সূক্ত 69

69.1

৮ মৈত্রাবরুণির্বসিষ্ঠঃ। অশ্বিনৌ । ত্রিষ্টুপ্ ।

আ বাং রথো রোদসী বদ্বধানো হিরণ্যয়ো বৃষভির্যাত্বশ্বৈঃ ।
ঘৃতবর্তনিঃ পবিভী রুচান ইষাং বোল্হা নৃপতির্বাজিনীবান্ ॥১॥

69.2

স পপ্রথানো অভি পঞ্চ ভূমা ত্রিবন্ধুরো মনসা যাতু যুক্তঃ ।
বিশো যেন গচ্ছথো দেবয়ন্তীঃ কুত্রা চিদ্যামমশ্বিনা দধানা ॥২॥

69.3

স্বশ্বা যশসা যাতমর্বাগ্দস্রা নিধিং মধুমন্তং পিবাথঃ ।
বি বাং রথো বধ্বা৩ যাদমানোঽন্তান্দিবো বাধতে বর্তনিভ্যাম্ ॥৩॥

69.4

যুবোঃ শ্রিয়ং পরি যোষাবৃণীত সূরো দুহিতা পরিতক্ম্যায়াম্ ।
যদ্দেবয়ন্তমবথঃ শচীভিঃ পরি ঘ্রংসমোমনা বাং বয়ো গাৎ ॥৪॥

69.5

যো হ স্য বাং রথিরা বস্ত উস্রা রথো যুজানঃ পরিয়াতি বর্তিঃ ।
তেন নঃ শং যোরুষসো ব্যুষ্টৌ ন্যশ্বিনা বহতং যজ্ঞে অস্মিন্ ॥৫॥

69.6

নরা গৌরেব বিদ্যুতং তৃষাণাঽস্মাকমদ্য সবনোপ যাতম্ ।
পুরুত্রা হি বাং মতিভির্হবন্তে মা বামন্যে নি যমন্দেবয়ন্তঃ ॥৬॥

69.7

যুবং ভুজ্যুমববিদ্ধং সমুদ্র উদূহথুরর্ণসো অস্রিধানৈঃ ।
পতত্রিভিরশ্রমৈরব্যথিভির্দংসনাভিরশ্বিনা পারয়ন্তা ॥৭॥

69.8

নূ মে হবমা শৃণুতং যুবানা যাসিষ্টং বর্তিরশ্বিনাবিরাবৎ ।
ধত্তং রত্নানি জরতং চ সূরীন্যূয়ং পাত স্বস্তিভিঃ সদা নঃ ॥৮॥