সূক্ত 75

75.1

৮ মৈত্রাবরুণির্বসিষ্ঠঃ। উষসঃ। ত্রিষ্টুপ্ ।

ব্যু১ষা আবো দিবিজা ঋতেনাঽঽবিষ্কৃণ্বানা মহিমানমাগাৎ ।
অপ দ্রুহস্তম আবরজুষ্টমঙ্গিরস্তমা পথ্যা অজীগঃ ॥১॥

মহে নো অদ্য সুবিতায় বোধ্যুষো মহে সৌভগায় প্র যন্ধি ।
চিত্রং রয়িং যশসং ধেহ্যস্মে দেবি মর্তেষু মানুষি শ্রবস্যুম্ ॥২॥

এতে ত্যে ভানবো দর্শতায়াশ্চিত্রা উষসো অমৃতাস আগুঃ ।
জনয়ন্তো দৈব্যানি ব্রতান্যাপৃণন্তো অন্তরিক্ষা ব্যস্থুঃ ॥৩॥

এষা স্যা যুজানা পরাকাত্পঞ্চ ক্ষিতীঃ পরি সদ্যো জিগাতি ।
অভিপশ্যন্তী বয়ুনা জনানাং দিবো দুহিতা ভুবনস্য পত্নী ॥৪॥

বাজিনীবতী সূর্যস্য যোষা চিত্রামঘা রায় ঈশে বসূনাম্ ।
ঋষিষ্টুতা জরয়ন্তী মঘোন্যুষা উচ্ছতি বহ্নিভির্গৃণানা ॥৫॥

প্রতি দ্যুতানামরুষাসো অশ্বাশ্চিত্রা অদৃশ্রন্নুষসং বহন্তঃ ।
যাতি শুভ্রা বিশ্বপিশা রথেন দধাতি রত্নং বিধতে জনায় ॥৬॥

সত্যা সত্যেভির্মহতী মহদ্ভির্দেবী দেবেভির্যজতা যজত্রৈঃ ।
রুজদ্দৃল্হানি দদদুস্রিয়াণাং প্রতি গাব উষসং বাবশন্ত ॥৭॥

নূ নো গোমদ্বীরবদ্ধেহি রত্নমুষো অশ্বাবত্পুরুভোজো অস্মে ।
মা নো বর্হিঃ পুরুষতা নিদে কর্যূয়ং পাত স্বস্তিভিঃ সদা নঃ ॥৮॥