সূক্ত 66

66.1

১৯ মৈত্রাবরুণির্বসিষ্ঠঃ। মিত্রাবরুণৌ, ৪-১৩ আদিত্যাঃ, ১৪-১৬ সূর্যঃ ।গায়ত্রী,১০-১৫ প্রগাথঃ = (সমা বৃহতী, বিষমা সতোবৃহতী ), ১৬ পুর উষ্ণিক্ ।

প্র মিত্রয়োর্বরুণয়োঃ স্তোমো ন এতু শূষ্যঃ । নমস্বান্তুবিজাতয়োঃ ॥১॥

যা ধারয়ন্ত দেবাঃ সুদক্ষা দক্ষপিতরা । অসুর্যায় প্রমহসা ॥২॥

তা নঃ স্তিপা তনূপা বরুণ জরিতৄণাম্ । মিত্র সাধয়তং ধিয়ঃ ॥৩॥

যদদ্য সূর উদিতেঽনাগা মিত্রো অর্যমা । সুবাতি সবিতা ভগঃ ॥৪॥

সুপ্রাবীরস্তু স ক্ষয়ঃ প্র নু যামন্ত্সুদানবঃ । যে নো অংহোঽতিপিপ্রতি ॥৫॥

উত স্বরাজো অদিতিরদব্ধস্য ব্রতস্য যে । মহো রাজান ঈশতে ॥৬॥

প্রতি বাং সূর উদিতে মিত্রং গৃণীষে বরুণম্ । অর্যমণং রিশাদসম্ ॥৭॥

রায়া হিরণ্যয়া মতিরিয়মবৃকায় শবসে । ইয়ং বিপ্রা মেধসাতয়ে ॥৮॥

তে স্যাম দেব বরুণ তে মিত্র সূরিভিঃ সহ । ইষং স্বশ্চ ধীমহি ॥৯॥

বহবঃ সূরচক্ষসোঽগ্নিজিহ্বা ঋতাবৃধঃ । ত্রীণি যে যেমুর্বিদথানি ধীতিভির্বিশ্বানি পরিভূতিভিঃ ॥১০॥

বি যে দধুঃ শরদং মাসমাদহর্যজ্ঞমক্তুং চাদৃচম্ ।
অনাপ্যং বরুণো মিত্রো অর্যমা ক্ষত্রং রাজান আশত ॥১১॥

তদ্বো অদ্য মনামহে সূক্তৈঃ সূর উদিতে । যদোহতে বরুণো মিত্রো অর্যমা যূয়মৃতস্য রথ্যঃ ॥১২॥

ঋতাবান ঋতজাতা ঋতাবৃধো ঘোরাসো অনৃতদ্বিষঃ ।
তেষাং বঃ সুম্নে সুচ্ছর্দিষ্টমে নরঃ স্যাম যে চ সূরয়ঃ ॥১৩॥

উদু ত্যদ্দর্শতং বপুর্দিব এতি প্রতিহ্বরে । যদীমাশুর্বহতি দেব এতশো বিশ্বস্মৈ চক্ষসে অরম্ ॥১৪॥

শীর্ষ্ণঃশীর্ষ্ণো জগতস্তস্থুষস্পতিং সময়া বিশ্বমা রজঃ ।
সপ্ত স্বসারঃ সুবিতায় সূর্যং বহন্তি হরিতো রথে ॥১৫॥

তচ্চক্ষুর্দেবহিতং শুক্রমুচ্চরৎ । পশ্যেম শরদঃ শতং জীবেম শরদঃ শতম্ ॥১৬॥

কাব্যেভিরদাভ্যা ঽঽয়াতং বরুণ দ্যুমৎ । মিত্রশ্চ সোমপীতয়ে ॥১৭॥

দিবো ধামভির্বরুণ মিত্রশ্চা যাতমদ্রুহা । পিবতং সোমমাতুজী ॥১৮॥

আ যাতং মিত্রাবরুণা জুষাণাবাহুতিং নরা । পাতং সোমমৃতাবৃধা ॥১৯॥