Sukta 96

96.1

6 maitravarunirvasishthah, sarasvati, 4-6 sarasvan, 1-2= pragathah (1 brihati, 2 satobrihati ), 3 prastarapanktih, 4-6 gayatri

बृ॒हदु॑ गायिषे॒ वचो॑ऽसु॒र्या॑ न॒दीना॑म् ।
सर॑स्वती॒मिन्म॑हया सुवृ॒क्तिभि॒ः स्तोमै॑र्वसिष्ठ॒ रोद॑सी ॥१॥

Brihadu gayishe vachosurya nadinam
Sarasvatiminmahaya suvriktibhih stomairvasishtha rodasi

उ॒भे यत्ते॑ महि॒ना शु॑भ्रे॒ अन्ध॑सी अधिक्षि॒यन्ति॑ पू॒रव॑ः ।
सा नो॑ बोध्यवि॒त्री म॒रुत्स॑खा॒ चोद॒ राधो॑ म॒घोना॑म् ॥२॥

Ubhe yatte mahina shubhre andhasi adhikshiyanti puravah
Sa no bodhyavitri marutsakha choda radho maghonam

भ॒द्रमिद्भ॒द्रा कृ॑णव॒त्सर॑स्व॒त्यक॑वारी चेतति वा॒जिनी॑वती ।
गृ॒णा॒ना ज॑मदग्नि॒वत्स्तु॑वा॒ना च॑ वसिष्ठ॒वत् ॥३॥

Bhadramidbhadra krinavatsarasvatyakavari chetati vajinivati
Grinana jamadagnivatstuvana cha vasishthavat

ज॒नी॒यन्तो॒ न्वग्र॑वः पुत्री॒यन्त॑ः सु॒दान॑वः । सर॑स्वन्तं हवामहे ॥४॥

Janiyanto nvagravah putriyantah sudanavah, sarasvantam havamahe

ये ते॑ सरस्व ऊ॒र्मयो॒ मधु॑मन्तो घृत॒श्चुत॑ः । तेभि॑र्नोऽवि॒ता भ॑व ॥५॥

Ye te sarasva urmayo madhumanto ghritashchutah, tebhirnovita bhava

पी॒पि॒वांसं॒ सर॑स्वत॒ः स्तनं॒ यो वि॒श्वद॑र्शतः । भ॒क्षी॒महि॑ प्र॒जामिष॑म् ॥६॥

Pipivansam sarasvatah stanam yo vishvadarshatah, bhakshimahi prajamisham