Sukta 94

94.1

12 maitravarunirvasishthah, indragni, gayatri, 12 anushtup

इ॒यं वा॑म॒स्य मन्म॑न॒ इन्द्रा॑ग्नी पू॒र्व्यस्तु॑तिः । अ॒भ्राद्वृ॒ष्टिरि॑वाजनि ॥१॥

Iyam vamasya manmana indragni purvyastutih, abhradvrishtirivajani

शृ॒णु॒तं ज॑रि॒तुर्हव॒मिन्द्रा॑ग्नी॒ वन॑तं॒ गिर॑ः । ई॒शा॒ना पि॑प्यतं॒ धिय॑ः ॥२॥

Shrinutam jariturhavamindragni vanatam girah, ishana pipyatam dhiyah

मा पा॑प॒त्वाय॑ नो न॒रेन्द्रा॑ग्नी॒ माभिश॑स्तये । मा नो॑ रीरधतं नि॒दे ॥३॥

Ma papatvaya no narendragni mabhishastaye, ma no riradhatam nide

इन्द्रे॑ अ॒ग्ना नमो॑ बृ॒हत्सु॑वृ॒क्तिमेर॑यामहे । धि॒या धेना॑ अव॒स्यव॑ः ॥४॥

Indre agna namo brihatsuvriktimerayamahe, dhiya dhena avasyavah

ता हि शश्व॑न्त॒ ईळ॑त इ॒त्था विप्रा॑स ऊ॒तये॑ । स॒बाधो॒ वाज॑सातये ॥५॥

Ta hi shashvanta ilata ittha viprasa utaye, sabadho vajasataye

ता वां॑ गी॒र्भिर्वि॑प॒न्यव॒ः प्रय॑स्वन्तो हवामहे । मे॒धसा॑ता सनि॒ष्यव॑ः ॥६॥

Ta vam girbhirvipanyavah prayasvanto havamahe, medhasata sanishyavah

इन्द्रा॑ग्नी॒ अव॒सा ग॑तम॒स्मभ्यं॑ चर्षणीसहा । मा नो॑ दु॒ःशंस॑ ईशत ॥७॥

Indragni avasa gatamasmabhyam charshanisaha, ma no duhshansa ishata

मा कस्य॑ नो॒ अर॑रुषो धू॒र्तिः प्रण॒ङ्मर्त्य॑स्य । इन्द्रा॑ग्नी॒ शर्म॑ यच्छतम् ॥८॥

Ma kasya no ararusho dhurtih prananmartyasya, indragni sharma yachchhatam

गोम॒द्धिर॑ण्यव॒द्वसु॒ यद्वा॒मश्वा॑व॒दीम॑हे । इन्द्रा॑ग्नी॒ तद्व॑नेमहि ॥९॥

Gomaddhiranyavadvasu yadvamashvavadimahe, indragni tadvanemahi

यत्सोम॒ आ सु॒ते नर॑ इन्द्रा॒ग्नी अजो॑हवुः । सप्ती॑वन्ता सप॒र्यव॑ः ॥१०॥

Yatsoma a sute nara indragni ajohavuh, saptivanta saparyavah

उ॒क्थेभि॑र्वृत्र॒हन्त॑मा॒ या म॑न्दा॒ना चि॒दा गि॒रा । आ॒ङ्गू॒षैरा॒विवा॑सतः ॥११॥

Ukthebhirvritrahantama ya mandana chida gira, angushairavivasatah

ताविद्दु॒ःशंसं॒ मर्त्यं॒ दुर्वि॑द्वांसं रक्ष॒स्विन॑म् । आ॒भो॒गं हन्म॑ना हतमुद॒धिं हन्म॑ना हतम् ॥१२॥

Tavidduhshansam martyam durvidvansam rakshasvinam, abhogam hanmana hatamudadhim hanmana hatam