Sukta 76

76.1

7 maitravarunirvasishthah, ushasah, trishtup

उदु॒ ज्योति॑र॒मृतं॑ वि॒श्वज॑न्यं वि॒श्वान॑रः सवि॒ता दे॒वो अ॑श्रेत् ।
क्रत्वा॑ दे॒वाना॑मजनिष्ट॒ चक्षु॑रा॒विर॑क॒र्भुव॑नं॒ विश्व॑मु॒षाः ॥१॥

Udu jyotiramritam vishvajanyam vishvanarah savita devo ashret
Kratva devanamajanishta chakshuravirakarbhuvanam vishvamushah

76.2

प्र मे॒ पन्था॑ देव॒याना॑ अदृश्र॒न्नम॑र्धन्तो॒ वसु॑भि॒रिष्कृ॑तासः ।
अभू॑दु के॒तुरु॒षस॑ः पु॒रस्ता॑त्प्रती॒च्यागा॒दधि॑ ह॒र्म्येभ्य॑ः ॥२॥

Pra me pantha devayana adrishrannamardhanto vasubhirishkritasah
Abhudu keturushasah purastatpratichyagadadhi harmyebhyah

76.3

तानीदहा॑नि बहु॒लान्या॑स॒न्या प्रा॒चीन॒मुदि॑ता॒ सूर्य॑स्य ।
यत॒ः परि॑ जा॒र इ॑वा॒चर॒न्त्युषो॑ ददृ॒क्षे न पुन॑र्य॒तीव॑ ॥३॥

Tanidahani bahulanyasanya prachinamudita suryasya
Yatah pari jara ivacharantyusho dadrikshe na punaryativa

76.4

त इद्दे॒वानां॑ सध॒माद॑ आसन्नृ॒तावा॑नः क॒वय॑ः पू॒र्व्यास॑ः ।
गू॒ळ्हं ज्योति॑ः पि॒तरो॒ अन्व॑विन्दन्त्स॒त्यम॑न्त्रा अजनयन्नु॒षास॑म् ॥४॥

Ta iddevanam sadhamada asannritavanah kavayah purvyasah
Gulham jyotih pitaro anvavindantsatyamantra ajanayannushasam

76.5

स॒मा॒न ऊ॒र्वे अधि॒ संग॑तास॒ः सं जा॑नते॒ न य॑तन्ते मि॒थस्ते ।
ते दे॒वानां॒ न मि॑नन्ति व्र॒तान्यम॑र्धन्तो॒ वसु॑भि॒र्याद॑मानाः ॥५॥

Samana urve adhi sangatasah sam janate na yatante mithaste
Te devanam na minanti vratanyamardhanto vasubhiryadamanah

76.6

प्रति॑ त्वा॒ स्तोमै॑रीळते॒ वसि॑ष्ठा उष॒र्बुध॑ः सुभगे तुष्टु॒वांस॑ः ।
गवां॑ ने॒त्री वाज॑पत्नी न उ॒च्छोष॑ः सुजाते प्रथ॒मा ज॑रस्व ॥६॥

Prati tva stomairilate vasishtha usharbudhah subhage tushtuvansah
Gavam netri vajapatni na uchchhoshah sujate prathama jarasva

76.7

ए॒षा ने॒त्री राध॑सः सू॒नृता॑नामु॒षा उ॒च्छन्ती॑ रिभ्यते॒ वसि॑ष्ठैः ।
दी॒र्घ॒श्रुतं॑ र॒यिम॒स्मे दधा॑ना यू॒यं पा॑त स्व॒स्तिभि॒ः सदा॑ नः ॥७॥

Esha netri radhasah sunritanamusha uchchhanti ribhyate vasishthaih
Dirghashrutam rayimasme dadhana yuyam pata svastibhih sada nah