সূক্ত 59

59.1

১২ মৈত্রাবরুণির্বসিষ্ঠঃ। ১-১১ মরুতঃ, ১২ রূদ্রঃ ( মৃত্যুবিমোচিনী ঋক্ ) । প্রগাথঃ = ( বিষমা বৃহতী, সমা সতোবৃহতী ), ৭-৮, ৯-১১ গায়ত্রী, ১২ অনুষ্টুপ্ ।

যং ত্রায়ধ্ব ইদমিদং দেবাসো যং চ নয়থ। তস্মা অগ্নে বরুণ মিত্রার্যমন্মরুতঃ শর্ম যচ্ছত ॥১॥

59.2

যুষ্মাকং দেবা অবসাহনি প্রিয় ঈজানস্তরতি দ্বিষঃ ।
প্র স ক্ষয়ং তিরতে বি মহীরিষো যো বো বরায় দাশতি ॥২॥

59.3

নহি বশ্চরমং চন বসিষ্ঠঃ পরিমংসতে । অস্মাকমদ্য মরুতঃ সুতে সচা বিশ্বে পিবত কামিনঃ ॥৩॥

59.4

নহি ব ঊতিঃ পৃতনাসু মর্ধতি যস্মা অরাধ্বং নরঃ ।
অভি ব আবর্ত্সুমতির্নবীয়সী তূয়ং যাত পিপীষবঃ ॥৪॥

59.5

ও ষু ঘৃষ্বিরাধসো যাতনান্ধাংসি পীতয়ে ।
ইমা বো হব্যা মরুতো ররে হি কং মো ষ্ব১ন্যত্র গন্তন ॥৫॥

59.6

আ চ নো বর্হিঃ সদতাবিতা চ নঃ স্পার্হাণি দাতবে বসু ।
অস্রেধন্তো মরুতঃ সোম্যে মধৌ স্বাহেহ মাদয়াধ্বৈ ॥৬॥

59.7

সস্বশ্চিদ্ধি তন্ব১ঃ শুম্ভমানা আ হংসাসো নীলপৃষ্ঠা অপপ্তন্ ।
বিশ্বং শর্ধো অভিতো মা নি ষেদ নরো ন রণ্বাঃ সবনে মদন্তঃ ॥৭॥

59.8

যো নো মরুতো অভি দুর্হৃণায়ুস্তিরশ্চিত্তানি বসবো জিঘাংসতি ।
দ্রুহঃ পাশান্প্রতি স মুচীষ্ট তপিষ্ঠেন হন্মনা হন্তনা তম্ ॥৮॥

59.9

সাংতপনা ইদং হবির্মরুতস্তজ্জুজুষ্টন । যুষ্মাকোতী রিশাদসঃ ॥৯॥

59.10

গৃহমেধাস আ গত মরুতো মাপ ভূতন । যুষ্মাকোতী সুদানবঃ ॥১০॥

59.11

ইহেহ বঃ স্বতবসঃ কবয়ঃ সূর্যত্বচঃ । যজ্ঞং মরুত আ বৃণে ॥১১॥

59.12

ত্র্যম্বকং যজামহে সুগন্ধিং পুষ্টিবর্ধনম্ । উর্বারুকমিব বন্ধনান্মৃত্যোর্মুক্ষীয় মামৃতাৎ ॥১২॥