সূক্ত 74

74.1

৬ মৈত্রাবরুণির্বসিষ্ঠঃ। অশ্বিনৌ ।প্রগাথঃ=(বিষমা বৃহতী, সমা সতোবৃহতী) ।

ইমা উ বাং দিবিষ্টয় উস্রা হবন্তে অশ্বিনা ।
অয়ং বামহ্বেঽবসে শচীবসূ বিশংবিশং হি গচ্ছথঃ ॥১॥

74.2

যুবং চিত্রং দদথুর্ভোজনং নরা চোদেথাং সূনৃতাবতে ।
অর্বাগ্রথং সমনসা নি যচ্ছতং পিবতং সোম্যং মধু ॥২॥

74.3

আ যাতমুপ ভূষতং মধ্বঃ পিবতমশ্বিনা ।
দুগ্ধং পয়ো বৃষণা জেন্যাবসূ মা নো মর্ধিষ্টমা গতম্ ॥৩॥

74.4

অশ্বাসো যে বামুপ দাশুষো গৃহং যুবাং দীয়ন্তি বিভ্রতঃ ।
মক্ষূয়ুভির্নরা হয়েভিরশ্বিনা ঽঽদেবা যাতমস্ময়ূ ॥৪॥

74.5

অধা হ যন্তো অশ্বিনা পৃক্ষঃ সচন্ত সূরয়ঃ ।
তা যংসতো মঘবদ্ভ্যো ধ্রুবং যশশ্ছর্দিরস্মভ্যং নাসত্যা ॥৫॥

74.6

প্র যে যয়ুরবৃকাসো রথা ইব নৃপাতারো জনানাম্ ।
উত স্বেন শবসা শূশুবুর্নর উত ক্ষিয়ন্তি সুক্ষিতিম্ ॥৬॥