Sukta 67

67.1

10 maitravarunirvasishthah, ashvinau, trishtup

प्रति॑ वां॒ रथं॑ नृपती ज॒रध्यै॑ ह॒विष्म॑ता॒ मन॑सा य॒ज्ञिये॑न ।
यो वां॑ दू॒तो न धि॑ष्ण्या॒वजी॑ग॒रच्छा॑ सू॒नुर्न पि॒तरा॑ विवक्मि ॥१॥

Prati vam ratham nripati jaradhyai havishmata manasa yagyiyena
Yo vam duto na dhishnyavajigarachchha sunurna pitara vivakmi

अशो॑च्य॒ग्निः स॑मिधा॒नो अ॒स्मे उपो॑ अदृश्र॒न्तम॑सश्चि॒दन्ता॑ः ।
अचे॑ति के॒तुरु॒षस॑ः पु॒रस्ता॑च्छ्रि॒ये दि॒वो दु॑हि॒तुर्जाय॑मानः ॥२॥

Ashochyagnih samidhano asme upo adrishrantamasashchidantah
Acheti keturushasah purastachchhriye divo duhiturjayamanah

अ॒भि वां॑ नू॒नम॑श्विना॒ सुहो॑ता॒ स्तोमै॑ः सिषक्ति नासत्या विव॒क्वान् ।
पू॒र्वीभि॑र्यातं प॒थ्या॑भिर॒र्वाक्स्व॒र्विदा॒ वसु॑मता॒ रथे॑न ॥३॥

Abhi vam nunamashvina suhota stomaih sishakti nasatya vivakvan
Purvibhiryatam pathyabhirarvaksvarvida vasumata rathena

अ॒वोर्वां॑ नू॒नम॑श्विना यु॒वाकु॑र्हु॒वे यद्वां॑ सु॒ते मा॑ध्वी वसू॒युः ।
आ वां॑ वहन्तु॒ स्थवि॑रासो॒ अश्वा॒ः पिबा॑थो अ॒स्मे सुषु॑ता॒ मधू॑नि ॥४॥

Avorvam nunamashvina yuvakurhuve yadvam sute madhvi vasuyuh
A vam vahantu sthaviraso ashvah pibatho asme sushuta madhuni

प्राची॑मु देवाश्विना॒ धियं॒ मेऽमृ॑ध्रां सा॒तये॑ कृतं वसू॒युम् ।
विश्वा॑ अविष्टं॒ वाज॒ आ पुरं॑धी॒स्ता न॑ः शक्तं शचीपती॒ शची॑भिः ॥५॥

Prachimu devashvina dhiyam memridhram sataye kritam vasuyum
Vishva avishtam vaja a purandhista nah shaktam shachipati shachibhih

अ॒वि॒ष्टं धी॒ष्व॑श्विना न आ॒सु प्र॒जाव॒द्रेतो॒ अह्र॑यं नो अस्तु ।
आ वां॑ तो॒के तन॑ये॒ तूतु॑जानाः सु॒रत्ना॑सो दे॒ववी॑तिं गमेम ॥६॥

Avishtam dhishvashvina na asu prajavadreto ahrayam no astu
A vam toke tanaye tutujanah suratnaso devavitim gamema

ए॒ष स्य वां॑ पूर्व॒गत्वे॑व॒ सख्ये॑ नि॒धिर्हि॒तो मा॑ध्वी रा॒तो अ॒स्मे ।
अहे॑ळता॒ मन॒सा या॑तम॒र्वाग॒श्नन्ता॑ ह॒व्यं मानु॑षीषु वि॒क्षु ॥७॥

Esha sya vam purvagatveva sakhye nidhirhito madhvi rato asme
Ahelata manasa yatamarvagashnanta havyam manushishu vikshu

एक॑स्मि॒न्योगे॑ भुरणा समा॒ने परि॑ वां स॒प्त स्र॒वतो॒ रथो॑ गात् ।
न वा॑यन्ति सु॒भ्वो॑ दे॒वयु॑क्ता॒ ये वां॑ धू॒र्षु त॒रण॑यो॒ वह॑न्ति ॥८॥

Ekasminyoge bhurana samane pari vam sapta sravato ratho gat
Na vayanti subhvo devayukta ye vam dhurshu taranayo vahanti

अ॒स॒श्चता॑ म॒घव॑द्भ्यो॒ हि भू॒तं ये रा॒या म॑घ॒देयं॑ जु॒नन्ति॑ ।
प्र ये बन्धुं॑ सू॒नृता॑भिस्ति॒रन्ते॒ गव्या॑ पृ॒ञ्चन्तो॒ अश्व्या॑ म॒घानि॑ ॥९॥

Asashchata maghavadbhyo hi bhutam ye raya maghadeyam junanti
Pra ye bandhum sunritabhistirante gavya princhanto ashvya maghani

नू मे॒ हव॒मा शृ॑णुतं युवाना यासि॒ष्टं व॒र्तिर॑श्विना॒विरा॑वत् ।
ध॒त्तं रत्ना॑नि॒ जर॑तं च सू॒रीन्यू॒यं पा॑त स्व॒स्तिभि॒ः सदा॑ नः ॥१०॥

Nu me havama shrinutam yuvana yasishtam vartirashvinaviravat
Dhattam ratnani jaratam cha surinyuyam pata svastibhih sada nah