সূক্ত 76

76.1

৭ মৈত্রাবরুণির্বসিষ্ঠঃ। উষসঃ । ত্রিষ্টুপ্ ।

উদু জ্যোতিরমৃতং বিশ্বজন্যং বিশ্বানরঃ সবিতা দেবো অশ্রেৎ ।
ক্রত্বা দেবানামজনিষ্ট চক্ষুরাবিরকর্ভুবনং বিশ্বমুষাঃ ॥১॥

76.2

প্র মে পন্থা দেবয়ানা অদৃশ্রন্নমর্ধন্তো বসুভিরিষ্কৃতাসঃ ।
অভূদু কেতুরুষসঃ পুরস্তাত্প্রতীচ্যাগাদধি হর্ম্যেভ্যঃ ॥২॥

76.3

তানীদহানি বহুলান্যাসন্যা প্রাচীনমুদিতা সূর্যস্য ।
যতঃ পরি জার ইবাচরন্ত্যুষো দদৃক্ষে ন পুনর্যতীব ॥৩॥

76.4

ত ইদ্দেবানাং সধমাদ আসন্নৃতাবানঃ কবয়ঃ পূর্ব্যাসঃ ।
গূল্হং জ্যোতিঃ পিতরো অন্ববিন্দন্ত্সত্যমন্ত্রা অজনয়ন্নুষাসম্ ॥৪॥

76.5

সমান ঊর্বে অধি সংগতাসঃ সং জানতে ন যতন্তে মিথস্তে ।
তে দেবানাং ন মিনন্তি ব্রতান্যমর্ধন্তো বসুভির্যাদমানাঃ ॥৫॥

76.6

প্রতি ত্বা স্তোমৈরীলতে বসিষ্ঠা উষর্বুধঃ সুভগে তুষ্টুবাংসঃ ।
গবাং নেত্রী বাজপত্নী ন উচ্ছোষঃ সুজাতে প্রথমা জরস্ব ॥৬॥

76.7

এষা নেত্রী রাধসঃ সূনৃতানামুষা উচ্ছন্তী রিভ্যতে বসিষ্ঠৈঃ ।
দীর্ঘশ্রুতং রয়িমস্মে দধানা যূয়ং পাত স্বস্তিভিঃ সদা নঃ ॥৭॥