Sukta 69

69.1

8 maitravarunirvasishthah, ashvinau, trishtup

आ वां॒ रथो॒ रोद॑सी बद्बधा॒नो हि॑र॒ण्ययो॒ वृष॑भिर्या॒त्वश्वै॑ः ।
घृ॒तव॑र्तनिः प॒विभी॑ रुचा॒न इ॒षां वो॒ळ्हा नृ॒पति॑र्वा॒जिनी॑वान् ॥१॥

A vam ratho rodasi badbadhano hiranyayo vrishabhiryatvashvaih
Ghritavartanih pavibhi ruchana isham volha nripatirvajinivan

स प॑प्रथा॒नो अ॒भि पञ्च॒ भूमा॑ त्रिवन्धु॒रो मन॒सा या॑तु यु॒क्तः ।
विशो॒ येन॒ गच्छ॑थो देव॒यन्ती॒ः कुत्रा॑ चि॒द्याम॑मश्विना॒ दधा॑ना ॥२॥

Sa paprathano abhi pancha bhuma trivandhuro manasa yatu yuktah
Visho yena gachchhatho devayantih kutra chidyamamashvina dadhana

स्वश्वा॑ य॒शसा या॑तम॒र्वाग्दस्रा॑ नि॒धिं मधु॑मन्तं पिबाथः ।
वि वां॒ रथो॑ व॒ध्वा॒३ याद॑मा॒नोऽन्ता॑न्दि॒वो बा॑धते वर्त॒निभ्या॑म् ॥३॥

Svashva yashasa yatamarvagdasra nidhim madhumantam pibathah
Vi vam ratho vadhva3 yadamanontandivo badhate vartanibhyam

यु॒वोः श्रियं॒ परि॒ योषा॑वृणीत॒ सूरो॑ दुहि॒ता परि॑तक्म्यायाम् ।
यद्दे॑व॒यन्त॒मव॑थ॒ः शची॑भि॒ः परि॑ घ्रं॒समो॒मना॑ वां॒ वयो॑ गात् ॥४॥

Yuvoh shriyam pari yoshavrinita suro duhita paritakmyayam
Yaddevayantamavathah shachibhih pari ghransamomana vam vayo gat

यो ह॒ स्य वां॑ रथिरा॒ वस्त॑ उ॒स्रा रथो॑ युजा॒नः प॑रि॒याति॑ व॒र्तिः ।
तेन॑ न॒ः शं योरु॒षसो॒ व्यु॑ष्टौ॒ न्य॑श्विना वहतं य॒ज्ञे अ॒स्मिन् ॥५॥

Yo ha sya vam rathira vasta usra ratho yujanah pariyati vartih
Tena nah sham yorushaso vyushtau nyashvina vahatam yagye asmin

नरा॑ गौ॒रेव॑ वि॒द्युतं॑ तृषा॒णाऽस्माक॑म॒द्य सव॒नोप॑ यातम् ।
पु॒रु॒त्रा हि वां॑ म॒तिभि॒र्हव॑न्ते॒ मा वा॑म॒न्ये नि य॑मन्देव॒यन्त॑ः ॥६॥

Nara gaureva vidyutam trishanasmakamadya savanopa yatam
Purutra hi vam matibhirhavante ma vamanye ni yamandevayantah

यु॒वं भु॒ज्युमव॑विद्धं समु॒द्र उदू॑हथु॒रर्ण॑सो॒ अस्रि॑धानैः ।
प॒त॒त्रिभि॑रश्र॒मैर॑व्य॒थिभि॑र्दं॒सना॑भिरश्विना पा॒रय॑न्ता ॥७॥

Yuvam bhujyumavaviddham samudra uduhathurarnaso asridhanaih
Patatribhirashramairavyathibhirdansanabhirashvina parayanta

नू मे॒ हव॒मा शृ॑णुतं युवाना यासि॒ष्टं व॒र्तिर॑श्विना॒विरा॑वत् ।
ध॒त्तं रत्ना॑नि॒ जर॑तं च सू॒रीन्यू॒यं पा॑त स्व॒स्तिभि॒ः सदा॑ नः ॥८॥

Nu me havama shrinutam yuvana yasishtam vartirashvinaviravat
Dhattam ratnani jaratam cha surinyuyam pata svastibhih sada nah