Sukta 74

74.1

6 maitravarunirvasishthah, ashvinau, pragathah=(vishama brihati, sama satobrihati)

इ॒मा उ॑ वां॒ दिवि॑ष्टय उ॒स्रा ह॑वन्ते अश्विना ।
अ॒यं वा॑म॒ह्वेऽव॑से शचीवसू॒ विशं॑विशं॒ हि गच्छ॑थः ॥१॥

Ima u vam divishtaya usra havante ashvina
Ayam vamahvevase shachivasu vishanvisham hi gachchhathah

यु॒वं चि॒त्रं द॑दथु॒र्भोज॑नं नरा॒ चोदे॑थां सू॒नृता॑वते ।
अ॒र्वाग्रथं॒ सम॑नसा॒ नि य॑च्छतं॒ पिब॑तं सो॒म्यं मधु॑ ॥२॥

Yuvam chitram dadathurbhojanam nara chodetham sunritavate
Arvagratham samanasa ni yachchhatam pibatam somyam madhu

आ या॑त॒मुप॑ भूषतं॒ मध्व॑ः पिबतमश्विना ।
दु॒ग्धं पयो॑ वृषणा जेन्यावसू॒ मा नो॑ मर्धिष्ट॒मा ग॑तम् ॥३॥

A yatamupa bhushatam madhvah pibatamashvina
Dugdham payo vrishana jenyavasu ma no mardhishtama gatam

अश्वा॑सो॒ ये वा॒मुप॑ दा॒शुषो॑ गृ॒हं यु॒वां दीय॑न्ति॒ बिभ्र॑तः ।
म॒क्षू॒युभि॑र्नरा॒ हये॑भिरश्वि॒ना ऽऽदे॑वा यातमस्म॒यू ॥४॥

Ashvaso ye vamupa dashusho griham yuvam diyanti bibhratah
Makshuyubhirnara hayebhirashvina deva yatamasmayu

अधा॑ ह॒ यन्तो॑ अ॒श्विना॒ पृक्ष॑ः सचन्त सू॒रय॑ः ।
ता यं॑सतो म॒घव॑द्भ्यो ध्रु॒वं यश॑श्छ॒र्दिर॒स्मभ्यं॒ नास॑त्या ॥५॥

Adha ha yanto ashvina prikshah sachanta surayah
Ta yansato maghavadbhyo dhruvam yashashchhardirasmabhyam nasatya

प्र ये य॒युर॑वृ॒कासो॒ रथा॑ इव नृपा॒तारो॒ जना॑नाम् ।
उ॒त स्वेन॒ शव॑सा शूशुवु॒र्नर॑ उ॒त क्षि॑यन्ति सुक्षि॒तिम् ॥६॥

Pra ye yayuravrikaso ratha iva nripataro jananam
Uta svena shavasa shushuvurnara uta kshiyanti sukshitim