সূক্ত 67

67.1

১০ মৈত্রাবরুণির্বসিষ্ঠঃ। অশ্বিনৌ। ত্রিষ্টুপ্ ।

প্রতি বাং রথং নৃপতী জরধ্যৈ হবিষ্মতা মনসা যজ্ঞিয়েন ।
যো বাং দূতো ন ধিষ্ণ্যাবজীগরচ্ছা সূনুর্ন পিতরা বিবক্মি ॥১॥

67.2

অশোচ্যগ্নিঃ সমিধানো অস্মে উপো অদৃশ্রন্তমসশ্চিদন্তাঃ ।
অচেতি কেতুরুষসঃ পুরস্তাচ্ছ্রিয়ে দিবো দুহিতুর্জায়মানঃ ॥২॥

67.3

অভি বাং নূনমশ্বিনা সুহোতা স্তোমৈঃ সিষক্তি নাসত্যা বিবক্বান্ ।
পূর্বীভির্যাতং পথ্যাভিরর্বাক্স্বর্বিদা বসুমতা রথেন ॥৩॥

67.4

অবোর্বাং নূনমশ্বিনা যুবাকুর্হুবে যদ্বাং সুতে মাধ্বী বসূয়ুঃ ।
আ বাং বহন্তু স্থবিরাসো অশ্বাঃ পিবাথো অস্মে সুষুতা মধূনি ॥৪॥

67.5

প্রাচীমু দেবাশ্বিনা ধিয়ং মেঽমৃধ্রাং সাতয়ে কৃতং বসূয়ুম্ ।
বিশ্বা অবিষ্টং বাজ আ পুরংধীস্তা নঃ শক্তং শচীপতী শচীভিঃ ॥৫॥

67.6

অবিষ্টং ধীষ্বশ্বিনা ন আসু প্রজাবদ্রেতো অহ্রয়ং নো অস্তু ।
আ বাং তোকে তনয়ে তূতুজানাঃ সুরত্নাসো দেববীতিং গমেম ॥৬॥

67.7

এষ স্য বাং পূর্বগত্বেব সখ্যে নিধির্হিতো মাধ্বী রাতো অস্মে ।
অহেলতা মনসা যাতমর্বাগশ্নন্তা হব্যং মানুষীষু বিক্ষু ॥৭॥

67.8

একস্মিন্যোগে ভুরণা সমানে পরি বাং সপ্ত স্রবতো রথো গাৎ ।
ন বায়ন্তি সুভ্বো দেবয়ুক্তা যে বাং ধূর্ষু তরণয়ো বহন্তি ॥৮॥

67.9

অসশ্চতা মঘবদ্ভ্যো হি ভূতং যে রায়া মঘদেয়ং জুনন্তি ।
প্র যে বন্ধুং সূনৃতাভিস্তিরন্তে গব্যা পৃঞ্চন্তো অশ্ব্যা মঘানি ॥৯॥

67.10

নূ মে হবমা শৃণুতং যুবানা যাসিষ্টং বর্তিরশ্বিনাবিরাবৎ ।
ধত্তং রত্নানি জরতং চ সূরীন্যূয়ং পাত স্বস্তিভিঃ সদা নঃ ॥১০॥