Sukta 101

101.1

6 maitravarunirvasishthah, (vrishtikama ), kumara agneyo va, parjanyah, trishtup

ति॒स्रो वाच॒ः प्र व॑द॒ ज्योति॑रग्रा॒ या ए॒तद्दु॒ह्रे म॑धुदो॒घमूध॑ः ।
स व॒त्सं कृ॒ण्वन्गर्भ॒मोष॑धीनां स॒द्यो जा॒तो वृ॑ष॒भो रो॑रवीति ॥१॥

Tisro vachah pra vada jyotiragra ya etadduhre madhudoghamudhah
Sa vatsam krinvangarbhamoshadhinam sadyo jato vrishabho roraviti

यो वर्ध॑न॒ ओष॑धीनां॒ यो अ॒पां यो विश्व॑स्य॒ जग॑तो दे॒व ईशे॑ ।
स त्रि॒धातु॑ शर॒णं शर्म॑ यंसत्त्रि॒वर्तु॒ ज्योति॑ः स्वभि॒ष्ट्य१स्मे ॥२॥

Yo vardhana oshadhinam yo apam yo vishvasya jagato deva ishe
Sa tridhatu sharanam sharma yansattrivartu jyotih svabhishtya1sme

स्त॒रीरु॑ त्व॒द्भव॑ति॒ सूत॑ उ त्वद्यथाव॒शं त॒न्वं॑ चक्र ए॒षः ।
पि॒तुः पय॒ः प्रति॑ गृभ्णाति मा॒ता तेन॑ पि॒ता व॑र्धते॒ तेन॑ पु॒त्रः ॥३॥

Stariru tvadbhavati suta u tvadyathavasham tanvam chakra eshah
Pituh payah prati gribhnati mata tena pita vardhate tena putrah

यस्मि॒न्विश्वा॑नि॒ भुव॑नानि त॒स्थुस्ति॒स्रो द्याव॑स्त्रे॒धा स॒स्रुराप॑ः ।
त्रय॒ः कोशा॑स उप॒सेच॑नासो॒ मध्व॑ः श्चोतन्त्य॒भितो॑ विर॒प्शम् ॥४॥

Yasminvishvani bhuvanani tasthustisro dyavastredha sasrurapah
Trayah koshasa upasechanaso madhvah shchotantyabhito virapsham

इ॒दं वच॑ः प॒र्जन्या॑य स्व॒राजे॑ हृ॒दो अ॒स्त्वन्त॑रं॒ तज्जु॑जोषत् ।
म॒यो॒भुवो॑ वृ॒ष्टय॑ः सन्त्व॒स्मे सु॑पिप्प॒ला ओष॑धीर्दे॒वगो॑पाः ॥५॥

Idam vachah parjanyaya svaraje hrido astvantaram tajjujoshat
Mayobhuvo vrishtayah santvasme supippala oshadhirdevagopah

स रे॑तो॒धा वृ॑ष॒भः शश्व॑तीनां॒ तस्मि॑न्ना॒त्मा जग॑तस्त॒स्थुष॑श्च ।
तन्म॑ ऋ॒तं पा॑तु श॒तशा॑रदाय यू॒यं पा॑त स्व॒स्तिभि॒ः सदा॑ नः ॥६॥

Sa retodha vrishabhah shashvatinam tasminnatma jagatastasthushashcha
Tanma ritam patu shatasharadaya yuyam pata svastibhih sada nah