhenumati hi bhutam suyavasini manushe dashasya
Vyastabhna rodasi vishnavete dadhartha prithivimabhito mayukhaih

उ॒रुं य॒ज्ञाय॑ चक्रथुरु लो॒कं ज॒नय॑न्ता॒ सूर्य॑मु॒षास॑म॒ग्निम् ।
दास॑स्य चिद्वृषशि॒प्रस्य॑ मा॒या ज॒घ्नथु॑र्नरा पृत॒नाज्ये॑षु ॥४॥

Urum yagyaya chakrathuru lokam janayanta suryamushasamagnim
Dasasya chidvrishashiprasya maya jaghnathurnara pritanajyeshu

इन्द्रा॑विष्णू दृंहि॒ताः शम्ब॑रस्य॒ नव॒ पुरो॑ नव॒तिं च॑ श्नथिष्टम् ।
श॒तं व॒र्चिन॑ः स॒हस्रं॑ च सा॒कं ह॒थो अ॑प्र॒त्यसु॑रस्य वी॒रान् ॥५॥

Indravishnu drinhitah shambarasya nava puro navatim cha shnathishtam
Shatam varchinah sahasram cha sakam hatho apratyasurasya viran

इ॒यं म॑नी॒षा बृ॑ह॒ती बृ॒हन्तो॑रुक्र॒मा त॒वसा॑ व॒र्धय॑न्ती ।
र॒रे वां॒ स्तोमं॑ वि॒दथे॑षु विष्णो॒ पिन्व॑त॒मिषो॑ वृ॒जने॑ष्विन्द्र ॥६॥

Iyam manisha brihati brihantorukrama tavasa vardhayanti
Rare vam stomam vidatheshu vishno pinvatamisho vrijaneshvindra

वष॑ट् ते विष्णवा॒स आ कृ॑णोमि॒ तन्मे॑ जुषस्व शिपिविष्ट ह॒व्यम् ।
वर्ध॑न्तु त्वा सुष्टु॒तयो॒ गिरो॑ मे यू॒यं पा॑त स्व॒स्तिभि॒ः सदा॑ नः ॥७॥

Vashat te vishnavasa a krinomi tanme jushasva shipivishta havyam
Vardhantu tva sushtutayo giro me yuyam pata svastibhih sada nah