Sukta 95

95.1

6 maitravarunirvasishthah, sarasvati, 3 sarasvan, trishtup

प्र क्षोद॑सा॒ धाय॑सा सस्र ए॒षा सर॑स्वती ध॒रुण॒माय॑सी॒ पूः ।
प्र॒बाब॑धाना र॒थ्ये॑व याति॒ विश्वा॑ अ॒पो म॑हि॒ना सिन्धु॑र॒न्याः ॥१॥

Pra kshodasa dhayasa sasra esha sarasvati dharunamayasi puh
Prababadhana rathyeva yati vishva apo mahina sindhuranyah

एका॑चेत॒त्सर॑स्वती न॒दीनां॒ शुचि॑र्य॒ती गि॒रिभ्य॒ आ स॑मु॒द्रात् ।
रा॒यश्चेत॑न्ती॒ भुव॑नस्य॒ भूरे॑र्घृ॒तं पयो॑ दुदुहे॒ नाहु॑षाय ॥२॥

Ekachetatsarasvati nadinam shuchiryati giribhya a samudrat
Rayashchetanti bhuvanasya bhurerghritam payo duduhe nahushaya

स वा॑वृधे॒ नर्यो॒ योष॑णासु॒ वृषा॒ शिशु॑र्वृष॒भो य॒ज्ञिया॑सु ।
स वा॒जिनं॑ म॒घव॑द्भ्यो दधाति॒ वि सा॒तये॑ त॒न्वं॑ मामृजीत ॥३॥

Sa vavridhe naryo yoshanasu vrisha shishurvrishabho yagyiyasu
Sa vajinam maghavadbhyo dadhati vi sataye tanvam mamrijita

उ॒त स्या न॒ः सर॑स्वती जुषा॒णोप॑ श्रवत्सु॒भगा॑ य॒ज्णे अ॒स्मिन् ।
मि॒तज्ञु॑भिर्नम॒स्यै॑रिया॒ना रा॒या यु॒जा चि॒दुत्त॑रा॒ सखि॑भ्यः ॥४॥

Uta sya nah sarasvati jushanopa shravatsubhaga yajne asmin
Mitagyubhirnamasyairiyana raya yuja chiduttara sakhibhyah

इ॒मा जुह्वा॑ना यु॒ष्मदा नमो॑भि॒ः प्रति॒ स्तोमं॑ सरस्वति जुषस्व ।
तव॒ शर्म॑न्प्रि॒यत॑मे॒ दधा॑ना॒ उप॑ स्थेयाम शर॒णं न वृ॒क्षम् ॥५॥

Ima juhvana yushmada namobhih prati stomam sarasvati jushasva
Tava sharmanpriyatame dadhana upa stheyama sharanam na vriksham

अ॒यमु॑ ते सरस्वति॒ वसि॑ष्ठो॒ द्वारा॑वृ॒तस्य॑ सुभगे॒ व्या॑वः ।
वर्ध॑ शुभ्रे स्तुव॒ते रा॑सि॒ वाजा॑न्यू॒यं पा॑त स्व॒स्तिभि॒ः सदा॑ नः ॥६॥

Ayamu te sarasvati vasishtho dvaravritasya subhage vyavah
Vardha shubhre stuvate rasi vajanyuyam pata svastibhih sada nah