Sukta 100

100.1

7 maitravarunirvasishthah, vishnuh, trishtup

नू मर्तो॑ दयते सनि॒ष्यन्यो विष्ण॑व उरुगा॒याय॒ दाश॑त् ।
प्र यः स॒त्राचा॒ मन॑सा॒ यजा॑त ए॒ताव॑न्तं॒ नर्य॑मा॒विवा॑सात् ॥१॥

Nu marto dayate sanishyanyo vishnava urugayaya dashat
Pra yah satracha manasa yajata etavantam naryamavivasat

त्वं वि॑ष्णो सुम॒तिं वि॒श्वज॑न्या॒मप्र॑युतामेवयावो म॒तिं दा॑ः ।
पर्चो॒ यथा॑ नः सुवि॒तस्य॒ भूरे॒रश्वा॑वतः पुरुश्च॒न्द्रस्य॑ रा॒यः ॥२॥

Tvam vishno sumatim vishvajanyamaprayutamevayavo matim dah
Parcho yatha nah suvitasya bhurerashvavatah purushchandrasya rayah

त्रिर्दे॒वः पृ॑थि॒वीमे॒ष ए॒तां वि च॑क्रमे श॒तर्च॑सं महि॒त्वा ।
प्र विष्णु॑रस्तु त॒वस॒स्तवी॑यान्त्वे॒षं ह्य॑स्य॒ स्थवि॑रस्य॒ नाम॑ ॥३॥

Trirdevah prithivimesha etam vi chakrame shatarchasam mahitva
Pra vishnurastu tavasastaviyantvesham hyasya sthavirasya nama

वि च॑क्रमे पृथि॒वीमे॒ष ए॒तां क्षेत्रा॑य॒ विष्णु॒र्मनु॑षे दश॒स्यन् ।
ध्रु॒वासो॑ अस्य की॒रयो॒ जना॑स उरुक्षि॒तिं सु॒जनि॑मा चकार ॥४॥

Vi chakrame prithivimesha etam kshetraya vishnurmanushe dashasyan
Dhruvaso asya kirayo janasa urukshitim sujanima chakara

प्र तत्ते॑ अ॒द्य शि॑पिविष्ट॒ नामा॒ऽर्यः शं॑सामि व॒युना॑नि वि॒द्वान् ।
तं त्वा॑ गृणामि त॒वस॒मत॑व्या॒न्क्षय॑न्तम॒स्य रज॑सः परा॒के ॥५॥

Pra tatte adya shipivishta namaryah shansami vayunani vidvan
Tam tva grinami tavasamatavyankshayantamasya rajasah parake

किमित्ते॑ विष्णो परि॒चक्ष्यं॑ भू॒त्प्र यद्व॑व॒क्षे शि॑पिवि॒ष्टो अ॑स्मि ।
मा वर्पो॑ अ॒स्मदप॑ गूह ए॒तद्यद॒न्यरू॑पः समि॒थे ब॒भूथ॑ ॥६॥

Kimitte vishno parichakshyam bhutpra yadvavakshe shipivishto asmi
Ma varpo asmadapa guha etadyadanyarupah samithe babhutha

वष॑ट् ते विष्णवा॒स आ कृ॑णोमि॒ तन्मे॑ जुषस्व शिपिविष्ट ह॒व्यम् ।
वर्ध॑न्तु त्वा सुष्टु॒तयो॒ गिरो॑ मे यू॒यं पा॑त स्व॒स्तिभि॒ः सदा॑ नः ॥७॥

Vashat te vishnavasa a krinomi tanme jushasva shipivishta havyam
Vardhantu tva sushtutayo giro me yuyam pata svastibhih sada nah